Masallıda şəhid ailələrinə qayğı yüksək səviyyədədir
Masallı rayonunda, bir qayda olaraq, şəhid ailələrinin qayğı və problemlərini öyrənib lazımi səviyyədə onlara mənəvi, maddi cəhətdən kömək göstərmək rayon rəhbərliyinin qarşısında duran əsas məsələdir.
Bu günlərdə icra hakimiyyətinin inzibati binasında şəhid ailələri ilə təşkil edilən görüşdə məhz bundan irəli gəlirdi.
Masallı Rayon İcra Hakimiyyətinin başçısı Araz Əhmədovun, müavinlərin, şöbə müdirlərin, hüquq-mühafizə orqan rəhbərlərinin və jurnalistlərin iştirak etdiyi görüş Vətən torpaqlarının azadlığı naminə can qoyan şəhid övladlarının əziz xatirəsi bir dəqiqəlik sükutla anılmaqla başlanıb.
Görüşün açılış nitqində dövlətimizin şəhid ailələrinə göstərdiyi diqqət və qayğıdan danışan Araz Əhmədov onu da bildirib ki, 44 günlük haqq savaşımız Azərbaycan xalqının şanlı zəfər tarixidir. Birinci Qarabağ və Vətən müharibəsində qəhrəmanlıq göstərərək, qanı bahasına tarix yazan igid Vətən övladlarının adları Azərbaycan xalqının hər bir fərdinin qəlbində yaşayacaq, əziz xatirələri hər zaman ehtiramla yad ediləcək.
Masallı Rayon İcra Hakimiyyəti Başçısı aparatının Vətən müharibəsi iştirakçıları və şəhid ailələri ilə işin təşkili şöbəsinin müdiri Qəşəm Hadıyev isə çıxışında deyib: - Masallı rayonu üzrə Birinci Qarabağ savaşında 186 şəhid, 188 müharibə əlili və 620 müharibə iştirakçısı, Vətən müharibəsində 62 şəhid, 70 müharibə əlili və 1364 müharibə iştirakçısı, 19 sentyabr 2023-cü il tarixdə cəmi 23 saat çəkən antiterror əməliyyatları zamanı 8 şəhid və 12 yaralı vardır. 23 saatlıq möhtəşəm qələbəmiz zamanı yaralanmış 12 hərbi qulluqçu həm müalicə aldıqları tibb müəssisəsində, həm də yaşadıqları ünvanda ziyarət edilərək onlara maddi yardım göstərilib. Rayon rəhbərliyi tərəfindən Azərbaycan Respublikasının Prezidentinə, Əmək və Əhalinin Sosial Müdafiəsi Nazirliyinə şəhid ailələrinin mənzil, eyni zamanda fərdi yaşayış evi ilə təmin olunması barədə rəsmi və şifahi müraciətlər edilib. 42 şəhid ailəsi və müharibə əlillərinin mənzil növbəsi rayon qeydiyyatından çıxarılaraq sənədləri aidiyyəti üzrə qeydiyyata alındıqları RİH-ə göndərilmiş, onların bəziləri Əmək və Əhalinin Sosial Müdafiəsi Nazirliyi tərəfindən mənzillə təmin olunub.
Görüşdə iştirak edən şəhidlərin valideynləri övladlarının keçdikləri şərəfli döyüş yolundan söz açaraq, onlarla bağlı xatirələrini bölüşməklə bərabər, göstərilən diqqət və qayğıya görə ölkə başçısı İlham Əliyevə və Birinci vitse-prezident Mehriban xanım Əliyevaya razılıq edib, həmçinin bir sıra problemin həlli ilə bağlı arzu və təkliflərini bildiriblər.
İcra başçısı görüşdə iştirak edənləri ətraflı dinləyib və qaldırılan məsələlərin tezliklə həllini aidiyyəti qurumlara tapşırıb.
Zəfər ORUCOĞLU
Azərbaycan Jurnalistlər Birliyinin üzvü
