Tarixdə ilk Rusiya-Ermənistan "ictimai forumu" - Paşinyandan əllərini üzüblər...
Mətin Məmmədli:"Görsənir ki, Birinci Ermənistan-Rusiya ictimai forumunu keçirməklə Ermənistan ictimai rəyinə təsir etməyə cəhd edilir, pozitiv mesajlar verilməyə çalışılır"
Rusiya və Ermənistan arasında münasibətlərin soyuq olduğu bir vaxtda Rusiya İctimai Palatasının dəstəyi ilə “Birgə” İctimai Təşkilatı və “Beynəlxalq Əməkdaşlıq Liderləri” tərəfindən Moskvada “Prezident” mehmanxanasında Rusiya-Ermənistan Birinci İctimai Forumu keçirilib.
Forumda dövlət və ictimai xadimlər, tədqiqatçılar və politoloqlar iştirak edib. Bu barədə “Dialoq” ictimai təşkilatı məlumat yayıb.
Forumu açan xeyriyyəçi və ictimai xadim Mher Avetisyan qeyd edib ki, qlobal qarşıdurma şəraitində qardaş Ermənistan-Rusiya münasibətlərini qorumaq və inkişaf etdirmək, onları anti-Rusiya əhval-ruhiyyəsindən, Qərbin Ermənistan və Rusiyanı bu işə cəlb etmək cəhdlərindən qorumaq lazımdır.
Rusiya Federasiyası Federal Məclisi Dövlət Dumasının sədr müavini Pyotr Tolstoy da bəyan edib ki, Rusiya və Ermənistan bu çətin dövrdə bir yerdə olmalıdır:
“Forum platforması vətəndaş cəmiyyətinə Rusiya ilə Ermənistan arasında əməkdaşlığın qurulmasına öz töhfəsini verməyə imkan verdi. İki ölkənin ümumi tarixi gələcək birgə inkişaf üçün möhkəm təməldir. Rusiya və Ermənistan çiyin-çiyinə getməlidir”.
Müstəqil Dövlətlər Birliyi, Xaricdə Yaşayan Həmvətənlər və Beynəlxalq Humanitar Əməkdaşlıq üzrə Federal Agentliyin rəhbəri Yevgeni Primakov qeyd edib ki, diaspor Vətənə ümumi məhəbbəti birləşdirən insanlardır.
“Məhz qarşılıqlı fəaliyyətimizdə, əməkdaşlığımızda siyasətçilərin bəzən hələ də tapa bilmədiyi vacib cavabları tapa biləcəyik”.
Dövlət və siyasi xadim, Rusiya Federasiyasının keçmiş Baş naziri Sergey Stepaşin öz növbəsində qeyd edib ki, bu gün Rusiya ilə Ermənistan arasında münasibətlər yeni inkişaf mərhələsinin başlanğıcındadır:
“Forumun keçirilməsi ölkələr arasında keyfiyyətcə fərqli münasibətlərin yaranmasına, Rusiya ilə Ermənistanın qarşılıqlı fəaliyyətində aktual problemlərin həllinə və iki ölkənin strateji yaxınlaşması yollarının işlənib hazırlanmasına töhfə verəcək”.
Rusiya-Ermənistan münasibətlərinin indiki mərhələsində Birinci "Rusiya-Ermənistan” İctimai Forumunun keçirilməsinin mənası nədir? Bunun arxasında nə dayanır? 30 illik müstəqillik dövründə ilk dəfədir ki, Rusiya və Ermənistan belə bir forum keçirir, əvvəl bu cür forum keçirilməyib. Onun təşkil edilməsində məqsəd nədir?
