İran prezidenti İsveçrə səfərini niyə ləğv etdi? - Həbs təhlükəsi...
İran prezidenti İbrahim Rəisi dekabrın 13-dən 15-dək Cenevrədə keçirilən Qaçqınlar üzrə Qlobal Forumda iştirak etməli idi, lakin Birləşmiş Millətlər Təşkilatı bildirib ki, Rəisinin yerinə, İran nümayəndə heyətinə Xarici İşlər naziri Hüseyn Əmir Abdullahiyan rəhbərlik edəcək.
“Azad İran” kanalı xəbər verir ki, İran prezidenti Cenevrəyə getməyəcək.
Qeyd edilir ki, beynəlxalq mediada, o cümlədən İsveçrə mətbuatında İbrahim Rəisinin Cenevrəyə səfərini onun barəsində İsveçrə prokurorluğuna verilən şikayət əsasında həbs olunmaq təhlükəsi səbəbindən ləğv etdiyi bildirilib.
O da vurğulanır ki, hələ ötən həftə Qaçqınlar üzrə Qlobal Forumda iştirak edəcək İran nümayəndə heyətinin 18 nəfərlik siyahısı yayılıb və həmin siyahıda birinci yerdə İbrahim Rəisinin adı olub. Bu məlumat İran rejiminin müxalifləri və insan haqları müdafiəçilərinin kəskin etirazına səbəb olub, o cümlədən BMT və İsveçrə dövlətinin ünvanına sərt tənqidlərə yol açıb. Lakin dekabrın 11-də İsveçrə prokurorluğuna ünvanlanan rəsmi şikayət İbrahim Rəisinin Cenevrə səfərinin qarşısını alıb və onu beynəlxalq tədbirin tribunasından istifadə etmək imkanından məhrum edib.
Cenevrədə yaşayan iranlılar isə İbrahim Rəisinin səfərinin ləğv edilməsini sevinclə qarşılayıblar.
TAHİR
