İranın Türkiyə və Azərbaycana qarşı planı deşifrə edildi - rejimə müxalif adı ilə 30 min ailəni Türkiyəyə sızdırıblar...
![Image](/uploads/posts/2023-12/1703193920_iran-az.webp)
İsrailin Qəzza müharibəsi ilə Yaxın Şərqin böyük bir hissəsini əhatə edən “vəd edilmiş torpaqlar” ambisiyasından sonra bölgənin bir başqa ölkəsi olan İranın da məkrli layihəsi ortaya çıxıb.
İsrailin Qəzza müharibəsi ilə Yaxın Şərqin böyük bir hissəsini əhatə edən “vəd edilmiş torpaqlar” ambisiyasından sonra bölgənin bir başqa ölkəsi olan İranın da məkrli layihəsi ortaya çıxıb.
Türkiyə mediası yazır ki, İraq ABŞ-ın işğalından sonra faktiki olaraq İranın nəzarətinə buraxılıb. Bu gün təkcə İraq deyil, Suriya, Fələstin, Yəmən kimi bütün ağrılı coğrafiyalarda əli olan Tehran “şiə hilalı”nı addım-addım reallaşdırmaq arzusundadır. Bu məqsədlə hətta “Şiə atlası” da hazırlanıb. 743 səhifəlik atlasda Türkiyə və Azərbaycanın mədəniyyəti, siyasəti, coğrafiyası, əkinçilik, ticarəti, etnik mənsubiyyəti, dili, iqtisadiyyatı və məzhəb-inancı kimi təfərrüatlı təsnifatları aparılıb. İran Baş Qərargahının hazırladığı xəritədə Resul Ceferiyanın imzası var. Hazırda Tehran Universitetinin tarix kafedrasının professoru olan Ceferiyan “Şiə atlası”na görə bir çox mükafatlara layiq görülüb. İşğal atlasında Türkiyədəki nusayrilər kimi bəzi kütlələrin İranın potensial tərəfdarları olduğu ifadəsi də yer alır.
Güney Azərbaycan Milli Oyanış Hərəkatının (GAMOH) rəhbəri, Tehran rejimini ən yaxşı tanıyan şəxslərdən Mahmutali Çöhrəqanlı deyib ki, İranın “şiə hilalı” layihəsi İsrailin “vəd edilmiş torpaqlar” layihəsindən qat-qat təhlükəlidir. Çöhrəqanlı Tehranda “şiə hilalı”layihəsi üzərində işləyən 5 min nəfərlik heyətin olduğunu bildirib: “Mərkəzi baza Beyt Rəhbərdə qurulub. Orada gizli-xüsusi komitə var. Onların tabeliyində hərbi, kəşfiyyat, təsərrüfat və mədəniyyət bölmələri fəaliyyət göstərir. Bu layihəyə rejimin qurulduğu 1979-cu ildən start verilib. Türkiyə və Azərbaycana xüsusi önəm verilən layihəyə indiyədək 200 milyard dollardan çox vəsait ayrılıb. İlk gündən İranın müəyyən etdiyi strategiya çərçivəsində müvafiq olaraq Livan, İraq, Suriya və Yəmənə sahib oldular. Heç kim bu planın nə Türkiyədə, nə də Azərbaycanda işləməyəcəyini və ya mümkün olmadığını düşünməsin. Bir zamanlar Yəmən, Livan, İraq və Suriyada bunlar sadəcə xəyallar idi. İndi onlar İranın əsiridirlər. Molla rejimi hədəf ölkələri siyasi, mədəni və iqtisadi çöküşdən sonra birbaşa hərbi yolla deyil, onları daxili qarışıqlığa sürükləməklə ələ keçirir. Öz əsgərlərini heç bir şəkildə döyüşdürmədən ölkələri təslim alır. Onlar Yəməndə husilərdən, Livanda maronitlərdən və druzlardan, Suriyada nusayrilərdən, İraqda şiə ərəblərdən istifadə ediblər”.
Çöhrəqanlı son 10 ildə rejimə müxalif kimi görünən 30 min ailənin Türkiyəyə sızdırıldığını da iddia edib. Bu müddət ərzində 90 min iranlının Türkiyədən mənzil aldığını bildirən Çöhrəqanlı deyib: “Bu ailələrin 30 mini mərkəzi genişləndirmə komitəsinin təyin etdiyi xüsusi təhsilli fanatiklərdən ibarətdir. İtilaat bölməsi kimin harada məskunlaşdığını birbaşa idarə edir. Qasım Süleymani layihənin rəhbəri idi. Terror təşkilatı PKK və digər təşkilatlarla əməkdaşlığın kökündə də eyni motiv dayanır. İran məzhəb, siyasi, mədəni və hərbi hegemonluğuna birbaşa döyüş yolu ilə deyil, dolayı ünsürlərin əli ilə nail olur. Onların planları Türkiyə və Azərbaycan üçün də eynidir. Ona görə də Qarabağda ermənilərə dəstək verdilər. Onların Azərbaycanda dini, siyasi, kommersiya və QHT səviyyəsində ciddi infrastrukturu var. Onlar da Türkiyədəki bəzi məzhəb qruplarına arxalanırlar”.
Rejimin son qərarla İranda türk lövhələrini qadağan etdiyini deyən Çöhrəqanlı bildirib ki, ingilis, erməni, çin və rus dillərinə bir söz demirlər, lakin türkcəyə dözə bilmirlər: “İsrail, ABŞ və ya İngiltərəni deyil, onlar türkləri ən böyük düşmən kimi görürlər. Onların gizli planları var və işləyirlər. Türk milləti və dövlət idarəçiləri hər zamankından daha diqqətli davranmalıdırlar”.
TAHİR