Elnur Kəlbizadə: "Azərbaycan Prezidentinin fikirləri həm tarixi, həm də beynəlxalq hüquq baxımından tamamilə əsaslıdır"
"Azərbaycan hazırda birgəyaşayış və geriqayıtma hüququ ilə əlaqədar aydın və şəffaf proqramı təqdim edib". Bu barədə Prezident İlham Əliyev ATƏT Parlament Assambleyasının prezidenti Pia Kaumanı qəbul edərkən bildirib.
Prezident Əliyev bildirib ki, Azərbaycan hazırda birgəyaşayış və geriqayıtma hüququ ilə əlaqədar aydın və şəffaf proqramı təqdim etsə də, azərbaycanlıların Ermənistana geri qayıdışı ilə bağlı geriqayıtma hüququnu Ermənistan inkar edir və bununla əlaqədar olaraq hər hansı bir baxış ortaya qoymayıb.
Prezident Əliyevin irəli sürdüyü tutarlı fikirlərin, əsaslandırılmış addımların, bəyanatların qarşısında Paşinyanın hər zaman geri çəkildiyi məlumdur. Əliyev ATƏT-in Parlament Assambleyasının prezidentinə açıq şəkildə deyib ki, azərbaycanlılar vaxtilə deportasiya edildikləri Ermənistana qayıtmalıdır, amma Ermənistan onların bu hüququnu əsassız olaraq inkar edir, qəbul etmək istəmir. Azərbaycan Prezidenti birgəyaşayış və geriqayıtma konsepsiyasını irəli sürür, bu, beynəlxalq hüquq pronsiplərinə söykənən kifayət qədər mükəmməl bir təşəbbüsdür, addımdır. Amma təəssüf ki, Ermənistanın baş naziri həmişəki kimi yenə də Azərbaycan Prezidentinin xoşməramlı və hümanist təşəbbüslərini təhrif etməklə məşğul olur. Paşinyan VI Paris Sülh Forumundakı çıxışı zamanı yenə də əlinə keçən tribunadan istifadə edərək Azərbaycanın xoş niyyətinə qarşı çıxış edib. İddia edib ki, guya Azərbaycan ermənilərə qarşı "etnik təmizləmə" planı "həyata keçirdikdən" sonra Ermənistan Respublikasını Qərbi Azərbaycan adlandırmağa başlayıb. Paşinyan yalandan deyib ki, guya bu, "Ermənistan Respublikasına qarşı yeni müharibə hazırlamaq konsepsiyası"dır.
Ermənistanın baş nazirinin yalanlarının məqsədi aydındır: mümkün qədər Qərbi azərbaycanlıların geriqayıdışına mane olmaq və sülh müqaviləsinin imzalanmasını yubatmaq. Paşinyan neçə aydır ki, Qərbi azərbaycanlılarının geriqayıdışına qarşı çıxır, onların qayıdışının təmin edilməməsi üşün müxtəlif bəhanələr uydurur, yalanlar danışır. Azərbaycan Prezidenti isə, həmişə olduğu kimi, yenə də faktlara, beynəlxalq hüquqa söykənib humanist təşəbbüslər irəli sürür.
"Paşinyanın bu növbəti yalanı Ermənistanın regionda ədalətli sülhün əldə olunmasına mane olmaq cəhdlərinin növbəti təzahürüdür"
AMEA-nın Qafqazşünaslıq İnstitutunun Ermənişünaslıq şöbəsinin müdiri Elnur Kəlbizadə "Bakı-Xəbər"ə şərhində bildirdi ki, Azərbaycan öz tarixi ata-baba yurdları olan Qərbi Azərbaycandan müxtəlif dövrlərdə köçməyə məcbur edilmiş soydaşlarımızın geri qayıdışı ilə bağlı tələblər irəli sürməkdə tam olaraq haqlıdır: "Azərbaycan Prezidentinin fikirləri həm tarixi, həm də beynəlxalq hüquq baxımından tamamilə əsaslıdır. Bu təşəbbüs bütün mənalarda əhəmiyyətlidir. Yəni bu məsələnin, təşəbbüsün həm tarixi, həm də beynəlxalq hüquqi əsasları var. Ermənistanın isə birtərəfli şəkildə ermənilərin Azərbaycan ərazilərinə qayıtması ilə bağlı tələblər irəli sürməsi, bununla paralel olaraq azərbaycanlıların öz doğma yurdlarına qayıtması məsələsini inkar etməsi, onları ümumiyyətlə qəbul etmək istəməməsi, beynəlxalq ictimai rəydə bunu "Azərbaycanın Ermənistana ərazi iddiaları" kimi qələmə verməsi kökündən yanlışdır. Paşinyanın bu növbəti yalanı Ermənistanın regionda ədalətli sülhün əldə olunmasına mane olmaq cəhdlərinin növbəti təzahürüdür. Əgər Azərbaycanın Ermənistana ərazi iddiaları irəli sürmək niyyəti olsa, Azərbaycan bu işi həyata keçirmək istəsə həm Ermənistan, həm də onun havadarları əmin olsunlar ki, dövlətimizin əlində bunu irəli sürmək üçün daha tutarlı faktlar da mövcuddur. 1918-ci ildən günümüzə qədər keçən tarixi dövrə diqqət yetirsək Ermənistanın hansı formada, hansı qanunsuz üsullarla bugünkü ərazilərə sahib olduğu, Azərbaycandan hansı dövrlərdə hansı ərazilərin qeyri-qanunu alınaraq Ermənistana verildiyi arxiv sənədlərində mövcuddur. Bu gün Ermənistanın öz paytaxtı elan etdiyi İrəvanın hansı şərtlər altında Ermənistana güzəştə gedildiyi, verildiyi tarixi sənədlərdə əksini tapıb"-deyə E.Kəlbizadə qeyd etdi.
Şöbə müdirinin qeyd etdiyinə görə, Ermənistan və havadarları əmin olsunlar ki, əgər Azərbaycanın bu dövlətin əraziləri ilə bağlı iddiası olardısa bunu əsaslandımaq üçün əlimizdə kifayət qədər dəlillər var. "Qərbi azərbaycanlıların geriyə, öz ata-baba yurdlarına qayıtması məsələsi isə ərazi məsələsindən daha çox hüquq və təhlükəsizlik məsələsidir. Onların öz doğma vətənlərində yaşamaq hüquqları təmin edilməlidir, təhlükəsizliklərinə təminat verilməlidir. Bu olmadan Azərbaycan ərazisinə hansısa ermənilərin qayıtması, yaxud köçməsi mümkün deyil. Bu proses həyata keçiriləcəksə, bu iki proses paralel şəkildə gerçəkləşdirilməlidir. Əgər ermənilər və onların havadarları iddia edirlərsə ermənilərin Qarabağa qayıtmaq hüququ var, Azərbaycan bunu inkar etmir. Amma eyni zamanda ermənilərdən daha əvvəl ata-baba yurdlarını, doğma el-obalarını tərk etmiş azərbaycanlılar var. Əvvəlcə Qərbi azərbaycanlıların hüququ təmin edilməlidir. Bundan sonra Azərbaycan tərəfi ermənilərin qayıdıb-qayıtmaması ilə bağlı qərar qəbul edə bilər" - deyə E.Kəlbizadə əlavə etdi.
İradə SARIYEVA
