İrəvanın sülh sazişinə yeni şərhində müsbət məqamlar bunlardır...
Amid Əliyev: “Ermənistanın siyasi hakimiyyəti yaranmış xaotik və çıxılmaz vəziyyətdən yeganə çıxış yolunu Azərbaycanla əməkdaşlıqda görür”
Azərbaycan xarici işlər naziri Ceyhun Bayramov dekabrın 14-də Bakıda türkiyəli həmkarı Hakan Fidanla birgə keçirdiyi mətbuat konfransında deyib ki, Ermənistandan alınan təkliflər paketi əvvəlkilərlə eyni deyil və yeni təkliflər paketində nikbinlik var.
Onun sözlərinə görə, bu addımlarla neqativ keçmişi olan məsələ addım-addım irəli aparıla bilər: “Ermənistan öz istəklərini deyil, beynəılxalq hüquqa hörməti sərgiləyərsə müsbət nəticə əldə etmək mümkündür”.
Maraqlıdır, İrəvanın sülh sazişinə yeni şərhində müsbət məqamlar nədən ibarət ola bilər?
Politoloq Amid Əliyev “Bakı-Xəbər”ə açıqlamasında bildirdi ki, XİN-də keçirilən mətbuat konfransı zamanı Ceyhun Bayramov Ermənistandan sülh sazişi ilə bağlı təkliflərin alındığını və mətndə müsbət elementlərin olmasını bildirdi: “Hesab etmək olar ki, son günlər iki ölkə arasında sülhə köklənən və humanitar yönümlü addımların atılması ümumilikdə sülh sazişinin mətninə də öz təsirini göstərib. 7 dekabr tarixində ölkələrin birgə bəyanat verməsi, son günlər qarşılıqlı olaraq əsirlərin qaytarılması və nəhayət COP29-la bağlı məhz Azərbaycanın mövqeyinin Ermənistan tərəfindən dəstəklənməsi sülh siyasətinin və iki ölkə arasında etimad quruculuğunun yaranmasına əsaslı bir işarədir. Ehtimal etmək olar ki, Ermənistanın siyasi hakimiyyəti yaranmış xaotik və çıxılmaz vəziyyətdən yeganə çıxış yolunu Azərbaycanla əməkdaşlıqda görür. Eyni zamanda bu həm də Türkiyə ilə münasibətlərin normallaşması anlamına gəlir. Heç təsadüfi deyil ki, Paşinyan Azərbaycanla yanaşı Türkiyə ilə də kommunikasiyaların açılması haqqında son zamanlar bəyanatlar verir. Hazırda iki ölkə əlavə vasitəçi olmadan da mütəşəkkil şəkildə razılaşmanın olduğunu anlayaraq sülhə doğru vacib və əhəmiyyətli addımların atılmasında olduqca israrlıdır. Əks halda bu oyuna arzu olunmayan qüvvələrin müdaxilə etməsi qaçılmaz olacaq. Bu səbəbdən də qısa müddət ərzində sülhə nail olmaq lazımdır. Məhz bu şüar altında yanvarda Vaşinqtonda XİN-ın görüşü baş tutacaq. Eyni zamanda sərhədlərin müəyyən olunması, anklavların məsələsi, Zəngəzur dəhlizi və qarşılqlı etimadın yaradılması işi də paralel olaraq aparılır. Bunlar isə, öz növbsində, sülhün olmasını zəruri edir. Yeni ildə Ermənistan siyasi hakimiyyətinin siyasi iradəsindən və atacağı addımlardan sülh gündəliyinin yan konturları müəyyən edilə biləcək”.
Məhəmmədəli QƏRİBLİ
