İrəvan Kiyev kimi müqavimət göstərə bilməyəcək...

Rusiya səfiri Sergey Kopırkin Ermənistanın İctimai Televiziyasına müsahibəsi zamanı səsləndirdiyi fikirlər, gözlənildiyi kimi, İrəvanda ciddi ajiotaj yaradıb. Kopırkin qeyd edib ki, Nikol Paşinyanın İrəvanın xarici siyasət vektorunu dəyişmədiyinə dair vədlərinə baxmayaraq, Rusiya bu sahənin ciddi şəkildə korrektə olunduğunu və hətta yenidən formalaşdırıldığını görür: 

“Qərbin məqsədi, istər Cənubi Qafqaz, istərsə də digər regionlar olsun, bütün cəbhələrdə Rusiya ilə mübarizə aparmaqdır. Biz Ermənistanın müstəqil dövlət olduğunu bilirik və öz siyasətini müəyyən etmək hüququna malik olduğunu anlayarıq. Buna görə Ermənistanı hansısa xarici siyasət vektorunu dəyişməkdə suçlamırıq. Lakin Qərbin Rusiya ilə qarşıdurmasını nəzərə alsaq, onun narahatlığı normaldır. Amma Moskva Ermənistana strateji tərəfdaş və müttəfiq kimi baxmaqda davam edir”

Rusiya səfirinin bu açıqlamaları fonunda Ermənistanın “armenianreport” portalı yazır ki, əslində, Kremldən İrəvana növbətə xəbərdarlıq gəlir: “Rusiyanın Ermənistandakı fövqəladə və səlahiyyətli səfiri Sergey Kopırkinin müsahibəsində səsləndirdiklərini diqqətlə dəyərləndirməliyik. Çünki onun dediklərinin hamısı Kremlin ölkəmizlə bağlı siyasətinin bariz əksidir. Kreml isə ölkəmizin rəhbərliyinin siyasətindən narazılığını gizlətmir. Onlar hesab edirlər ki, Ermənistan “Qərblə flört edir”. “Rusiya Qərblə münasibətlərdəki tendensiyaları ikiqat ehtiyatla izləyir. Təbii ki, biz buna heç bir şəkildə qarşı çıxa bilmərik, biz qarşıdurma yaratmırıq və siyasəti nə bizimlə, nə də bizə qarşı hesab edirik”, - Kopırkin bildirib. Və bu, tamamilə aşkar, zəif gizli bir təhlükə idi. Bunun yalnız bir təsdiqini verəcəyik. “Təəssüf ki, rəsmi İrəvan qərblilərin təlqininə uyaraq öz xarici siyasət xəttini yenidən formatlamağa çalışır. O, Moskva ilə zamanın sınağından çıxmış ittifaqı, hətta Qərbdən konkret yardım üçün deyil, yalnız qeyri-müəyyən vədlər üçün dəyişir”, - Rusiyanın xarici işlər naziri Sergey Lavrov 2023-cü ilin yekunları üzrə TASS-a eksklüziv müsahibəsində bildirib. Tamamilə aydındır ki, səfir Kopırkin Rusiya XİN rəhbərinin fikrini, sadəcə olaraq, davam etdirib. O, praktiki olaraq açıq şəkildə ölkəmizin rəhbərliyini müstəqil xarici siyasət yürütməkdən əl çəkməyə və demokratik Qərblə yaxınlaşmamağa çağırır. Rusiya bizim milli maraqlarımıza əhəmiyyət vermir. Orada başqa ölçüdə yaşayırlar. Səfir Kopırkinin danışdığı da bunu göstərir. Bəli, Kreml hesab edir ki, Qərb Rusiyaya müharibə elan edib. Aydındır ki, reallıqda hər şey tamam fərqlidir. Əslində, rus xalqının yad torpaqlardakı müharibələrə, başqa ölkələrin sakinlərinin qanına və göz yaşlarına olan əbədi ehtiyacını ödəyən məhz Rusiya prezidenti Vladimir Putindir. O, yenidən SSRİ-ni yaratmağı arzulayır və əslində bunu gizlətmir. İstifadəsinə hazır olduğu üsulları da gizlətmir. Və bütün dünya yenidən Rusiyanın öz planlarını həyata keçirmək üçün nə etməyə hazır olduğunun yeni sübutunu gördü. O, Ukraynaya misli görünməmiş bir qəddarlıq və güc hücumu etdi. “Kiyev, Lvov, Odessa, Dnepr, Xarkov, Zaporojye və digər şəhərlərdə doğum evi, təhsil müəssisələri, ticarət mərkəzi, çoxmərtəbəli binalar və fərdi yaşayış evləri, ticarət anbarı, avtodayanacaqlar raketlərlə vuruldu”, - deyə Ukrayna prezidenti Vladimir Zelenski kütləvi hava hücumundan zərər çəkmiş şəhər və obyektləri sadalayıb. O bildirib ki, Rusiya arsenalında olan, demək olar ki, hər şeylə Ukraynanı vurub: “Kinjal”lar, S-300-lər, qanadlı raketlər, PUA-lar. “Strateji bombardmançı təyyarələr X-101/X-505-i buraxdılar. Təxminən 110 raket atılıb, onların əksəriyyəti vurulub”, - deyə Zelenski bildirib. Aydındır ki, Rusiya bundan sonra da eyni şəkildə hərəkət edəcək. Şübhəsi olanlar üçün Rusiya Federasiyası Təhlükəsizlik Şurasının sədr müavini Dmitri Medvedyevin dediklərini xatırlamağı təklif edirik. O iddia edir ki, Odessa, Dnepropetrovsk, Xarkov, Nikolaev, Kiyev bir çox başqa müvəqqəti işğal olunmuş şəhərlər kimi Rusiyanın şəhərləridir. Bunu son günlərdə zərbələrin endirildiyi yerlərlə müqayisə edin və hər şey sizə aydın olacaq. Görəcəksiniz ki, Rusiyanın Ukrayna ilə bağlı planları nə qədər aydındır. “Onların hamısı hələ də kağız xəritələrdə və elektron planşetlərdə sarı və mavi rənglərlə qeyd olunub. Xüsusi əməliyyat davam edəcək, onun məqsədi Ukrayna qoşunlarının tərksilahı və hazırkı Ukrayna dövlətinin neonasizm ideologiyasından imtinası olaraq qalacaq”, - D.Medvedyev əlavə edib. Aydındır ki, o, Vladimir Putinin ağzı ilə danışır. Amma S.Lavrov və S.Kopırkinin bəyanatları haqqında da eyni şeyi demək olar. Bəli, hamı bizdən təvazökarlıq və təslim olmağı tələb edir. Əks halda, təbliğatçıların ağzından Ermənistanın Ukraynanın taleyi ilə üzləşəcəyini deyirlər. Bunu istəmirsən? Onda sivilizasiyaya, demokratiyaya doğru addımlar atmaqdan vaz keçin. Rus dünyasını izləyin - zorakılıq, gerilik, hamı ilə düşmənçilik dünyasını. Axı Kremldə, artıq səfir Korkinin dediyi kimi, Rusiyanın yanında olmayan hər kəsin ona qarşı olduğuna inanırlar. Və bu təhlükələri qiymətləndirməmək olmaz”. 

Beləliklə, indi Ermənistanda etiraf edilir ki, Rusiya Ukrayna ssenarisini tezliklə burada da tətbiq edə bilər. Amma Ukraynadan fərqli olaraq, Ermənistan Rusiyaya müqavimət göstərə bilməyəcək.

Tahir TAĞIYEV