Bankların istismarçılığı rüsvayçı həddə - borcun tam ödənmə arayışını da satırlar...
Hüseyn Axundov: “Bəzi banklar vətəndaşların bu haqda məlumatlı olmamasından istifadə edib arayışa görə pul tələb edir”
Bankların əksəriyyəti vətəndaşlara verilən kredit tam ödənildikdən sonra borcun bağlanmasına dair arayış üçün əlavə ödəniş tələb edir. Qiymətlər isə 20, 30 və 50 manat arasında dəyişir. Bu isə qanunsuzdur.
Mülki Prosessual Məcəlləyə edilən dəyişikliyə əsasən, banklar istehlak kreditinin bitməsi ilə bağlı vətəndaşdan arayışa görə pul tələb edə bilməz.
“Hansısa bank kredit ödənişinin bitməsi ilə bağlı arayışa görə vətəndaşdan vəsait tələb edərsə bu qanunsuzdur”
Hüquqşunas Hüseyn Axundov baki-xeber.com-a şərhində bildirdi ki, ötən il Mülki Məcəlləyə dəyişiklik edilib. Dəyişikliyə əsasən, istehlak krediti götürən şəxs il ərzində iki dəfə borcun qalığı ilə bağlı yazılı formada arayış ala bilər. Həmçinin, borcun bitməsi ilə də bağlı vətəndaş bankdan arayış ala bilər. Arayış vətəndaşa pulsuz verilir. Bank buna görə vətəndaşdan ödəniş tələb edə bilməz. Hansısa bank kredit ödənişinin bitməsi ilə bağlı arayışa görə vətəndaşdan vəsait tələb edərsə bu qanunsuzdur: “Bəzi banklar vətəndaşların bu haqda məlumatlı olmamasından istifadə edib arayışa görə pul tələb edir. Bu vəziyyətlə üzləşən insanlar aidiyyəti qurumlara müraciət etsinlər. Onu da deyim ki, bank əməkdaşı vətəndaşın kredit tarixçəsinə nəzər yetirsə onun borcu olub-olmamasını öyrənə bilər. Buna görə vətəndaşı əziyyətə salmaq düzgün deyil. Banklar sanki insanları əziyyət vermək, onların pullarını mənimsəmək üçün fəaliyyət göstərir. Yüksək faizlə kredit verdikləri bəs deyilmiş kimi, hələ kreditin bitməsi ilə bağlı arayışa görə pul tələb olunması insafsızlıqdır”.
Günel CƏLİLOVA
