“Ermənistan Qarabağı qaytarmazdan əvvəl bizimlə məsləhətləşməli idi” - Putinin sətiraltı mesajı...
Tural İsmayılov: “Putin Qarabağla bağlı eyni mövqeni nümayiş etdirərək bunu bir daha təkrarladı”
Rusiya prezidenti Vladimir Putin “Mir” telekanalının müxbirinin Ermənistanın son davranışları barədə sualını cavablandırarkən Paşinyana sətiraltı mesaj verib:
“Düşünmürəm ki, Ermənistanın MDB, Aİİ və KTMT-dəki üzvlüyünə hansısa yolla xitam vermək onun maraqlarına uyğundur. Ermənistan baş nazirinin ümumi tədbirlərdə iştirak etməməsi, bildiyimiz qədər, Ermənistandakı proseslərlə bağlıdır. Ermənistanın MDB-də fəaliyyətini davam etdirmək istəyib-istəməməsi hələ müzakirə olunmur. Bütün məsələlər vəziyyətin necə inkişaf edəcəyindən asılıdır”.
Daha sonra Putin bunları deyib: “Qarabağdan imtina edən biz deyildik. Bu torpaqların Azərbaycanın bir hissəsi olduğunu Ermənistan tanıyıb. Bunu bəyan edərkən Rusiyaya məlumat verilməyib”.
Putinin sətiraltı mesajından belə məlum oldu ki, Ermənistan Qarabağı qaytarmazdan əvvəl Kremllə məsləhətləşməli idi.
“Onun açıqlamasından məlum oldu ki, Ermənistanla Rusiya arasında çatlar kifayət qədər dərindir”
Sözügedən məsələni “Bakı-Xəbər”ə şərh edən politoloq Tural İsmayılov buna bir neçə prizmadan yanaşdı: “Əlbəttə ki, Putinin ənənəvi illik mətbuat konfransında Ermənistana verilən çox vacib mesajlar var idi. Bununla əslində Rusiya rəhbəri bir daha Ermənistanın yeni siyasi vektorunun və Paşinyan da daxil olmaqla sorosçuların Ermənistanda hakimiyyətə gəlişinin Rusiyanı nə qədər narahat etdiyini ifadə etdi. Eyni zamanda Putin sətiraltı olaraq növbəti dəfə Ermənistanı təhdid edib göstərir ki, əgər İrəvan Moskvanın siyasi və hərbi patronajlığı altında olan təşkilatlardan imtina etsə, onun dövlət olaraq gələcəyində çox ciddi problemlər ola bilər. Ənənəvi illik mətbuat konfransında bütün dünya mediasının olduğunu nəzərə alanda, əlbəttə ki, açıq formada Ermənistanı təhdid və şantaj edəcək bir vəziyyət müşahidə edilmədi. Ancaq çox açıq və aydın şəkildə nə qədər ritorik və loyal ifadələr işlətsə də, Putin Ermənistandan tamamilə narazı olduğunu növbəti dəfə ifadə etmiş oldu. Həmçinin bundan əvvəl Putinin özünün də dəfələrlə bildirdiyi, bununla belə Kremlin yüksək səviyyəli rəsmilərinin də söylədiyi məsələni Putin bir daha qeyd etdi. Praqada Ermənistanın Azərbaycanın ərazi bütövlüyünü tanıyarkən Rusiya ilə məsləhətləşməməsinin Moskvanı narahat edən məqam olduğunu bir daha söylədi. Əslində bütün bunlarda elə bir yenilik yox idi. Çünki bundan əvvəl, Valday da daxil olmaqla, bir sıra konfranslarda Putin Qarabağla bağlı eyni mövqeni nümayiş etdirərək bunu bir daha təkrarladı. Ancaq bütövlükdə, Putinin açıqlamasından məlum oldu ki, Ermənistanla Rusiya arasında çatlar kifayət qədər dərindir. Hətta Putinin mətbuat konfransında Ermənistanla bağlı suala verdiyi cavab erməni siyasi hakimiyyətində təmsil olunanların Rusiya əleyhinə verdiyi ritorikadan daha yumşaq idi. Bu gün Ermənistan hakimiyyətində anti-Rusiya havası daha kəskin ifadə olunur. O baxımdan hesab edirəm ki, Putinin fikirləri Rusiya-Ermənistan münasibətlərinin necə gərgin olmasını bir daha göstərdi”.
Vidadi ORDAHALLI
