Ermənistanda Rusiyanın bir uzantısını da kəsirlər…
Müşfiq Ələsgərli: “Siyasi vektorunu Qərbə doğru dəyişdiyini nümayiş etdirməyə çalışır”
Ermənistanın tənzimləyici orqanı olan Televiziya və Radio Komissiyası “Sputnik Ermənistan” radiosunun yayım lisenziyasını dayandırıb.
Ölkənin Televiziya və Radio Komissiyası radionu 500 min dram (təxminən 2000 manat) cərimələyib.
Bildirilir ki, tənzimləyicinin bu qərarı “Tiqran Keosayanla cümə” proqramı ilə bağlıdır və bu proqramda müəllifin “mənəvi hüququ olmadan ölkənin və xalqın şərəf və ləyaqətinə xələl gətirən ironik və alçaldıcı ifadələr işlətdiyi iddia olunur. İkinci cərimə qərarı isə Ermənistanın sabiq deputatı Arman Abovyanın müəllif proqramı olan “Abovyanın vaxtı”na tətbiq edilib. Burada komissiya verilişdə "çaxnaşma yayan və təsdiqlənməmiş və etibarsız mənbələrə əsaslanan" məlumatların yayıldığını iddia edib.
Atılan bu addımlar Ermənistanın Rusiyaya qarşı son demarşlarından sayıla bilərmi?
Media üzrə ekspert Müşfiq Ələsgərli “Bakı-Xəbər”ə açıqlamasında bildirdi ki, Rusiya-Ukrayna müharibəsi başlayan andan, yəni 2022-ci ilin fevral ayından etibarən Qərb ölkələri Rusiyaya məxsus KİV-lərin öz ərazilərində yayımlanmasına məhdudiyyətlər tətbiq etdilər. Avropa İttifaqı 2022-ci fevralın 27-dən başlyaraq, Rusiya KİV-nin Avropa İttifaqı ərazisində yayımının bloiklanması barədə siyasi qərar verdi. Adını da qoydular ki, Rusiya KİV-i təbliğat və təşviqatla məşğuldur, bu da yolverilməzdir. Rusiya Federasiyasında da analoji addımlar atıldı.
Bu qərarların nə qədər əsaslandırılmış, nə qədər ədalətli olduğunu burada müzakirə etməyək. Qısaca qeyd edək ki, Qərb ölkələrində fəaliyyət göstərən transmilli KİV-lərin özləri də təbliğat və təşviqatla məşğul olurlar; maraqları tələb edəndə dezinformasiyalar yayırlar və sair. Biz bu yanaşmanın Qarabağ müharibəsinin gedişində Azərbaycana qarşı tətbiq edildiyini də görmüşük. Amma indi bu məqamın üzərində çox dayanmayaq. Çünki o, tamamilə fərqli bir kontekstdir. Müzakirəsi geniş vaxt tələb edən mövzudur. Bu nümunələri göstərməklə vurğulamaq istədiyim odur ki, Rusiyaya məxsus KİV-lərin Qərb ölklərində bloklanması, yayımınının məhdudlaşdırılması geniş yayılmış bir haldır, praktikada mövcuddur. Ermənistan indiki addımı ilə Qərb ölkələrini yamsılayır, özünü onlara yaxın kimi göstərir. Qərblə bir sırada dayandığını, Rusiyaya qarşı cəbhədə yer tutduğunu göstərmək istəyir. Nikol Paşinyan komandası Rusiyaya qarşı olduğunu hər addımda göstərir. MDB sammitində iştirakdan imtina edir, Kollektiv Təhlükəsizlik Müqaviıəsinin toplantılarını boykot edir və sair. Yəni siyasi vektorunu Qərbə doğru dəyişdiyini nümayiş etdirməyə çalışır. Rusiya KİV-lərinin Ermənistan ərazisində yayımının məhdudlaşdırılması da bu fəaliyyətin tərkib hissəsidir”.
Məhəmmədəli QƏRİBLİ
