Sahil Babayev ehtiyac meyarının ləğvi ilə gündəm oldu...
Xalid Kərimli: “Ehtiyac meyarı anlayışından bugünə qədər ünvanlı sosial yardımın təyin olunmasında istifadə olunub”
Əmək və Əhalinin Sosial Müdafiəsi naziri Sahil Babayev Milli Məclis komitələrinin birgə iclasında ehtiyac meyarının ləğvi ilə bağlı fikirlərini bölüşüb:
“Arzumuz budur ki, yaxın gələcəkdə ehtiyac meyarı anlayışını ləğv edək. Amma bu, bir mexanizmdir. Hələ ki, qarşımızda böyük çağırışlar var, bunu alət olaraq saxlayırıq. Elə bir il ola bilər ki, o çağırışlar bizə mane olar, diversifikasiya etmək ehtiyacımız yarana bilər. Amma hökumətin niyyəti də yaxın müddət ərzində bu prosesi tam bir instituta çevirməkdən ibarətdir”.
Maraqlıdır, ehtiyac meyarının ləğv olunmasının cəmiyyətə nə kimi xeyri və ziyanı olacaq?
“2023-cü il yanvar ayının 1-dən yaşayış minimumu ilə ehtiyac meyarının eyniləşdirilərək 246 manat edilməsi ehtiyac meyarının qalmasını vacib etmir”
İqtisadçı ekspert Xalid Kərimli “Bakı-Xəbər”ə açıqlamasında qeyd etdi ki, ehtiyac meyarı anlayışından bugünə qədər ünvanlı sosial yardımın təyin olunmasında istifadə olunub: “Yəni vətəndaşın ehtiyac meyarı müəyyənləşirdi və onun rəsmi gəliri, bütün aktivlərdən ortaya çıxan gəlirləri ehtiyac meyarı ilə müqayisə olunurdu. Məsələn, beş nəfərlik ailəyə görə minimal orta aylıq gəlir tələbatı çıxarılırdı və bu da ehtiyac meyarı demək idi. Daha sonra isə ailənin gəlirlərinə baxılırdı. Azərbaycanın hazırkı ehtiyac meyarı 246 manatdır. Bu 246 manat ailə üzvlərinin sayına, yəni beşə vurulurdu və nəticədə bu məbləğ 1230 manat olurdu. Bundan sonra ailənin həm rəsmi, həm də əlavə gəlirləri araşdırılıb toplanırdı. Ailənin ümumi gəlirləri 1000 manat edirsə, qalan 230 manatı da hökumət onlara ödəyirdi. Çünki həmin beş nəfərlik ailənin yaşaya bilməsi üçün minimum 1230 manata ehtiyacı var”.
Ekspert hesab edir ki, 2023-cü il yanvar ayının 1-dən yaşayış minimumu ilə ehtiyac meyarının eyniləşdirilərək 246 manat edilməsi ehtiyac meyarının qalmasını vacib etmir: “Nəzərdə tutulan məbləğlər eyni olduğuna görə artıq sosial yardım hesablanarkən yaşayış minimumuna əsaslanılacaq. Bununla bağlı qanunda da müəyyən düzəlişlər olunacaq”.
Günel CƏLİLOVA
