Ən çox neftimizi alan da Fransadır, ən qatı düşmənçilik edən də... Nankorluq zirvəsi...
Qulamhüseyn Əlibəyli: “Paris regiona daxil olmaqdan ötrü Ermənistandan bu dərəcədə alət kimi istifadə edir”
Bu ilin yanvar-fevral aylarında Azərbaycan Fransaya 57,4 milyon dollar dəyərində 89,7 min ton xam neft və xam neft məhsulları satıb. Fransaya satılan xam neft ötən ilin eyni dövrü ilə müqayisədə 8% və ya 6,7 min ton artıb. Azərbaycan xam nefti ən baha qiymətə Fransaya satıb. Bir ton xam neft Fransaya 636,3 dollara satılıb. Məlumat üçün qeyd edək ki, bu ilin yanvar-fevral aylarında Azərbaycan xarici ölkələrə 2 milyard 826 milyon 58,6 min dollar dəyərində 4 milyon 595 min 490,1 ton xam neft satıb.
Burada diqqət çəkən məqam odur ki, Azərbaycan Fransaya ən çox xam neft ixrac edən ölkələrdən biridir, amma Paris bunun müqabilində ölkəmizə qarşı ən pis formalarda düşmənçilik edir. Azərbaycanın sağlam yanaşma sərgiləməsi fonunda, onlar mənfur xislətlərini kənara qoymurlar və ölkəmizə qarşı düşmənçiliklərinin dozasını hər keçən gün daha da artırırlar.
“Müqavilənin vaxtı bitibsə, Azərbaycan Fransaya neft ixrac etməkdən imtina edə bilər, amma...”
Sözügedən məsələ ilə bağlı fikirlərini “Bakı-Xəbər”lə bölüşən sabiq millət vəkili, hüquqşünas Qulamhüseyn Əlibəyli hesab edir ki, bu gün dövlətin iqtisadi maraqları ilə siyasi, geosiyasi maraqlarının üst-üstə düşməməsi tamamilə mümkün olan bir hadisədir: “Yəni Fransanın iqtisadi maraqları Azərbaycandan xam neft, neft məhsulları almağı tələb edir. Azərbaycanın da iqtisadi maraqları başqa ölkələrə neft məhsulları satmağı özündə ehtiva edir. Deməyim odur ki, bu, hər iki dövlətin iqtisadi maraqlarına uğundur. Lakin geosiyasi maraqlar fərqlidir. Fransanın Cənubi Qafqazda geosiyasi maraqları regiona daxil olmaqdır. Bu yolla başqa ölkələrdə itirmiş olduğu nüfuzu, mövqeləri Ermənistan vasitəsilə reginda kompensasiya etmək istəyir. Cənubi Qafqaza Gürcüstan, Türkiyə və o cümlədən Azərbaycan vasitəsilə daxil olmaq faktiki olaraq Fransa üçün qeyri-mümkündür. Ona görə də çalışırlar ki, Ermənistan vasitəsilə daxil olsunlar. Çünki Ermənistan bir tərəfdən Rusiyanın təsir dairəsindən çıxmağa, o biri tərəfdən Qərbin təsir dairəsinə keçməyə çalışır. Bir sözlə, öz ağalarını dəyişdirmək istəyir. Belə olan halda, təbii ki, ağalar da öz maraqlarını təmin etməlidilər. Həm geosiyasi, həm də digər maraqlarını təmin etməlidilər. Bunun təminatı ilə bağlı onların digər maraqları da ola bilər. Müqavilənin vaxtı bitibsə, Azərbaycan Fransaya neft ixrac etməkdən imtina edə bilər. Lakin bu, Fransanın maraqlarına nə dərəcədə təsir edəcək və Paris Cənubi Qafqazda buna görə siyasətini dəyişəcəkmi? Hesab edirəm ki, Fransa siyasətini dəyişməyəcək. Gedib başqa dövlətdən neft idxal edəcək. Bu, artıq formaıaşmış bir siyasətdir. O mənada ki, Ermənistanı müdafiə etmək, bu ölkə vasitəsilə bölgəyə daxil olmaq və ermənilərdən maşa kimi istifadə etmək. Paris regiona daxil olmaqdan ötrü Ermənistandan bu dərəcədə alət kimi istifadə edir. Ona görə də biz elə etməliyik ki, bütün körpülər yanmasın. Hətta mümkün olan qədər nefti Fransaya baha qiymətə satmalıyıq. Eyni zamanda geosiyasi maraqlarımızı təmin etmək üçün başqa vasitələrdən də faydalanmalıyıq. Elə etməliyik ki, digər böyük dövlətlər Fransanın regiona daxil olmasına mane olsunlar”.
Vidadi ORDAHALLI
