Zaqatala sakininin toyuqları ünvanlı yardımdan imtinaya əsas oldu...
Əkrəm Həsənov: “Meyarları daha dəqiq etmək lazımdır ki, insanlar ünvanlı sosial yardımdan məhrum olmasınlar”
Son illər ünvanlı sosial yardım alanların sayı azalıb. Dövlət Statistika Komitəsinin məlumatına görə, 2023-cü ilin yekunlarına əsasən, 64 min ailənin 272 min 300 üzvü ünvanlı sosial yardım alıb. Statistik təhlil göstərir ki, ötən il ünvanlı sosial yardım alanların sayı əvvəlki il ilə müqayisədə 18 min 500 nəfər azalıb. Ünvanlı sosial yardım üçün müraciət edib, lakin rədd cavabı alanlar bildirir ki, mülkiyyətində pay torpağı, köhnə maşın və ya həyətində ev quşları olduğu üçün onlara “yox”cavabı verilir.
Bu günlərdə Zaqatala sakininin ünvanlı sosial yardımla bağlı müraciətinə imtina gəlib. Imtinaya səbəb isə şəxsin həyətində ev quşu olması göstərilib.
Qeyd edək ki, kənd sakinlərinin hər birinin həyətində ev quşlarının olması adi bir haldır.
Belə çıxır ki, aztəminatlı ailənin toyuğu varsa, ancaq o ailənin maddi durumu pis vəziyyətdədirsə həmin ailəyə ünvanlı sosial yardım verilmir.
“Şəxsin adına köhnə bir avtomobil var, yaxud adına pay torpağı var, bu əsasla onlara ünvanlı sosial yardım vermirlər”
Məsələ ilə bağlı fikir bildirən iqtisadçı-ekspert Əkrəm Həsənov “Bakı-Xəbər”ə açıqlamasında qeyd etdi ki, sosial yardım almaq üçün şərtlər yüngülləşdirilməlidir: “Şəxsin adına köhnə bir avtomobil var, yaxud Bakıda yaşayır, rayonda adına pay torpağı var. Bu əsasla onlara ünvanlı sosial yardım vermirlər. Nəzərə almaq lazımdır ki, buraxılış ili çox köhnə olan avtomobil nə dəyər baxımından, nə də ailənin gəlir mənbəyi baxımından xüsusi paya malik ola bilmir. Aztəminatlı ailənin həyətində toyuq-cücənin olmasını bəhanə etmək isə absurddur. Ümumiyyətlə, bu məsələ Dövlət Sosial Müdafiə Fonduna aid olan problem deyil. Çünki onlar qanuna əməl edir və qanunda da ümumi şəkildə yazılıb ki, əmlakı var. Bu işlə məşğul olanlar da məmurdur və buna uyğun davranırlar. Qanunvericilikdə dəqiqləşdirməyə ehtiyac var. Əmlak dedikdə nə başa düşülür? Yəni hansı qiymətdən yuxarı olan əmlak nəzərdə tutulur? Qiyməti 30 mindən yuxarı olan avtomobili varsa, bunu başa düşmək olar. Hətta onu taksi kimi istifadə etmək olar, qazanc mənbəyidir. Yaxud adına elə daşınmaz əmlak var ki, icarəyə verib pul qazanmaq olar. Yoxsa kənddə adına pay torpağının olmasının nə əhəmiyyəti var? Hətta həmin pay torpaqları bir nəfərin adına deyil, bir neçə nəfərin adına olur. Heç bilmir ki, onu necə istifadə etsin. Bu, qanunvericilikdə olan problemdir, dəqiqləşdirməyə ehtiyac var. Meyarları daha dəqiq etmək lazımdır ki, insanlar ünvanlı sosial yardımdan məhrum olmasınlar. Ancaq bugünə olan vəziyyət təəssüf ki, belədir”.
Günel CƏLİLOVA
