On minlərlə ziyarətçi Nemrutda Günəşin qürubunu izləyir
Türkiyə turistlət üçün hər mövsümdə unudulmaz istirahət və əyləncə vəd edən saysız-hesabsız məkanlara sahibdir.
Geniş düzənliklərə və Fərat çayına panoramik mənzərəyə sahib olan Nemrut dağının zirvəsi Türkiyənin ən gözəl yerlərindən biridir. 2150 metr hündürlüyündəki bu əzəmətli dağı daha da qeyri-adi edən onun Kommagene Krallığına aid abidələri, iki minillik tarixə malik uca əhəngdaşı heykəlləridir. Roma imperiyası ilə uğurla mübarizə aparan və ölümsüzlük axtaran kral Antiox Teos I (e.ə. 69-36) tərəfindən ucaldılmış bu heykəllər antik dövrdən əfsanələrə ilham verib. İndi macəra həvəskarlarının ən məşhur marşrutlarından biri olan Adıyamanın sirli zirvəsi Nemrut ziyarətçiləri valeh edir.
Qədim dünyanın sehrli irsi
1987-ci ildə UNESCO-nun Ümumdünya İrs Siyahısına daxil edilmiş Nemrut dağı dünyanın ən ecazkar zirvələrindən biridir. Nemrut dağı Türkiyənin cənub-şərqi Anadolu bölgəsində, Adıyamanın Kahta rayonunda yerləşən, tarix boyu sivilizasiyalara və mədəniyyətlərə ev sahibliyi edən sönmüş vulkandır. Ölçüsü 8-10 metrə qədər olan nəhəng heykəllər əhəngdaşı bloklarından hazırlanır, bəzilərinin çəkisi doqquz tona çatır. Təxminən iki min il yaşı olan heykəllər Antiox tərəfindən öz dəfn otağının üstündəki bütün ərazi ətrafında qruplaşdırılmış dəfn ziyarətgahında ucaldılıb.
Nemrut dağının zirvəsinə gedən yolda ziyarətçiləri şərq, şimal və qərb istiqamətli qrup heykəllər qarşılayır. Şimal tumulusu tam tamamlanmasa da, şərq və qərbdəki terraslar qorunub saxlanılıb.
Şərq terasında Tanrılar Qalereyası, Əcdadlar Qalereyası və qurbangah yerləşir.
Günəşin doğması və batması
Bu zirvə planetin ən gözəl yerlərindən biridir. Günəşin doğuşunu və qürubunu seyr etmək üçün bənzərsiz bir seçimdir. Hər il on minlərlə ziyarətçi sonsuz üfüq xəttinə qarşı qızıl, tünd qırmızı və göy çalarların bir-birinə qarışmasını müşahidə etmək üçün zirvəyə qalxır. Fəsildən asılı olmayaraq, Nemrut dağının zirvəsi əksər hallarda soyuq olur.
Nemrut dağını ziyarət etmək insan həyatında unikal təcrübələrdən biri olsa da, Adıyamanın başqa cazibəsi də var. Bölgənin unikal təbii və mədəni irsi müstəsna səyahət məkanı təqdim edir. Bölgədəki tarixi yerlər arasında Karakuş höyük, Cendere körpüsü və Arsemeya antik şəhəri də mütləq görülməli yerlər arasındadır. Digər əhəmiyyətli bölgə Fərat çayının qərb sahilindəki Gerger qalası, Kommagene Krallığının beş əsas şəhərindən biri olan və Adıyaman şəhər mərkəzinin şimalında yerləşən qədim Perre şəhəridir. Adıyaman həmçinin özünəməxsus kulinariya mədəniyyətinə görə Türkiyənin ən çox seçilən qastronomik məkanlarından biridir.
Baki-xeber.com
