Fransız casus şəbəkəsi Bakıda nələr etməyi planlaşdırıb?..
Təbriz Musayev: “Məqsəd həm də Azərbaycanın bir sıra Avropa ölkələri ilə tərəfdaşlıq əlaqələrini pozmaq olub”
Ukrayna, Moldova, Gürcüstan, Azərbaycan, Şərqi Avropa, Yaxın Şərq və Mərkəzi Asiyanın bir sıra ölkələrində müxtəlif əməliyyatlara cəlb edilmiş Fransa xüsusi xidmət orqanlarının geniş agentura şəbəkəsi Azərbaycanda ifşa olunub.
Bu barədə Qərb mətbuatında məlumat yayılıb.
Bildirilib ki, hər şey Fransa səfirlik daxili rezidenturasının Azərbaycan ərazisində əslində Fransanın “tərəfdaşı” kimi bilinən ölkələrin nümayəndələrinə qarşı çox arxayın kəşfiyyat əməllərinə görə diqqətə düşməsi ilə başlayıb. Geniş əlaqələrindən istifadə edən rezidentura region ölkələrində fəal hərəkət etməklə yeni məqsədlər formalaşdırmaq və təsir dairəsini genişləndirməklə məşğul olub.
Məlumata görə, mənbələrdən əldə edilmiş informasiyaya əsasən, araşdırma bir-biri ilə əlaqəli xüsusatlar şəbəkəsini aşkarlamağa imkan verən çox maraqlı aspektləri üzə çıxarıb, uzun illər Fransa casus şəbəkəsinin ştatdankənar əməkdaşı olmuş Fransa vətəndaşlarından biri könüllü olaraq Azərbaycan hüquq-mühafizə orqanları ilə əməkdaşlığa təşəbbüs göstərib. Müəyyən müddət ərzində bir qismi indi və ya əvvəllər Azərbaycanda xidmət etmiş, bəziləri müxtəlif ölkələrdə və nüfuzlu beynəlxalq təşkilatlarda örtülü işi davam etdirən onlarla Fransa xəfiyyəsi aşkarlanıb. Bununla yanaşı, Azərbaycan xüsusi xidmət orqanlarına Fransa rezidenturasının Cənubi Qafqaz, Yaxın Şərq, Ukrayna və Moldovadakı fəaliyyətinə dair dəlil və sənədlər təqdim edilib.
Maraqlıdır, casus şəbəkəsini saxlamaqda məqsəd nədir, bununla Fransa nə edə bilər? Şəbəkənin ifşa olunması ilə nələrin qarşısı alınıb?
“Ölkəmizin Qarabağda əldə etdiyi ard-arda uğurları Paris həzm edə bilmir”
Sözügedən məsələyə aydınlıq gətirən İrəvan Azadlıq Təşkilatının sədri Təbriz Musayev “Bakı-Xəbər”ə açıqlamasında qeyd etdi ki, Fransanın bunda bir neçə məqsədi var: “Əvvəla, Fransa kəşfiyyatı xaricdə daha çox diplomatik strukturların, bu ölkənin şirkətlərinin nəzdində fəaliyyət göstərir. Cənubi Qafqazın Fransa kəşfiyyatının maraq dairəsində olması təxmin olunurdu. Çünki, xüsusən də son 3 ildə Fransa bölgədə ciddi fəallıq göstərir. Paris daha çox regiona nüfuz etməyə çalışır. Məqsəd Rusiyanı, Türkiyəni bölgədən sıxışdırmaq və Fransanın təsir dairəsini genişləndirməkdir. Bəlli məsələdir ki, regionda Fransanın əsas dayağı Ermənistandır. Siyasi, hərbi, hətta son vaxtlar iqtisadi proqramlarla çıxış etməklə bu ölkəyə dəstək göstərir. Biz nəzərə almalıyıq ki, Fransa Azərbaycana düşmən münasibət bəsləyir. Azərbaycanın Qarabağda əldə etdiyi ard-arda uğurları Paris həzm edə bilmir. Beynəlxalq qurumlarda Azərbaycana qarşı planıarını reallaşdıra bilməyən Fransa kəşfiyyat fəaliyyəti ilə ölkəmizə zərər vurmağa cəhd edib. Məqsəd həm də Azərbaycanın bir sıra Avropa ölkələri ilə tərəfdaşlıq əlaqələrini pozmaq olub. Çünki Fransanın Avropa İttifaqı ölkələrinə təsiri böyükdür. Hesab edirlər ki, bu minvalla daha çox zərər vura bilərlər. Ancaq görünən odur ki, Fransanın bu cəhdləri ciddi uğursuzluğa düçar olub. Belə olmasaydı, pezident Makron Fransa Xarici Təhlükəsizlik Baş İdarəsinin (DGSE) rəisi Bernar Emyeni vəzifədən azad etməzdi. Bütün bunların eyni vaxtda baş verməsi təsadüf deyil. Fikrimcə, rəsmi məlumatlar olsa, bir sıra məsələlər ictimaiyyətə bəlli olacaq. İstənilən halda bu, Azərbaycan kəşfiyyatının ciddi uğurudur”.
Vidadi ORDAHALLI
