Bir artistin 24 kvadratlıq evdə yaşaması informasiya məkanımızda niyə trendə çevrilə bilir?
Xəyalə Rəis: “Belə xəbərlərin media gündəmində trendə çevrilməsinin başlıca səbəbkarı bəzi mədəniyyət xəbər yazanlardır”
Medianın gündəminə bəzən elə mövzular gətirilir ki, bu oxucuda, tamaşaçıda, dinləyicidə bəzi haqlı suallar yaranmasına səbəb olur. Qos-qoca Azərbaycan mətbuatına mövzu qəhətdir ki, kimlərinsə şəxsi həyatını, həyat tərzini, ev-eşiyini, bağ-bağatını trendə çevirir?
Mətbuatın gündəmi elə məsələlər tutur ki, o barədə danışmağa adam utanır, ciddi mövzular bir tərəfdə qalır, kiminsə ağzından çıxan, ev-eşiyi barədə dediyi söz mətbuatı başına götürür.
Uzağa getməyək, əməkdar artist, aktrisa Mehriban Xanlarova bu günlərdə yerli TV-lərdən birinə müsahibəsində sənətilə ilə yanaşı, indiyədək yaşadığı çətin həyat şəraitindən də söz açıb. Valideynlərinin lal-kar olduğunu bildirən Əməkdar artistin 8 nəfərlik ailə üzvü ilə birlikdə 24 kv.m-lik evdə yaşadığı qeyd edilib.
M.Xanlarovanın 24 kv.m-lik evdə yaşaması bizim informasiya məkanında trend xəbərə çevrilir. Bu nə ilə izah oluna bilər? Bizim informasiya məkanında ciddi iqtisadi, siyasi xəbərlər boşluğundan əmələ gəlir, yoxsa auditoriyanın getdikcə daha çox“obuvatelləşməsinin” nəticəsidir, ya dinləyici, izləyici zövqünün korlanması ilə bağlıdır ki, bir artistin 24 kvadratlıq evdə yaşaması xəbər məkanının aparıcı, yaxud üstün trendlərindən birinə çevrilir? Bunun səbəbi nədir?
“Yetər ki, reytinq versin və İP gətirsin”
Moderator.az saytının baş redaktoru, sənətşünas Xəyalə Rəis “Bakı-Xəbər”ə şərhində bildirdi ki, təkcə M.Xanlarovanın deyil, bütövlükdə tanınmışlarla bağlı istənilən xəbər medianın gündəminə çevrilir. “Məşhurların həyatı hər zaman tamaşaçılara maraqlı olub. İstər yerli mətbutda istərsə də xarici mətbuatda biz bunun tez-tez şahidi olmuşuq. Ancaq baxır necə və hansı şəkildə. Əvvəla onu qeyd edim ki, bu gün mətbuatda mədəniyyətdən anlayışı olan, bu sahəyə tam bələd olan jurnalistlər çox azdır. Ümumi “jurnalistika” ixtisasını bitirən tələbələrin “mədəniyyət jurnalistikası” adı altında məqalə yazması yalnız bu formatda və bu şəkildə olur. Yazdıqları təqdirdə yalnız səhnədə aktrisanın görünən alt geyimindən, məişət problemindən, İP-yə hesablanan məsələlərdən olacaq. Yetər ki, reytinq versin və İP gətirsin. Jurnalistikanın mədəniyyət yönümümdə müəyyən axsaqlıqlar var. Bu sahəyə bələd olanlara lazımınca dəyər verilmir deyə onlar başqa bir istiqamətə yönəliblər. Bu səbəbdəndir ki, onların yerini yalnız press reliz verməklə işini bitmiş hesab edən və mədəniyyət deyəndə aktyor və aktrisanın yalnız məişət problemini işıqlandırmağı özünə borc bilən jurnalistika yaranıb” - deyə bildirən X.Rəisin sözlərinə görə, oxucu, tamaşaçı zövqünün korlanması da bu məsələlərə şərait yaradır. O, qeyd etdi ki, bir tərəfdən mədəniyyət jurnalistikası sahəsində bir sıra hallarda qeyri-peşəkarların çalışması, digər tərəfdən də oxucu zövqü mövcud vəziyyətə rəvac verir. “Hardan baxsan bu materialların hamısı xəbərdir. Amma sanballılığı, keyfiyyət yükü varmı desəniz əlbəttə ki, yoxdu. Bu da mədəniyyət jurnalistikasının ən yüngül formasıdır. O xəbəri yazanlardan Mehriban xanımın səhnədə hansı obrazları canlandırdığını soruşsanız əlbətdəki xəbəri olmayacaq. Bu sahədə müəyyən boşluqlarımız var. Əlbəttə, belə xəbərlərin media gündəmində trendə çevrilməsinin başlıca səbəbkarı bəzi mədəniyyət xəbər yazanlardır. Əslində, siz də bilirsiz ki, mövzu qıtlığı yoxdur. Bu adamlar sənətkarın sənətindən yazmaq istəmir, yaxud yazmaq onlara çətin gəlir, odur ki, bu cür yanaşmalar sərgiləyirlər” - deyə baş redaktor əlavə etdi.
İradə SARIYEVA
