Polis "Tik-tok" dələduzlarını "ağıllandırmağa" başladı...
Sosial şəbəkələrdə cəmiyyətə qarşı hörmətsizlik, mənəvi dəyərlərə uyğun olmayan qeyri-etik paylaşımlar və çağırışlar edən şəxslərlə bağlı polis əməkdaşları tərəfindən qanunamüvafiq tədbirlər davam etdirilir.
Barəsində dəfələrlə tədbir görülməsinə baxmayaraq, 1988-ci il təvəllüdlü, “Adem.Mirzeyev” profili ilə tanınan Sadiq Mirzəyev yenidən məsuliyyətə cəlb edilib. Müvafiq qərarla S.Mirzəyev 30 sutka inzibati qaydada həbs edilib.
Qeyd edək ki, Ağcabədi rayon sakini olan 9 yaşlı Adəmin atası ilə birgə canlı yayımlar açması, nalayiq ifadələr işlətməsi, gələcək tərbiyəsinə neqativ təsir edə biləcək mövzularla bağlı müzakirələr aparması cəmiyyətdə birmənalı qarşılanmayıb və müzakirələrə səbəb olub. Bununla bağlı olaraq azyaşlının atası Sadiq Mirzəyev bir neçə dəfə polis şöbəsinə dəvət edilib.
Ötən həftə isə 1996-cı il təvəllüdlü, “Magerramoff” ləqəbli Əmrah Məhərrəmov, 2003-cü il təvəllüdlü, “Miri” ləqəbli Mirnamiq Mirələmzadə saxlanılıb. Müvafiq qərarla Ə.Məhərrəmov 20, M.Mirələmzadə 30 sutka inzibati qaydada həbs edilib.
Daxili İşlər Nazirliyinin yaydığı məlumatda qeyd edilir ki, sosial platformalarda, xüsusilə də canlı yayımlar zamanı cəmiyyətə qarşı açıq hörmətsizlik, mənəvi dəyərlərə zidd davranışlar sərgiləyən şəxslərə qarşı müvafiq tədbirlərin görülməsi davam etdirilir. Bu səpkidə görülən işlər ictimaiyyət tərəfindən yüksək qiymətləndirilir.
Elçin Bayramlı: “Tik-Tok”da elə bir münbit şərait yaranıb ki, pul qazanmaq üçün də mənfi məzmunlu paylaşımlar stimulyasiya edilir”
Sosioloq Elçin Bayramlı “Bakı-Xəbər”ə açıqlamasında bildirdi ki, “TikTok” dünyada tam nəzarətsiz qalan sosial şəbəkə platformasıdır: “İstənilən biabırçılığı, qanunsuzluğu, kriminal kontekstdə olan, əxlaqsız videoları tam sərbəst şəkildə bura yerləşdirmək, canlı yayımlarda göstərmək mümkündür. Belə bir vəziyyətdə xüsusi qüvvələr bundan istifadə edir və cəmiyyəti mənəvi cəhətdən tamamilə məhv etməyə çalışır. Əvvəldən “TikTok”un ölkədə bağlanmasını təklif edənlərdənəm, çünki Azərbaycan xalqına bunun qədər zərər vuran ikici bir sosial platforma yoxdur. Nəinki böyüklər, artıq azyaşlılar da “Tik-Tok” cəhənnəmində məhv olurlar. Mənəvi deqradasiya tüğyan edir. ABŞ-nin bir çox ştatlarında, bir sıra Avropa ölkələrində, eləcə də dünyanın digər yerlərində artıq “Tik-Tok” qadağan edilib. Azərbaycan hökuməti də bu barədə ciddi düşünməli, “Tik-Tok” dərhal bağlanmalıdır. Düzdür, günümüzdə müxtəlif platformalar mövcuddur, insanlar istədiklərini paylaşa bilirlər. “Tik-Tok”da isə elə bir münbit şərait yaranıb ki, pul qazanmaq üçün də mənfi məzmunlu paylaşımlar stimulyasiya edilir. İnsanlar da baxır ki, biabırçılıqla harada daha çox pul qazanmaq mümkündür, işsizlər, imkansızlar da son çarə kimi bundan istifadə edirlər. Faydalı kanalların abunəçiləri çox azdır, 99 faiz kontekst biabırçılıqdan ibarətdir”.
Könül İsmayılova: “Bu cür zərərli amillərlə mübarizə aparılmazsa, illər sonra əxlaqi cəhətdən çox bərbad cəmiyyət görə bilərik”
Psixoloq Könül İsmayılova “Bakı-Xəbər”ə şərhində bildirdi ki, istənilən bir şəxs ümumi əxlaqi dəyərlərə zidd hərəkət edirsə, həmin adam mütləq cəzalandırılmalıdır: “Sosial şəbəkələr insanlar arasında müzakirə, ünsiyyət üçün geniş imkanlar yaradır. Araşdırmalar zamanı məlum olur ki, müsbət örnəklərələ yanaşı, sosial şəbəkələrdə, o cümlədən “Tik-Tok”da neqativ, cəmiyyətin mənəvi-əxlaqi sferasına zərər vuran, aşınmaya səbəb olan görüntülər də yayımlanır. Bu gün “Tik-Tok” adlı platformada əxlaqsızlıq baş alıb gedir. Kim nə gəldi danışır, nə istəyir video formatında yayımlayır. Sevindirici haldır ki, aidiyyəti qurumlar özlərini tiktoker adlandıran şəxslərə nəzarəti artırıb. Övladının yanında canlı yayım açıb əxlaqsız ifadələr işlədən valideyn, təbii ki, həbs olunmalıdır. O valideyn dəfələrlə hüquq-mühafizə orqanlarına çağırılıb, ona qaydalar izah olunub. Ancaq bu şəxs öz bildiyini etməkdə davam edib. Onu da deyim ki, bu tip şəxslər adıçəkilən platformada yetərincədir”.
Psixoloq hesab edir ki, bu cür zərərli amillərlə mübarizə aparılmazsa, illər sonra əxlaqi cəhətdən çox bərbad cəmiyyət görə bilərik: “Problemin qarşısını bu gün almalıyıq ki, milli-mənəvi dəyərlərimiz öz möhkəmliyini saxlasın. Çünki bu dəyərlər nəsildən-nəslə ötürülərək milli kimliyimizi formalaşdırır. Əxlaqi cəhətdən aşınmış bir toplumda gələcəkdə tək bu sahədə deyil, geniş mənada arzuolunmaz vəziyyətlə qarşılaşa bilərik”.
Günel CƏLİLOVA
