Şahramanyan Bakı türməsindən canını qurtardı, İrəvan türməsindən qurtula bilməyəcək...
Məhəmməd Əsədullazadə: “Bu, Ermənistan hakimiyyətinin apardığı siyasətə ziddir”
Ermənistanda hakim partiya Qarabağ separatçılarının son lideri Samvel Şahramanyanın 28 sentyabr fərmanını ləğv etməsinə dair xəbərin ardınca onu kəskin tənqid edib.
Hakim “Vətəndaş müqaviləsi” partiyasından olan deputat Artur Hovannisyan qeyd edib ki, Ermənistanda bircə hakimiyyət var: “Şahramanyan kimdir ki, İrəvanda fərman imzalayır? Ermənistanda bircə hakimiyyət var. Ona meydan oxuyan hər hansı bir şəxsin hərəkəti antidövlət aktı elan olunacaq, həmiş şəxs qanundankənar elan ediləcək və ona qarşı ən sərt dövlət tədbirləri görüləcək”. Hovannisyan separatçıların rəhbərliyini “Ermənistanı yeni hərbi təxribata çəkməkdə” ittiham edib.
Başqa bir iqtidar deputatı Lilit Minasyan bunları deyib: “Qarabağın kapitulyasiyasına dair sənəd imzalayanlar bilməlidirlər ki, Yerevanda Qarabağa dair imzalanmış istənilən sənədin heç bir hüquqi gücü olmayacaq”. Paşinyan partiyasının sədr müavini Gevork Papoyan Şahramanyanı “məcburi köçkün” adlandırıb və deyib ki, onun “Qarabağdan Ermənistana köç etmiş başqa 100 min qarabağlıdan heç bir fərqi yoxdur”.
Maraqlıdır, Ermənistanda hakim partiya deputatlarının bu yanaşmasını ekspertlər necə dəyərləndirir?
“Ona görə də belə bir təxribatın qarşısını almağa çalışırlar”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə buna bir neçə prizmadan yanaşdı: “Ermənistanda Qarabağdan köçən bir qrupun yığışıb yenidən "Artsax" məsələsini qabartması sıradan bir məsələ deyil. Bu zaman ilk növbədə gözlər Nikol Paşinyan hakimiyyətinin üzərinə diqqəti çəkir. Ona görə də ilk növbədə Paşinyan belə absurd hərəkətlərin qarşısını almalıdır. Samvel Şahramanyanın yenidən separatçı meyllərini ortaya çıxarması ümumilikdə Ermənistan hakimiyyətinin əleyhinədir. Ona görə də Şahramanyanın əleyhinə açıqlama verirlər. Ümumiyyətlə, Qarabağ məsələsi qapanıb və iki ölkə arasında sülh müqaviləsi layihəsində də belə bir bənd yoxdur. Samvel Şahramanyan və onun ətrafında olanlar qəti şəkildə Qarabağ məsələsini gündəliyə gətirə bilməzlər. Ona görə ki, bunun heç bir perspektivi yoxdur. Bu, Ermənistan hakimiyyətinin apardığı siyasətə ziddir. Ona görə də Ermənistan hakimiyyəti belə təxribatın qarşısını almağa çalışır. Üstəlik, Paşinyan hakimiyyəti fərqindədir ki, separatçılar Rusiyanın maraqlarına oynayırlar. Bu isə o deməkdir ki, onlar təşəbbüsü ələ alsalar birinci növbədə Paşinyanı devirəcəklər. Bu səbəbdən indidən onlara əl-qol açmağa imkan vermək istəmirlər. Azərbaycan da prosesi diqqətlə izləyir. Samvel Şahramanyan imza atıb və Qarabağ məsələsi bitib. Təzədən yeni provokasiya onlara baha başa gələcək”.
Vidadi ORDAHALLI
