Serbiyanı qarışdırmaq planının arxasında Ukrayna məsələsi var…
Əhəd Məmmədli: “Həm Qərb, həm də Rusiya maraqlıdır ki, Serbiyada hakimiyyətdə birmənalı qaydada öz adamları olsun”
Serbiyanın paytaxtı Belqradda baş verən iğtişaşların arxasında kollektiv Qərb dayanır. Bunu bu ölkənin Xarici İşlər Nazirliyinin (XİN) rəsmi nümayəndəsi Mariya Zaxarova deyib:
“Kollektiv Qərbin “Maydan çevrilişləri” üsullarından istifadə edərək bu ölkədəki vəziyyəti sarsıtmaq cəhdləri göz önündədir”.
M.Zaxarovanın sözlərinə görə, bu vəziyyətə yeganə mümkün cavab Konstitusiyaya ciddi riayət etmək, milli maraqlara səs verən Serbiya xalqının seçiminə hörmət etməkdir.
Görünən budur ki, Serbiyadakı seçkilərin nəticələrindən sonra öz təsir agentlərini bu ölkənin parlamentinə sala bilməyən Qərb Ukrayna ssenarisi üzrə “rəngli inqilab” təşkil etməyə çalışsa da, Rusiya xüsusi xidmət orqanları lazımi məlumatları əvvəlcədən serb həmkarlarına ötürməklə bu cəhdin qarşısını almaqda Belqrada kömək ediblər.
Serbiya Rusiyaya yaxınlığı ilə seçilən ölkədir. Oradakı prosesləri Qərb həm də Rusiyanın başını qatmaq üçün təşkil edə bilərmi? Çünki Rusiya birmənalı olaraq həmin ölkəni müdafiə edir.
Politoloq Əhəd Məmmədli “Bakı-Xəbər”ə açıqlamasında bildirdi ki, Rusiya və Serbiyanın kəşfiyyat xidmətləri arasında kifayət qədər sıx tərəfdaşlıq əlaqələri qurulub: “Baş nazir Ana Brnabiç bildirib ki, Rusiya təhlükəsizlik xidmətləri Serbiyaya Belqradda gözlənilən iğtişaşlar barədə xəbərdarlıq edib. Prezident Aleksandar Vuçiç Rusiyanın səfiri Aleksandr Bokan-Harçenko ilə görüşüb. Dekabrın 18-dən Belqradda keçirilən seçkilərin nəticələri ilə razılaşmayan “Serbiya zorakılığa qarşı” müxalifət bloku tərəfindən mitinqlər keçirilir. Bir gün əvvəl, dekabrın 24-də nümayişçilər şəhər administrasiyasının binasına soxulmağa cəhd ediblər. Bayraq dirəklərindən istifadə edərək qapını və pəncərələri sındırıblar. Binanın içindəki polislər sınmış qapı və pəncərələri qalxanlarla örtüb, gözyaşardıcı qazdan istifadə ediblər. Dövlət başçısı etirazlarla bağlı müraciət edib. Onun fikrincə, administrasiya binasına basqın etmək cəhdi suverenliyə zərbə vurmaq məqsədi daşıyır. Vuçiç etirazlarda “xarici faktor”dan danışıb. Rusiya Serbiyanı, xüsusən də bu ölkədəki millətçi, slavyan mənşəli cərəyanları özünün müttəfiqi kimi görür. Rusiyanın onlara kifayət qədər ciddi təsiri var. Qərb, Avropa İttifaqı isə çalışır ki, Rusiyanın Serbiyadakı mövqelərini zəiflətsin, onu bu ölkədən sıxışdırıb çıxartsın. Avropalıların qənaətincə, Rusiyanın Serbiyada mövcudluğu, təsiri sadəcə Balkanlara deyil, Avropa İttifaqı üçün də təhdid yaradır. Serbiya Prezidenti Aleksandar Vuçiç mövcud vəziyyəti, reallıqları nəzərə alaraq balanslı siyasət həyata keçirməyə çalışır. Bilir ki, Serbiya cəmiyyətində Rusiyanın ciddi dayaqları var. Vuçiç ölkəsini Avropaya inteqrasiya etdirməyi, xüsusən də bunu ehtiyatlı və mərhələli şəkildə həyata keçirməyi düşünür. Həm Qərb, həm də Rusiya maraqlıdır ki, Serbiyada hakimiyyətdə birmənalı qaydada öz adamları olsun, onların siyasi kursunu dəstəkləyən, həyata keçirəcək hökumət formalaşsın”.
Moskvanın Belqraddakı diplomatik missiyasının rəhbəri Aleksandr Botsan-Xarçenko bildirib ki, Serbiyadakı etiraz aksiyaları Maydan inqilabı prinsipi əsasında planlaşdırılıb və həyata keçirilir.
Rusiya-ABŞ qarşıdrmasında yenə də Serbiya Moskvanın Avropada əsas dayaq nöqtəsi kimi çıxış edir. İstər Serbiya, istər elə AB daxilində Macarıstan, Bolqarıstan kimi bir sıra dövlətlər var ki, Rusiyaya sanksiyalardan yayınmağa kömək edir, Ukrayna münaqişəsindən diqqətin yayınmasına səbəb olurlar.
Məhəmmədəli QƏRİBLİ
