İsa Qəmbər Müsavata yenidən qayıtdı, Strateji Düşüncə Mərkəzi necə olacaq... - MÜSAHİBƏ
Səxavət Soltanlı: “Müsavatın parlament partiyası olacağına ümidlərim çoxdur”
İsa Qəmbər yenidən başqan postuna seçilib. Bu hadisə Müsavat Partiyasının 11-ci qurultayında baş verib. Qurultayda sərbəst Məclis üzvləri, Divan üzvləri, Mərkəzi Nəzarət Komissiya üzvləri və yeni başqan seçkisi keçirilib.
Seçkidə 278 nəfər iştirak edib, onlardan 3 nəfər əleyhinə, 275 nəfər isə İsa Qəmbərin xeyrinə səs verib.
Qeyd edək ki, İsa Qəmbər 10 il sonra yenidən namizədliyini irəli sürüb. Müsavat Partiyasının nizamnaməsinə əsasən, başqan ardıcıl 2 müddətdən artıq eyni vəzifəyə seçilə bilməz və buna görə də sonuncu başqan Arif Hacılı namizədliyini irəli sürməyib.
Daha əvvəl partiya başqanının müavini, Divan üzvü Osman Kazımov və partiyanın Səbail təşkilatının üzvü Natiq Mehdi də Müsavat başqanlığına namizədliklərini irəli sürsələr də, sonradan hər ikisi İsa Qəmbərin xeyrinə namizədliyini geri götürüb.
Xatırladaq ki, İsa Qəmbər 1992-ci ildə Müsavat Partiyasının bərpa qurultayını keçirərək partiyanın başqanı seçilib. O, 1992-ci ildən 2014-cü ilədək partiyaya rəhbərlik edib. 2014-cü ildə isə başqanlıq seçkisində iştirak etməyərək partiyanın aparat rəhbəri Arif Hacılıya dəstək verib və onun başqan seçilməsində həlledici rol oynayıb.
Baş verən bu yeniliklə bağlı partiya funksionerlərindən olan, tanınmış musavatçı Səxavət Soltanla əlaqə saxladıq və məsələyə onun münasibətini öyrəndik:
- Səxavət bəy, son qurultaydan sonra partiyada hansı vəzifəni tutursunuz?
- Partiyanın rəhbər strukturları buraxılıb. Qurultayın ikinci günündə Məclis üzvləri seçildi. Məclisin növbəti toplantısında partiyanın Divanı formalaşdırılacaq. Bundan sonra Divan üzvləri kollegial olaraq Müsavatın idarəçiliyində öz işlərinə başlayacaq.
- Bəs başqan müavinləri necə, təsdiqlənməyib?
- Prosedur belədir ki, partiyanın başqanı özünə müavinləri təyin edir. Hələ ki, müavinlər təyin edilməyib. Ənənə belədir ki, bu, Divan seçkilərindən sonra baş verir.
- Sizin rəhbər posta təyinatınız gözlənilirmi?
- Bu haqda heç nə deyə bilmərəm. Mən Məclis üzvü seçilmişəm. Digər seçkilər və təyinatlar reallaşmasığı üçün bu barədə nəsə demək tezdir.
- İsa Qəmbərin yenidən başqan seçilməsi hansı zərürətdən doğub və bununla bağlı gözləntilər nədir?
- Partiyanın gələcəyi ilə bağlı ümidlərimiz böyükdür. Həm də o baxımdan ki, partiyanın başına təcrübəli və kifayət qədər siyasi nüfuzi olan şəxs gəlib. Ən doğru seçimdir. Bu seçimi etməklə müsavatçılar partiyanın siyasi həyatdakı aktivliyini daha da artırmış oldular. Ölkədəki ictimai-siyasi vəziyyət imkan verəcəksə, qarşıdan gələn parlament seçkilərində partiyanın aktiv iştirakı olacaq. Müsavatın parlament partiyası olacağına ümidlərim çoxdur. Bunun üçün bizim potensialımız var.
- Belə çıxır ki, partiyanın ən böyük hədəfi parlamentdə təmsil olunmaqdır?
- Xeyr, bizim hədəfimiz yalnız o deyil. Biz sıradan bir partiya deyilik. Müsavat tarixi ənənəsi olan partiyadır. Bizim hədəfimiz yalnız hakimiyyət deyil. Biz Azərbaycan xalqının maraqlarının təmsilçisiyik. Azərbaycan dövlətinin qorunması və inkişafında maraqlıyıq. Biz ideoloji olaraq Azərbaycanın Avropaya inteqrasiyasında maraqlıyıq. Bizim hakimiyyətdə olub-olmamağımızdan asılı olmayaraq, hədəfimiz Azərbaycan xalqının ləyaqətli yaşamasını təmin etməkdir. Bu yöndə fəaliyyətimizi davam etdirəcəyik.
- İsa Qəmbər uzun müddət bu partiyaya rəhbərlik etsə də, Müsavat onun başqanlığı dönəmində heç ciddi uğura imza atmadısa, bundan sonra ciddi uğur gözləməyə dəyərmi?
- İsa Qəmbərin nüfuzu imkan verir ki, biz Azərbaycan xalqının maraqlarına doğru əzmkar fəaliyyətimizi davam etdirək. Müsavat Partiyası İsa Qəmbərin rəhbəri olduğu dönəmdə xeyli uğurlar qazanıb. 2000-ci ilin parlament, 2003-cü ilin Prezident seçkilərində və bunun ardınca olan 2005-ci il parlament seçkilərində böyük uğurlara imza atıb. Əldə edilən siyasi uğurları reallaşdıra bilməmişiksə, bunu İsa Qəmbərin zəifliyi kimi yozmaq olmaz. Biz yalnız seçki yolu ilə hakimiyyətə gəlmək istəyirik. Bizim başqa niyyətimiz yoxdur. Nə də elə resursumuz var ki, qeyri-qanuni yolla hakimiyyətə gələk.
- İsa Qəmbər başqan olmadığı dönəmdə Strateji Düşüncə Mərkəzi adında bir təşkilata rəhbərlik edirdi. Bu illər ərzində həmin Mərkəz ortaya hansı nəticəni qoydu və İsa Qəmbərin başqan olmasından sonra həmin Mərkəzin gələcək fəaliyyəti necə olacaq?
- Mənə elə gəlir ki, başqanlıqla hansısa Mərkəzə rəhbərlik bir-birinə maneçilik törədən fəaliyyət deyil. Ancaq sözügedən Mərkəzin hansı işlər gördüyü ilə bağlı sualları İsa Qəmbərin özünə versəniz yaxşı olar.
- İsa Qəmbərin aktiv siyasətə qayıdışı müxalif düşərgədə konsolidasiyanı təmin edəcəkmi?
- Bunu sonrakı dönəm göstərəcək. Hər bir halda, biriliyin olması tək İsa Qəmbərdən asılı olan məsələ deyil.
Məhəmmədəli QƏRİBLİ
