Avroittifaq erməni məsələsini Ukrayna və Qəzza ilə bir sıraya qoydu...
Tofiq Abbasov: “Onlar yenidən bizim bölgəni müharibəyə qərq etmək istəyirlər”
“Ermənistanın ərazi bütövlüyü və suverenliyinə dəstəyi ifadə etməyin vaxtı çatıb”. Bunu Fransanın xarici işlər naziri Ketrin Kolonna Aİ xarici işlər nazirlərinin Brüsseldə keçirilən görüşü çərçivəsində Ermənistan və Azərbaycan ətrafında vəziyyətlə bağlı qarşıda duran müzakirələrlə əlaqəli jurnalistlərlə söhbətində deyib.
Daha sonra o bildirib:
"Bu Xarici Əlaqələr Şurasının Avropa Missiyasını gücləndirməklə və Avropa Sülh Fondu vasitəsilə Ermənistanın suverenliyi və ərazi bütövlüyünü dəstəklədiyini bir daha təsdiqləməsi vacibdir. Bunu etmək üçün vaxt yetişib", - fransalı diplomat bildirib.
Öz növbəsində Almaniyanın xarici işlər naziri Annalena Berbok Ermənistan və Azərbaycan arasında sülh prosesinə dəstək üçün Avropanın səylərinin artırılmasının zəruriliyini bəyan edib. Onun sözlərinə görə, Avropa Platforması regionda real təhlükəsizlik, etimad və sülhün tərəfdarıdır.
Qeyd edək ki, Aİ xarici işlər nazirlərinin Brüsseldə son iclasının gündəliyində Qəzza ətrafındakı vəziyyət, Ukrayna və Ermənistanla Azərbaycan arasında münasibətlərin müzakirəsi olub.
Avroittifaqın Azərbaycan-Ermənistan münasibətlərini Ukrayna, Qəzzada gedən proseslərlə eyniləşdirməsi nədən xəbər verir?
Siyasi şərhçi Tofiq Abbasov “Bakı-Xəbər”ə açıqlamasında bildirdi ki, Avropa İttifaqı Amerika ilə birlikdə bu proseslərdə çox təhlükəli, təhrikedici bir mövqe tutur: “Onların gözəl məlumatları var ki, bizim bölgədə baş verənlər nədən ibarətdir, hansı qüvvə, hansı ölkə hansı tərəfdədir. Kim işıqlı, kim qaranlıq tərəfdədir bəllidir. Təbii ki, Azərbaycan işıqlı tərəfdədir. Bizim şəffaf fikirlərimiz, planlarımız ondan xəbər verir ki, post-müharibə şəraitində biz artıq qarşıdurma amilini arxa plana keçiririk. Hətta istisna edirik. Çünki Ermənistan əgər bölgəyə qayıdırsa, öz bacarığını göstərmək istəyirsə, bu başqa məsələ. Azərbaycan ona kömək etmək istəyir. Azərbaycan əlini uzatmaq istəyir ki, gəlin birlikdə yeni dövrə başlayaq, müharibəni tarixin arxivinə verək. Amma bunu istəməyən Ermənistandı. Mən elə başa düşürəm ki, tək narazı olan Ermənistan yox, həm də onun arxasında duran qüvvələrdi. O qüvvələr ki, bu gün Fələstin-İsrail məsələsini, Ukrayna böhranını dilə gətirərək Qarabağdakı vəziyyəti də ona bənd edirlər. Onlar yenidən bizim bölgəni müharibəyə qərq etmək istəyirlər. Əlbəttə, onlar hazırda çox təlatüm yaşayırlar. Azərbaycan qələbəsini özü əldə etdi, dünyanı mat qoydu. Bu tək Ermənistanın məğlubiyyəti deyil, onun arxasında duran Fransanın, Amerikanın, digər ölkələrin məğlubiyyətidir. Onların niyyəti indi yenidən müharibə yaratmaqdan ibarətdir. Çünki Ermənistanı silahlandırırlar. Ermənistanın ağlı olsa, onların fətvasına getməz. Ona görə də, bu proseslərdə məqsəd ondan ibarətdir ki, Azərbaycanla Ermənistan arasında yeni bir münaqişəli vəziyyət formalaşdırsınlar və ekskalasiyanı gündəmə gətirsinlər. Əgər sülh sazişi imzalanarsa, onların bazarı bağlanacaq. Onlar da bunu istəmir. Digər tərəfdən də, Qafqaz kimi strateji bölgədə münaqişəli vəziyyət ona görə lazımdır ki, burada hərcmərclik olsun, o adla da özlərini bu bölgəyə yerləşdirsinlər. Təsadüfi deyil ki, Fransa hazırda çox israrlıdır öz hərbi kontingentini bölgəyə göndərməkdə. Ermənistana Azərbaycan tərəfdən heç bir təhdid yoxdur. Hikmət Hacıyev prezidentin dili ilə dedi ki, Zəngəzur dəhlizi məsələsi artıq bizim üçün önəmli deyil. Biz İranla razılığa gəlmişik və marşrutu çəkmişik. O marşurut 8 km Ermənistandan keçəcək olan yoldan uzundu, artıq orada körpü var. Bu problemlərin hamısının yükünü özümüz daşıyacağıq. Odur ki, ciddi cəhdlə sabitliyin yaranmaması üçün çalışırlar və sabitliyi özləri üçün təhdid sayırlar. Mən düşünürəm ki, onlar yanılırlar. Bu təhlükəli planların reallaşmaq şansı yoxdur. Biz özümüz buranın müqəddəratını həll edəcəyik. Təsadufi deyil ki, Tehranda xarici işlər nazirləri səviyyəsində 3+3 formatında olan görüşü əlverişsiz hesab etdilər. Nəticədə görürük ki, bu proseslərdə Qərbin niyyəti çox çirkindi. Biz bunların reallaşmasına imkan verməyəcəyik”.
Məhəmmədəli QƏRİBLİ
