Fransa XİN Almatı görüşünə qeyri-səmimi qiymət verdi...
Sahil Kərimli: “Fransa bizi bu bəyanatlarla aldada bilməz”
Fransa Xarici İşlər Nazirliyi mayın 10-11-də Almatıda Azərbaycan və Ermənistan xarici işlər nazirləri arasında danışıqların yeni mərhələsinin keçirilməsini alqışlayır. Bu barədə Fransa Xarici İşlər Nazirliyinin X səhifəsində qeyd olunub:
“Fransa 19 aprel 2024-cü ildə qəbul edilmiş prinsiplər əsasında delimitasiyanın davam etdirilməsinə çağırır. Fransa beynəlxalq hüquqa uyğun olaraq Cənubi Qafqazda ədalətli və davamlı sülhün bərqərar olması üçün tərəfdaşları ilə birgə fəaliyyətini davam etdirəcək”.
Fransanın bu bəyanatında səmimiyyət notu varmı? Axı, Fransa öz addımları ilə sübut edib ki, heç də dediyi kimi Cənubi Qafqazda sülhün bərqərar olmasına deyil, vəziyyətin gərginləşməsinə çalışıb.
Siyasi şərhçi Sahil Kərimli “Bakı-Xəbər”ə açıqlamasında bildirdi ki, Fransa bu bəyanatında heç də səmimi deyil: “Fransa istər siyasi gedişləri ilə, istərsə də həm aşkar, həm də gizlin şəkildə daim Ermənistana dəstək olub. Bu isə o deməkdir ki, işğalçılığa, separatizmə, radikalçılığa dəstək olub. Həmin siyasət bu gün də gizlin şəkildə davam etdirilir. Fransanın Ermənistanı dəstəkləməsi, müdafiə etməsi birbaşa Cənubi Qafqazda sülhə və təhlükəsizliyə həm maneədir, həm də çox ciddi zərbədir. Bu birmənalı olaraq belədir. Əgər belə olmasa idi, Fransa uzun müddət Ermənistanı silahlandırmazdı. Ermənistan silahlandırılırsa, beynəlxalq arenada müdafiə edilirsə, dəstək görürsə, Ermənistan rəhbərləri ilə Cənubi Qafqazda gedən proseslər müzakirə edilirsə, hansısa təmaslar keçirilirsə, bu heç də Cənubi Qafqazda sülhə və təhlükəsizliyə dəstək deyil. Əksinə, bölgəmizdə yeni münaqişə ocağı yaratmağa hesablanmış addımlardır. Fransa bizi bu bəyanatlarla aldada bilməz. Eyni zamanda dünya ictimaiyyətini də aldada bilməz. Fransanın məqsədi Azərbaycana qarşı düşməçilik hissi ilə bölgəmizi qarışdırmaq, Cənubi Qafqazda hegemonluq, bölgəmizdə gedən proseslərdə öz siyasi varlığını qoruyub saxlamaqdan ibarətdir. Azərbaycan dövləti də daim Fransanın bu cür məkrli planlarına qarşı qətiyyətli addımlar atıb. Dövlət başçımız cənab İlham Əliyev tərəfindən, diplomatik korpuslarımız və xarici işlər nazirliyi səviyyəsində daim Fransaya layiqli cavab verilib. Təsadüfi deyil ki, bir neçə gün bundan əvvəl Azərbaycan Prezidenti İlham Əliyev Şuşada yerli sakinlərlə görüşü zamanı qətiyyətli və sərt şəkildə Fransaya öz mesajlarını çatdırdı və növbəti dəfə ciddi xəbərdarlıq etdi. Əgər Fransa bu siyasətindən əl çəkməsə, Azərbaycanın daha sərt reaksiyası ilə üzləşəcək”.
Məhəmmədəli QƏRİBLİ
