Netanyahu “Ruzvelt və Buş xatırlatması” ilə nə demək istədi - “siz susun”...
Arzuxan Əlizadə: “Birləşmiş Ştatların proseslərdən artıq narahat olmağa başlaması Netanyahunu məyus edib”
Qəzzada hərbi əməliyyatları bir aydan çoxdur davam etdirən İsrailin baş naziri Benyamin Netanyahu İsrailə qarşı sanksiyalara hazırlaşan ərəb ölkələrinin liderlərini təhdid edib.
CNN-in canlı yayımında sualları cavablandıran Netanyahu deyib: “Ərəb liderlərinə deyirəm. Hakimiyyətinizi və maraqlarınızı qorumaq istəyirsinizsə, edə biləcəyiniz yalnız bir şey var. O, səsinizi kəsməkdir”.
CNN müxbiri “Niyə 7 oktyabrın məsuliyyətini indi üzərinizə götürmürsünüz” sualına Netanyahu “Bu sual Pearl Harbordan sonra Franklin Ruzveltə verilibmi? 11 sentyabrdan sonra Buşa verilib?” - deyə cavab verib.
Maraqlıdır, Netanyahu bu çür sərt açıqlamalar verməklə nə demək istədi?
“Hətta İsrail vətəndaşları belə, xüsusən də girovların yaxınları əməliyatların dayandırılması tələbləri ilə çıxış edirlər”
Sözügedən məsələ ilə bağlı “Bakı-Xəbər”ə açıqlama verən AMİP sədri Arzuxan Əlizadə Netanyahunun bu cür mövqe sərgiləməsini bir sıra amillərlə əlaqələndirdi: “Həqiqətən də həmin müsahibədə Netanyahu emosiyalarını cilovlaya bilmədi və bu, dünyada geniş müzakirələrə səbəb oldu. Netanyahunun belə emosional mövqedən çıxış etməsinin bir neçə səbəbi var. Məsələ ondadır ki, İsrailin HƏMAS-a qarşı əməliyyatlarda Qəzzada bonbardmanları genişləndirməsi və bu səbəbdən çoxsaylı mükli şəxslərin öldürülməsi dünyada ciddi etirazla qarşılanır. Hətta bir sıra Qərb ölkələri bunu pisləyən bəyanatlarla çıxış edirlər. Netanyahu bunu gözləmirdi. O hesab edirdi ki, ilk dövrlərdə kollektiv Qərbin İsrailə verdiyi dəstək davamlı olacaq və nə istəsə edə bilər. Ancaq mülki şəxslərin öldürülməsi və kütləvi dağıntılar bəzi Qərb ölkələrinin də narazılığına səbəb oldu. Fransa və bəzi Qərb ölkələrinin əməliyyatların dayandırılması çağırışları ilə çıxış etməsi Netanyahunu ciddi narahat edir. Baxın, İsrailin ən yaxın müttəfiqi Birləşmiş Ştatlar belə atəşkəs çağırışı edir. Netanyahonun məlum müqaisələri uğurlu deyil. 7 oktyabrda baş verən terror hücumunu Yaponiyanın Pearl Harbora qəfil zərbə endirmələri ilə müqayisə etmək doğru deyil. Bunların aralarında böyük fərqlər var. Netanyahu hesab edir ki, İsrail Qəzzada HƏMAS-ın axırına çıxana qədər Qərb onu dəstəkləməli idi. Xüsusən də Birləşmiş Ştatların proseslərdən artıq narahat olmağa başlaması Netanyahunu məyus edib. Məsələ ondadır ki, əməliyyatların sürəti İsraili qane etmir. Onlar hesab edirdilər ki, sürətli şəkildə öz məqsədlərinə çata biləcəklər. Ancaq Qəzzada olan çoxsaylı mürəkkəb tunellər, üzləşdikləri müqavimət və çağırışlara rəğmən mülki əhalinin böyük hissəsinin oranı tərk etməməsi, qarşıya qoyulan məqsədlərə çatmağa imkan vermir. Ən başlıcası, əməliyyatlar uzandıqca, İsrailə həm çağırışlar, həm də təzyiqlər artır. Hətta İsrail vətəndaşları belə, xüsusən də girovların yaxınları əməliyyatların dayandırılması tələbləri ilə çıxış edirlər. Bütün bunların üst-üstə düşməsi ona gətirib çıxardı ki, Netanyahu emosiyalarına hakim ola bilmədi”.
Vidadi ORDAHALLI
