İrəvanda “Arsax” separatçılarını “ovlamağa” başlayıblar - kursun arxasında nə gizlənir...
Ceyhun Məmmədov: “Paşinyan bu kimi sərt addımlar atmaqla hakimiyyətini sığortalamağa çalışır”
İrəvanda Bakıda həbsdə olan Qarabağ quldurlarının əks olunduğu plakat təcili yığışdırılıb. Belə ki, Ermənistanın paytaxt küçələrinin birində Bakıda həbsdə olan Xankəndidəki separatçı-terrorçuların fotoları asılıb və çox keçmədən hakimiyyət orqanları bununla bağlı qərar verib.
Rəsmi İrəvan bu addımı təxribat və dövlət əleyhinə addım kimi qiymətləndirib. Ermənistan hakimiyyəti bu cür hərəkətləri sülhə və qarşılqlı etimad mühitinin yaranmasına xələl gətirən addım hesab edib.
Bununla yanaşı, Qarabağdakı keçmiş separatçıların keçmiş lideri Samvel Şahramanyanın korteji İrəvanda polis tərəfindən saxlanılıb. Polis Şahramanyana xəbərdarlıq edib ki, qanuna əsasən, onun kortejdə getmək hüququ yoxdur.
Təbii ki, bütün bunlar Azərbaycanın maraqlarına uyğundur, amma Ermənistanın özündə keçmiş Qarabağ separatçılarına qarşı bu təqib siyasətinin arxasında nə dayanır? Çünki Ermənistan bir tərəfdən revanşist meyllərlə çıxış edir və fürsət düşən kimi, bu iddialarla çıxış edəcək. Bu tərəfdən də Qarabağ separatçılarını təqib edirlər. O baxımdan hazırkı Ermənistan hakimiyyətinin Qarabağ separatçılarına qarşı bu təqib siyasətində konkret siyasi maraqlar nədən ibarətdir?
“Ola bilsin ki, sülh müqaviləsinin imzalanmasını tezləşdirmək istəyirlər”
Sözügedən məsələ ilə bağlı “Bakı-Xəbər”ə açıqlama verən millət vəkili Ceyhun Məmmədov bunu bir sıra amillərlə əlaqələndirdi: “Ermənistan rəsmilərinin Qarabağ separatçılarından narahat olmasının bir sıra ciddi səbəbləri var. Nəzərə almaq lazımdır ki, “Qarabağ klanı”nın Ermənistanda müəyyən təsir imkanları var. Bu kılanı da xaricdə müəyyən dairələr himayə edir. Həmçinin Qarabağ dalğasında separatçılar 1998-ci ildə Ermənistanda hakimiyyəti ələ keçirərək 20 il iqtidarda olublar. Onlar indi də hansısa yolla hakimiyyəti ələ keçirmək istəyirlər. Paşinyan hakimiyyəti bütün bunların fərqində olduğu üçün işini möhkəm tutmağa çalışır. Düzdür, hazırda bir sıra səbəblərdən separatçı tör-töküntülər Ermənistanda mövcud hakimiyyətə təhdid yaradacaq gücdə deyil. Onların erməni cəmiyyətində elə bir güclü sosial bazası yoxdur. Eyni zamanda, Qarabağı könüllü tərk edən erməni sakinlərin sayı elektorata təsir edə biləcək sayda deyil. Nəzərə almaq lazımdır ki, onlar yavaş-yavaş Ermənistanı da tərk edirlər. Bütün bunlara baxmayaraq, Paşinyan bu kimi sərt addımlar atmaqla hakimiyyətini sığortalamağa çalışır. Ona görə də hakimiyyətin başlıca hədəfi yarana biləcək təhdidləri ortadan qaldırmaqdır. Burada ikinci məqsəd odur ki, Azərbaycanla sülh danışıqlarının getdiyi bir vaxtda Paşinyan əlavə gərginliyin yaranmasını istəmir. Ola bilsin ki, bu kimi addımları atmaqla sülh müqaviləsinin imzalanmasını tezləşdirmək istəyirlər. Yəni Azərbaycanla münasibətlər yoluna qoyulsun, ondan sonra Ermənistan daxilindəki problemlər həll edilsin. Hesab edirəm ki, bu amilin də sözügedən məsələdə ciddi rolu və təsirləri var”.
Vidadi ORDAHALLI
