Paşinyan Ermənistanın kommunikasiyaların açılması üçün konkret addımlar atmağa hazır olduğunu deyir
Ermənistan regionda nəqliyyat kommunikasiyalarının açılması üzrə kəsərli və konkret addımlar atmağa hazırdır.
Trend xəbər verir ki, bunu Ermənistanın baş naziri Nikol Paşinyan dənizə çıxışı olmayan ölkələrin nazirlər iclasının açılış mərasimində deyib.
Onun sözlərinə görə, bu təşəbbüsün həyata keçirilməsi region ölkələrini daha çox imkanla təmin etməklə yanaşı, Ermənistanın dənizə çıxışını da təmin edəcək.
"30 ildən çoxdur ki, Ermənistanın Türkiyə və Azərbaycanla sərhədləri bağlıdır və bu gün biz regionda nəqliyyat kommunikasiyalarının açılması barədə çox danışır və müzakirələr aparırıq", - o deyib.
Paşinyan Ermənistanın Azərbaycanla nəinki əvvəllər mövcud olan dəmir yolu əlaqələrini bərpa etməyə, həm də yenilərini inşa etməyə hazır olduğunu deyib.
"Söhbət xüsusən şimal istiqamətində Azərbaycanın Qazax rayonunu Ermənistanın Tavuş rayonu ilə birləşdirən yoldan, cənubda isə həmçinin, Azərbaycanın qərb rayonlarını Naxçıvanla birləşdirən yoldan gedir", - deyə Paşinyan bildirib.
Paşinyan Erməistanın, həmçinin, Türkiyə ilə dəmir və avtomobil yollarının açılmasına hazır olduğunu deyib.
Xatırladaq ki, Azərbaycanın 44 günlük Vətən müharibəsində qələbəsindən sonra Azərbaycan və Rusiya prezidentləri, Ermənistanın baş naziri tərəfindən imzalanmış 10 noyabr 2020-ci il tarixli bəyanatda və ondan sonra imzalanmş digər bəyanatlarda regionda kommunikasiyaların, xüsusilə Zəngəzur dəhlizinin açılması ilə bağlı maddə əksini tapsa da, Ermənistan üç ildir ki, regionda kommunikasiyaların açılması prosesini ləngidir.
