Fransanın Azərbaycana qarşı 3 illik “qətnamə müharibəsi” puç oldu...
Elşad Həsənov: “Dövlətimizin strateji tərəfdaş ölkələrlə qurduğu uğurlu əlaqələr bu işdə mühüm rol oynadı”
Son 3 ildə Fransa Azərbaycana qarşı beynəlxalq təşkilatlarda bir sıra qətnamə və qərarların qəbul olunmasına cəhdlər edib və bu siyasət hazırda da davam edir. Fransanın bu siyasəti məhz 44 günlük Vətən müharibəsi başlayandan sonra start götürüb.
Məsələn, 44 günlük Vətən müharibəsi dövründən - 2020-ci ilin oktyabr ayından bugünə kimi təkcə Birləşmiş Millətlər Təşkilatının (BMT) Təhlükəsizlik Şurasında Azərbaycana qarşı yeddi sənədin qəbul edilməsi çağırışları olub. Təkcə bu il üç belə cəhd olub. Hamısının da təşəbbüskarı Fransa olub. Birbaşa Fransanın istəyi ilə bu təşəbbüslər irəli sürülüb. Digər qurumlarda da Fransanın analoji cəhdləri olub, amma bunların hamısı fiaskoya uğrayıb.
Maraqlıdır, Fransanın bütün bu cəhdlərinin uğursuzluğa düçar olmasının səbəbləri nə ilə bağlıdır?
“Bunun başlıca səbəbi Azərbaycan diplomatiyasının uğurlu və sistemli fəaliyyəti ilə əlaqədardır”
Sözügedən məsələyə aydınlıq gətirən siyasi ekspert Elşad Həsənov “Bakı-Xəbər”ə açıqlamasında bununla bağlı bır sıra məqamlara toxundu: “Əvvəla, Fransa 1997-ci ilin yanvarından ATƏT-in Minsk Qrupunun həmsədri olub və İkinci Qarabağ müharibəsi başlayana qədər münaqişənin tənzimlənməsi ilə bağlı heç bir əməli addım atmayıb. Təkcə o vaxt Jak Şirakın vasitəçiliyi ilə 2001-ci ilin martında Azərbaycan və Ermənistan dövlət başçılarının görüşünü təşkil edib. Belədə Fransa rəsmiləri Ermənistanı yola gətirmək üçün hansısa işlər görməyiblər. Halbuki, Fransanın Ermənistana təsir imkanları böyük idi. BMT-nin 4 məlum qətnaməsinin yerinə yetirilməsi üçün heç bir addım atmadı. Əksinə, hər zaman bunu görməzdən gəldilər. Azərbaycanı bu və ya digər formada Qarabağın işğalı ilə barışmağa sövq edirdilər. 44 günlük müharibə başlayan kimi və ondan sonrakı dövrdə Fransa birbaşa Ermənistanın yanında durdu. O üzdən, davamlı olaraq beynəlxalq təşkilatlarda Azərbaycan əleyhinə kampaniya aparmağa başladı. Ancaq Parisin ölkəmizə qarşı planları fiaskoya uğradı. Bunun başlıca səbəbi Azərbaycan diplomatiyasının uğurlu və sistemli fəaliyyəti ilə əlaqədardır. İkincisi, Azərbaycanın strateji tərəfdaş ölkələrlə qurduğu uğurlu əlaqələr bu işdə mühüm rol oynadı. 2020-ci ildə Azərbaycan pandemiya ilə əlaqədar bir sıra yoxsul ölkələrə yardım etdi, həmin ölkələri vaksinlə təmin etdi. Bunun nəticəsi olaraq Qoşulmama Hərəkatında təmsil olunan ölkələr BMT-də yekdil mövqe sərgilədilər. Nəticədə Fransanın BMT Təhlükəsizlik Şurasında Azərbaycan əleyhinə qətnamə qəbul etmək cəhdi fiaskoya uğradı. Üçüncüsü, müharibədən sonra Azərbaycan Cənubi Qafqazın lider ölkəsi olaraq nüfuzunu daha da artırdı. Ölkəmizə olan hörmət daha da yüksəldi. Dördüncüsü, 2020-ci ilin sonundan Azərbaycan Avropaya qaz ixrac etməyə başladı. Faktiki olaraq, Azərbaycan Avropanın enerji təchizatında vacib rol oynamağa başladı. Bütün bu sadalanan və digər faktorlar Fransanın ölkəmizə qarşı kampaniyasını fiaskoya uğratdı. Əlbəttə ki, bu uğurlu siyasətin fövqündə Prezident İlham Əliyevin parlaq liderliyi dayanır. Azərbaycan beynəlxalq tədbirlər müstəvisində Fransanın neokolonializm siyasətini ifşa etdi. Fransa Afrikadan qovuldu. Faktiki olaraq, Fransa Afrikanın 14 ölkəsindən çıxarılıb”.
Vidadi ORDAHALLI
