Nəsimi rayonunda 14 saylı məktəbdə “erkən nikaha yox” tədbiri keçirildi - FOTO
Cəmiyyəti kökündən sarsıdan mənəvi bəlalardan biri erkən nikahlardır. Təəssüflər olsun ki, dünyanın bir sıra ölkələrində olduğu kimi, Azərbaycanda erkən nikah problemi aktualdır və kökündən həll olunası bir məsələdir.
Bir sıra mütəxəssislərin erkən nikahı cəmiyyəti, ailə dəyərlərini sarsıdan mənəvi terror kimi xarakterizə etməsi təsadüfi deyil. Çünki uşaq yaşda, yeniyetməliyin ilk çağlarında, hələ formalaşmadan, gəlinciyindən, oyuncağından, uşaqlığından doymayan qızların ərə verilməsi çox mənfi nəticələr verir. Nə mənəvi, nə bioloji, nə psixoloji və digər göstəricilərinə görə ailə həyatına hazır olmayan qızların qurduğu ailələr əksər hallarda yarımçıq qalır. Məktəbdən, təhsildən zorla kənarlaşdırılan qızlar demək olar ki, normal yaşayışdan məhrum olurlar. Təəssüf ki, buna da rəvac verən onların ailələri, valideynləri, yaxınları olur. Qızlarını erkən yaşda oda atan valideynlər öz övladına nə qədər pislik etdiyinin fərqionə varmaq istəmirlər. Məktəb partasından, kitablarından, müəllimlərindən, bütövlükdə ali təhsil almaq, cəmiyyət üçün yararlı vətəndaş olmaq hüququndan məhrum edilən qızların taleyi hər kəsi düşündürməlidir. Erkən nikahın daha çox imkansız, aztəminatlı ailələrdə baş verməsi də ayrıca bir faciədir. Onlar elə hesab eidrlər ki, yeniyetmə qızlarını zorla ərə verməklə yoxsulluqdan xilas ola bilərlər, amma tamam əksi baş verir.
Bilirik ki, dövlətin ayrı-ayrı strukturları, o cümlədən də qeyri-hökumət təşkilatları intensiv olaraq erkən nikaha qarşı tədbirlər, dəyirmi masalar keçirilir.
Nəsimi rayon İcra Hakimiyyətinin təşkilatçılığı ilə Nəsimi rayonu 14 saylı tam orta məktəbdə “Erkən nikah” mövzusunda maarifləndirmə seminarı keçirildi.
Rayon icra başçısının müavini, azyaşlılar üzrə komissiyanın sədri Gülarə Verdiyevanın, məktəb direktoru Rəfail Hüseynovun, məktəb kollektivinin, şagird və valideynlərin iştirakı ilə keçirilən maarifləndirici seminar olduqca faydalı oldu. Erkən nikahla bağlı orta məktəblərdə valideynlərin iştirakı ilə bu cür maarifləndirici seminarların təşkil edilməsinin müsbət nəticələrinin olacağına şübhəmiz yoxdur.
Məktəbin müəllim və şagirdlərinin erkən nikahla bağlı çıxışları, direktor R.Hüseynovun, icra başçısının müavini, azyaşlılar üzrə komissiyanın sədri G.Verdiyevanın erkən nikahın zərərləri, fəsadları barədə dolğun fikirləri biz valideynlər üçün çox ciddi həyacan siqnalı oldu. G.Verdiyeva erkən nikahın yaratdığı bəlalar, cəmiyyəti, ailə dəyərlərini dərindən sarsıtması barədə dediklərindən valideynlərin ciddi nəticə çıxarması vacibdir. O, ilk növbədə bildirdi ki, valideyn öz övladı ilə dost olmalıdır, onun arzularını yarımçıq qoymamalıdır, təhsildən ayırmamalıdır, ali təhsil alması, cəmiyyət üçün yararlı vətəndaş kimi yetişməsi üçün dəstək olmalıdır. Dövlətin Azərbaycan ailəsinin yanında olduğunu deyən G.Verdiyeva qeyd etdi ki, icra hakimiyyəti mütamadi olaraq erkən nikahla və digər problemlərlə bağlı maarifləndirici tədbirlər keçirir. Erkən nikahın zərərli olduğunu deyən natiq bildirdi ki, erkən nikahların sayının azaldılması, tədricən sıradan çıxması üçün valideynlərin üzərinə çox böyük məsuliyyət düşür. Dövlət qurumlarının, eləcə də təmsil etdiyi icra hakimiyyətinin hər zaman erkən nikahla üzləşən qızlara dəstək olduğunu qeyd etdi.
Orta məktəblərdə erkən nikahın qarşısının alınması istiqamətində bu cür tədbirlərin keçirilməsi valideynlərin, erkən yaşlı qızların maariflənməsində mühüm rol oynayır. Belə maarifçilik tədbirləri ilə biz sağlam ailələrə, işıqlı gələcəyə nail ola bilərik.
İradə SARIYEVA
