Dünya xristian həmrəyçiləri - “Ermənistana qorxu altında kapitulyasiya sazişi imzaladırlar”...
Elşad Musayev: “Bunlar sırf xristian təəssübkeşliyindən çıxış edib açıq-aşkar ədalətsiz mövqe sərgiləyirlər”
“Beynəlxalq Xristian Həmrəyliyi” hüquq müdafiə təşkilatı ABŞ prezidenti Co Baydeni BMT-də Bakını ermənilərin Qarabağa qaytarılmasını və erməni məhbusların azad edilməsini təmin etmək öhdəliyi qoyan qətnamənin qəbuluna nail olmağa çağırıb.
Müraciətdə məsələyə dini don geyindirilməsi və digər qərəzli məqamlar öz əksini tapıb.
Xüsusilə diqqəti çəkən məqam odur ki, Ermənistana təzyiqlərdən bəhs edilir. Qeyd edilir ki, Azərbaycan və Türkiyənin təzyiqləri altında bu gün Ermənistan hakimiyyəti həyəcan, təlaş içində bəyanatlar verib qorxudan kapitulyasiya sazişini imzalamağa hazır olduğunu bildirir. Guya Azərbaycanla Türkiyə Ermənistanı qorxu altında saxladıqlarına görə rəsmi İrəvan kapitulyasiya sazişini imzalamağa hazır olduğunu bildirib. Halbuki, sülh sazişinin imzalanması Ermənistanın özü üçün həyati əhəmiyyətə malikdir, amma dünyada elə bir rəy yaradırlar ki, guya Azərbaycanla Türkiyə təzyiqlə Ermənistanı buna məcbur etmək istəyir. Belə baxanda, Ermənistan sülh sazişi imzalamasa belə, bu, Azərbaycan üçün problem yaratmır. Sülh sazişi vəziyətdən çıxmaq üçün daha çox Ermənistana lazımdır.
“Əslində orada deyilənlərin heç bir əsası yoxdur və sülh sazişi bütün regiona lazımdır”
Sözügedən məsələni “Bakı-Xəbər”ə şərh edən Böyük Azərbaycan Partiyasının sədri Elşad Musayev hesab edir ki, orada əksini tapan məqamlar tamamilə qərəzlidir: “Əvvəla, Ermənistan 3 il əvvəl müharibədə ağır məğlubiyyətə uğradıqdan sonra Azərbaycan və Türkiyə ilə normal münasibətlər qurmaq əvəzinə, yenidən konfrontasiya yolu seçdi. Həmçinin Ermənistanın arxasında duran qüvvələr də bu məğlubiyyəti həzm edə bilmədilər. Artıq müharibədən sonra növbəti mərhələ başlayıb. İnformasiya, diplomatiya, ideoloji sahədə qarşılıqlı mübarizə güclənib. Burda da ermənilərin arxasında dayanan çoxsaylı qüvvələr olduğu üçün hər cür təxribata gedirlər. Ona görə də biz belə hallara hər zaman hazır olmalıyıq. Bir sıra ölkələr, QHT-lər var ki, bəzən buna dini çalar verməyə cəhd edirlər. Bunlar sırf xristian təəssübkeşliyindən çıxış edib açıq-aşkar ədalətsiz mövqe sərgiləyirlər. Əslində isə orada deyilənlərin heç bir əsası yoxdur və sülh sazişi bütün regiona lazımdır. Ən çox da Ermənistana. Ona görə ki, sülh olmadan, kommunikasiya xətləri açılmadan Ermənistanın stabil inkişafı mümkünsüzdür. Ermənistan hakimiyyəti gərək sülhdə daha çox maraqlı olsun. Hesab edirəm ki, müxtəlif səviyyələrdə bundan sonra da Azərbaycana qarşı ədalətsiz mövqelər olacaq. Bu kampaniyada bunların bir məqsədi də odur ki, Azərbaycan işğal altında olan 8 kəndini geri almasın. Bununla bağlı qəti tələblərlə çıxış etməsin. Ancaq nə etsələr də məqsədlərinə çata bilməyəcəklər. Azərbaycan qarşıya qoyulan digər hədəflərə də çatacaq. Yəni belə təzyiqlər bizi çəkindirməyəcək”.
Vidadi ORDAHALLI
