Delimitasiya-demarkasiya üzrə Azərbaycanın şərtləri qəti qalib gəldi...
Faiq Ələkbərli: “Ermənistan hökuməti böyük ölçüdə bu gerçəyi qəbul edib və delimitasiya, demarkasiya işi Azərbaycanın şərtlərinə uyğun gedir”
“Bu gün Qazaxın 1990-cı və 1992-ci illərdə işğal edilmiş torpaqları bir güllə atılmadan bizə qaytarılır. Delimitasiya, demarkasiya bizim şərtlərimiz əsasında həyata keçirilir və bu, bizim növbəti zəfərimizdir”. Bu fikirləri Prezident İlham Əliyev Şuşaya qayıdan ilk sakinlərə mənzillərinin açarlarının təqdim edilməsi mərasimində çıxışı zamanı deyib.
“Bütün bu proses güllə atılmadan, qarşıdurma olmadan həyata keçirilir, əlbəttə, bu da Azərbaycanın növbəti qələbələrindən biridir”
AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi ekspert Faiq Ələkbərli baki-xeber.com-a bildirdi ki, indiyə qədər bütün proseslər Azərbaycanın arzuladığı və istədiyi şəkildə başa çatıb, o cümlədən də sərhədlərin delimitasiyası və demarkasiyası ölkəmizin şərtləri əsasında gerçəkləşdirilir. “Azərbaycanın Qazax rayonunun işğal altında olan kəndlərindən artıq 4-nün qaytarılması barədə razılığa gəlinib, tezliklə bu kəndlər qaytarılacaq, geridə qalan 4 kənd də, çox böyük ehtimalla, yaxın vaxtlarda qaytarıla bilər.
Bu proses Azərbaycanın istədiyi kimi gedir. Ermənistan hökuməti Azərbaycanın haqlı tələblərini nəzərə almağa məcburdur. Düzdür, Ermənistan hökumətinə həm daxildən, həm də bəzi xarici qüvvələr tərəfindən təzyiqlər var. Biz bu prosesləri də izləyirik. Prezident İlham Əliyevin Şuşaya qayıdan ilk sakinlərə mənzillərinin açarlarının təqdim edilməsi mərasimində çıxışı da göstərdi ki, Azərbaycan-Ermənistan sərhədlərinin delimitasiyası və demarkasiyası məhz Azərbaycanın şərtlərinin qəbul edilməsi şəraitində həyata keçirilir. Yəni bu proses də Azərbaycanın tam olaraq maraqlarına uyğun şəkildə gedir. Azərbaycanın Ermənistan hökumətinin qarşısına qoyduğu müəyyən şərtlər var idi ki, o şərtlər əsasında sərhədlərimiz müəyyənləşir”-deyə F.Ələkbərli qeyd etdi.
F.Ələkbərli bildirdi ki, doğrudur, bu sərhədlər də nisbidir. O vurğuladı ki, Azərbaycan və Ermənistan arasında sərhəd dedikdə biz heç də Ermənistanda qalan ərazimizi özümüzə yad hiss etmirik, amma indiki beynəlxalq şərtlər çərçivəsində sərhədləri müəyyənləşdiririk. “Ancaq Azərbaycanın həm müharibədən qalib çıxması, həm real bir gücə çevrilməsi bir gerşəklikdir. Ermənistan hökuməti böyük ölçüdə bu gerçəyi qəbul edib və delimitasiya, demarkasiya işi Azərbaycanın şərtlərinə uyğun gedir. Bütün bu proses güllə atılmadan, qarşıdurma olmadan həyata keçirilir, əlbəttə, bu da Azərbaycanın növbəti qələbələrindən biridir.
Yerli müxalifət və onların arxasında dayananlar, eləcə də erməni Qriqoryan kilsəsi, revanşist qüvvələr Ermənistan hökumətinin Azərbaycanın şərtləri ilə razılaşmasına etiraz edir, hökumətlə razılaşmadıqlarını bəyan edirlər. Amma onların etirazları heç nəyi həll etmir. Ermənistanın Baş naziri Paşinyan yaxşı bilir ki, sərhədlərin Azərbaycanın şərtləri çərçivəsində müəyyənləşdirilməsindən başqa yol yoxdur. Bu tarixi bir gerçəklikdir, Azərbaycan regionda böyük gücdür, qalib dövlətdir, Ermənistan isə məğlub dövlət kimi müharibədə qələbə qazanmış Azərbaycanın şərtlərinə hərfiyən əməl etməlidir, başqa seçimi yoxdur”-deyə qeyd edən F.Ələkbərli bildirdi ki, qalib Azərbaycan şərtləri diqtə edən tərəfdir. Sərhədlərin delimitasiyası və demarkasiya prosesinin getdiyini, artıq yetəri sayda sərhəd dirəklərinin basdırıldığını deyən F.Ələkbərlinin sözlərinə görə, Ermənistan hökuməti yolundan çəkinməsə ilin sonuna qədər sülh müqaviləsinin imzalanması da reallaşa bilər. “Hazırda Azərbaycan-Ermənistan sərhədlərinin delimitasiya və demarkasiyası rəsmi Bakının şərtləri əsasında gerçəkləşdirilir və bu məsələ öz həllini tapmaqdadır”-deyə F.Ələkbərli bildirdi.
İradə SARIYEVA
