6 ildə 4-cü baş nazir, kim olsa da təki Le Pen prezident olmasın - Makronun daxili siyasəti də tam iflas etdi...
Qulamhüseyn Əlibəyli: “Onun məqsədi öz nümayəndəsini prezident seçmək və millətçi Le Penin önünü kəsməkdir”
Məlum olduğu kimi, Fransada hökumət böhranı yaranıb. Baş nazir Elizabet Born istefa verib. Prezident Emmanuel Makron 34 yaşlı maarif naziri Qabriel Attalı hökumət başçısı təyin edib.
Makronun prezident səlahiyyəti müddəti 3 ildən sonra başa çatır. Onun hakimiyyətdə olduğu 7 il ərzində Elizabet Born istefa vermiş 4-cü baş nazirdir. Bu, həm də o deməkdir ki, Emmanuel Makron ölkədə artan etirazlardan, siyasi təzyiqlərdən və hakimiyyəti başqa təhlükələrdən qorumaq üçün hökumət başçılarını tez-tez dəyişir. 7 ildə 4 baş nazir istefası hakimiyyət daxilində və ölkədə siyasi baxımdan sabitliyin olmamasının göstəricisi də sayıla bilər.
Burada diqqəti çəkən məqam odur ki, Makronon bütün hədəfi Le Penin prezident olmasının qarşısını almaqdır. Qərb mediasının qənaətinə görə, bu ilin mayında Avropa Parlamentinə seçkilər keçiriləcək. Bu siyasi kampaniyada Milli İttifaq Partiyasının sədri Marin Le Penin qalib gələcəyi ehtimalı daha çoxdur. Makron "Miqrasiya haqqında" qanunu qəbul etdirməklə seçicilərin, xüsusilə miqrantları dəstəkləyən təbəqənin də səsini qazanmağa səy göstərir. Üstəlik, Makron 2027-ci ildə keçiriləcək prezident seçkilərində yenidən namizədliyini irəli sürə bilməsə də, onun hökumətinin dirçəldilməsi Le Penin prezident olmasının qarşısını almaq üçün həlledici hesab olunur.
“Yeni baş nazir Qabriel Attalın homoseksualist olması müəyyən problem yarada bilər, amma...”
Məsələ ilə bağlı “Bakı-Xəbər”ə açıqlama verən sabiq millət vəkili, hüquqşünas Qulamhüseyn Əlibəyli hesab edir ki, bütün bunlar Fransada böhranın kəskinləşməsinin göstəricisidir: “Nəzərə almaq lazımdır ki, Fransa yarımprezidentli respublika hesab olunur. Orada dövlət siyasəti əsasən prezident tərəfindən müəyyənəşdirilir və həyata keçirilir. Baş nazir isə prezidentin müəyyən etdiyi siyasəti birbaşa olaraq icra etməklə məşğuldur. Makronun son dövrlər apardığı siyasət əsasən ziddiyyətli olduğu üçün nüfuzu xeyli aşağı düşüb. Ölkə daxilində Makrona olan nifrət artıb. Makron Azərbaycanla bağlı faktiki olaraq düşmənçiıik siyasəti yeridir. O cümlədən, digər ölkələrə münasibətdə ziddiyətli siyasət yeritdiyi üçün problemlər yaranır və nəticədə Makron vəziyyətdən çıxmaq üçün baş nazirləri qurban verir. Onun son qərarı da bununla bağlıdır. Fransa Konstitusiyasına görə, bir nəfər 2 dəfədən artıq prezident ola bilməz. Ona görə də Makron indidən müəyyən manevrlər edir və növbəti seçkiyə hazırlaşır. Onun məqsədi öz nümayəndəsini prezident seçmək və millətçi Le Penin önünü kəsməkdir. Düzdür, Fransa parlamentində Makronun tərəfdarları çoxdur və onlar üstünlük təşkil edirlər. Ancaq üç ildən sonra vəziyyət necə olacaq, ölkənin digər vilayətlərində hansı proseslərin gedəcəyini indidən demək olmaz. Makron çalışır ki, Avropa Parlamentinə mayda keçirilən seçkilərdə partiyası uğur qazansın və bu, sonrakı ölkədaxili proseslərə öz təsirini göstərsin. Növbəti prezidentliyə kimi hazırlayacağını indidən demək çətindir. Çünki hələ 3 il var. Lakin Makron fərqindədir ki, ölkədə nüfuzları xeyli aşağı düşüb və reytinqi aşağıya doğru gedir. Düzdür, yeni baş nazir Qabriel Attalın homoseksualist olması müəyyən problem yarada bilər, amma bu, Fransa üçün o qədər də ciddi problem deyil. Baxmayaraq ki, başqa ölkələrdə bənzər hal olsaydı, bu, böyük qalmaqala səbəb olardı. Vaxtilə Fransada bir sıra dövlət başçıları indiki baş nazirin oriyentasiyasına uyğun olublar. Ona görə də bunun fransızlar üçün elə bir əhəmiyyəti yoxdur”.
Vidadi ORDAHALLI
