Prezidentin bu sərəncamı COP29-a mühüm hazırlıq addımı olacaq...
Prezident İlham Əliyev Azərbaycan Respublikasında 2024-cü ilin “Yaşıl dünya naminə həmrəylik ili” elan edilməsi haqqında sərəncam imzalayıb.
Sərəncamda ölkəmizin beynəlxalq ictimaiyyətin etibarlı və məsuliyyətli üzvü kimi iqlim dəyişmələrinin fəsadlarına qarşı mübarizəyə öz töhfəsini verdiyi diqqətə çatdırılıb. Qeyd olunub ki, Azərbaycanın 2030-cu ilə qədər sosial-iqtisadi inkişafa dair beş milli prioritetindən biri “Təmiz ətraf mühit və yaşıl artım ölkəsi” kimi müəyyən edilib. Həmin prioritetə uyğun olaraq, ətraf mühitin sağlamlaşdırılması, yaşıllıqların bərpası və artırılması, su ehtiyatlarından və dayanıqlı enerji mənbələrindən səmərəli istifadənin təmin edilməsi istiqamətində işlər aparılır. Bildirilib ki, Azərbaycan baza ili (1990) ilə müqayisədə 2030-cu ilə qədər istilik effekti yaradan qazların emissiyalarının 35 faiz, 2050-ci ilə qədər isə 40 faiz azaldılmasını hədəf kimi götürüb.
Məlumdur ki, BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyası - COP29 gələn il Azərbaycanda keçiriləcək. Ekspertlər hesab edir ki, 2024-cü ilin “Yaşıl dünya naminə həmrəylik ili” elan edilməsi ölkəmizdə keçiriləcək COP29-a konfransına hazırlıqla da bağlıdır.
Zaur İbrahimli: “2024-cü ilin “Yaşıl dünya naminə həmrəylik ili” elan edilməsi Azərbaycanın yaşıl gündəliyə sadiq olduğunu göstərir”
Məlum sərəncamın əhəmiyyəti və perspektivdə hansı işlərin görülməsi ilə bağlı fikir bildirən Qeyri-Hökumət Təşkilatlarına Dövlət Dəstəyi Agentliyinin Müşahidə Şurasının üzvü Zaur İbrahimli “Bakı-Xəbər”ə açıqlamasında bildirdi ki, 2024-cü ilin “Yaşıl dünya naminə həmrəylik ili” elan edilməsi Azərbaycanın yaşıl gündəliyə sadiq olduğunu göstərir: “Azərbaycan bu vaxta qədər yaşıl keçidlə bağlı əhəmiyyətli təşəbbüslərlə çıxış edib. Ilk növbədə təmiz ətraf mühit, yaşıl inkişaf ölkəsi olmaq Azərbaycanın sosial iqtisadi inkişafının milli prioritetlərindən biri kimi bəyan edilib. Bu prioritetin icraçısı kimi Azərbaycan bəyan edib ki, öz iqtisadiyyatını yaşıl keçidə uyğun qurur. Bu keçidin əsas məqsədlərindən biri də yaşıl enerji istehsalı və Avropaya ixrac olunmasıdır. Bununla bağlı ölkəmiz yaşıl tranzit kimi təşəbbüslərlə də çıxış edib”.
Həmsöhbətimiz onu da əlavə etdi ki, Azərbaycanın yaşıl enerji potensialı imkan verir ki, ölkə bu istiqamətdə ciddi nailiyyətlər əldə etsin. Məlumdur ki, qlobal təşəbbüslərin davamı kimi COP29 sammiti növbəti il ölkəmizdə keçiriləcək: “Bu sammit olduqca mühumdur. COP29 konfransı tarixi bir tədbir olacaq. Belə bir möhtəşəm konfransın ölkəmizdə keçirilməsi ölkəmizə verilən etimaddan xəbər verir”.
Vüqar Bayramov: “Prezident İlham Əliyevin rəhbərliyi ilə həyata keçirilən siyasət ölkəmizin geosiyasi və geostrateji mövqelərinin daha da möhkəmlənməsinə xidmət edir”
Millət vəkili Vüqar Bayramov bildirdi ki, ümumiyyətlə, 2024-cü il məhz bu kontekstdə Azərbaycan üçün yaddaqalan illərdən biri olacaq: “Həmçinin, 2024-cü ildə Azərbaycanda təşkil olunacaq COP-29 tədbiri çox nüfuzlu beyin mərkəzlərinin Bakıda toplanmasına gətirib çıxaracaq. Prezident İlham Əliyevin rəhbərliyi ilə həyata keçirilən siyasət ölkəmizin geosiyasi və geostrateji mövqelərinin daha da möhkəmlənməsinə xidmət edir”.
Günel CƏLİLOVA
