Bir məktəbdə hər şagirdə 600 manat, digərində 30 min manat - belə təhsil sistemi olar?..
Nizami Hüseynov: “Ümumitəhsil məktəbləri də özünümaliyyələşdirmə sisteminə keçməlidir”
“Bu gün biz bir şagirdin təhsili üçün yeddi min manat xərcləyirik. Bu, demək olar ki, özəl təhsil müəssisəsi ilə eynidir”.
Bunu elm və təhsil naziri Emin Əmrullayev ümummilli lider Heydər Əliyevin 100 illik yubileyinə həsr olunmuş Azərbaycan Müəllimlərinin XVI Qurultayında çıxışı zamanı deyib.
Onun sözlərinə görə, xərclərə baxmayaraq, nəticə aşağıdır: “Bakıda ən böyük tutumu olan məktəbin bir şagirdi üçün bu rəqəm 600 manat, ucqar kənddə 30 min manatdır. Bu da paylanma baxımından doğru deyil. Dövlət vəsaitinin daha səmərəli, nəticəyönümlü xərclənməsi istiqamətində rasionallaşdırma tədbirlərini davam etdirəcəyik”.
Maraqlıdır ki, hər şagirdə bu qədər xərc çəkilirsə, niyə təhsilin səviyyəsi istənilən kimi deyil və valideynlər hər ay repetitorlara əlavə vəsait ödəməli olurlar?
“Ümumitəhsil məktəbləri publik hüquqi şəxsə çevrilməli, təhsil müəssisələri orada təhsil alan şagirdlərin sayına uyğun olaraq maliyyələşməlidir”
Təhsil eksperti Nizami Hüseynov “Bakı-Xəbər”ə açıqlamasında bildirdi ki, “Təhsil Haqqında” AR Qanununa görə, dövlət minimum icbari təhsil verməyi öz öhdəsinə götürüb. Bütün təhsil ocaqlarının xərcləri bərabər şəkildə həyata keçirilir: “Amma qeyd edim ki, məktəblərin şagird başına nə qədər tutumu varsa, ona görə maliyyələşmənin həyata keçirilməsi tədris resurslarına ciddi təsir göstərir. Məktəblər öz infrastrukturlarından ciddi şəkildə istifadə etməlidirlər. Amma təəssüflər olsun ki, bizdə bu sistem aşağı səviyyədədir. Təhsil müəssisəsi öz binasında ödənişli şəkildə rəqs, rəsm, şahmat dərsləri, bu və ya digər xidmətləri göstərməklə şagird cəlbini həyata keçirsə rəsmi gəlir əldə edər. Bundan başqa, hər bir məktəb özü qrant layihələrində iştirak etməklə, büdcəsinə böyük məbləğdə vəsait qazandıra bilər. Məlumdur ki, hazırda orta ixtisas, peşə məktəbləri və ali məktəblər özünümaliyyələşdirmə sisteminə keçib. Ümumitəhsil məktəbləri də özünümaliyyələşdirmə sisteminə keçməlidir. Hələlik mərkəzləşmiş qaydadan lazımi effekti ala bilmirik. Ümumitəhsil məktəbləri publik hüquqi şəxsə çevrilməli, təhsil müəssisələri orada təhsil alan şagirdlərin sayına uyğun olaraq maliyyələşməlidir”.
Günel CƏLİLOVA