Şərhçilərin fikrincə, bu, bir neçə amillə bağlıdır. Onların qənaətinə görə, demək Ermənistanda hakimiyyət artıq üzünü Qərbə tutub, o tərəfə gedir. Bu halda Rusiyanın ümidi iştimaiyyətə qalıb və indi də Rusiya və Ermənistan ictimaiyyəti arasında münasibətlər qurmaq istəyirlər. Çünki artıq Ermənistan hakimiyyətindən əllərini üzüblər. Əslində bu forumun arxasında dayanan bu amildir. Eyni zamanda ictimai forumda çıxış edən adamların hamısı erməni milyarderləri, oliqarxları, pullu şəxslərdir. Burada ikinci istiqamət odur ki, bu milyarderlərin sırasında Ermənistanda növbəti hakimiyyət namizədi hazırlayırlar. Üçüncüsü isə Ermənistanda xalqı, cəmiyyəti toparlayıb Paşinyana qarşı qaldırmaq istəyirlər. Bu proseslərin arxasında duran bunlardır.
"Bu forumun ictimaiyyətə yönəldiyi gizli deyil"
Məsələyə şərh verən Beynəlxalq Münasibətlərin Təhlili Mərkəzinin aparıcı məsləhətçisi, siyasi elmlər üzrə fəlsəfə doktoru, dosent Mətin Məmmədli baki-xeber.com-a bildirdi ki, Birinci Ermənistan-Rusiya İctimai Forumunun keçirilməsi heç də təsadüfi deyil, Rusiya İctimai rıçaqlardan istifadə etmək yolu ilə Ermənistanı təsir dairəsində saxlamaq istəyir. "İkinci Qarabağ müharibəsindən sonra Rusiya ilə Ermənistan arasında münasibətlərdə davamlı problemlər meydana çıxıb. Xüsusən son aylarda bu problemlər daha da kəskinləşib, Rusiya və Ermənistan hakimiyyətləri bir-birini qarşılıqlı olaraq ittiham edirlər. Münasibətlər bir xeyli gərginləşib. Amma bütün bunlarla bərabər hesab edirəm ki, xüsusilə Rusiya öz ənənəvi təsirini Ermənistan üzərində itirmək istəmir, çalışır ki, Ermənistanı bütün vasitələrlə öz təsir dairəsində, öz orbitində saxlasın"-deyə M. Məmmədli qeyd etdi.
M.Məmmədli hesab edir ki, mövcud vəziyyətdə bu forumun keçirilməsi Rusiyanın məhz bu məqsədlərinə xidmət edir. Onun sözlərinə görə, bütün problemlərə baxmayaraq, Rusiya Ermənistanla münasibətlərin müttəfiqlik səviyyəsində olduğunu sübut etməyə, yaxın olduqlarını təsdiqləməyə çalışır. "Bu forumu keçirməklə Ermənistan ictimai rəyinə təsir göstərməyə çalışır. Nəzərə almaq lazımdır ki, son dövrlərdə, daha dəqiq desək, İkinci Qarabağ müharibəsindən sonra Ermənistanda kəskin antirusiya mövqeyi, ab-havası formalaşıb. Görsənir ki, Birinci Ermənistan-Rusiya ictimai forumunu keçirməklə Ermənistan ictimai rəyinə təsir etməyə cəhd edilir, pozitiv mesajlar verilməyə çalışılır".
M.Məmmədli qeyd etdi ki, bu gün Qərbə doğru yön alan və Rusiyadan qopmaq üçün bütün imkanlarını ortaya qoyan Paşinyan hakimiyyətindən əli üzülən Rusiya erməni milyonçularının vasitəsilə Ermənistan cəmiyyətinə nüfuz etməyi hədəfləyib.
"Bu forumun ictimaiyyətə yönəldiyi gizli deyil. Cəmiyyətə nüfuz səbəbindən belə forumlar təşkil olunur. Başqa məsələlər də var. Rusiya baş nazirinin müavini də Ermənistanda səfərdədir, Ermənistan hökuməti ilə danışıqlar aparır".
Onun fikrincə, Rusiya-Ermənistan siyasəti "qamçı və kökə" siyasətini xatırladır. "Yəni bir tərəfdən qarşılıqlı ittihamlar səsləndirilir, digər tərəfdən belə forum keçirilir, tamam başqa bir siyasət diqqəti çəkir. Təbii, bu ənənəvi olaraq bir imperiya siyasətidir. Məqsəd də ilk növbədə, qeyd etdiyimiz kimi, Ermənistanı öz təsirində saxlamaqdır"-deyə M. Məmmədli bildirdi.
İradə SARIYEVA
