Masallı qəhrəmanı Raqib Əzizov anıldı...
Vətən naminə yağı düşmənlə döyüş zamanı ölümü ilə ölümsüzlük qazanan Masallı elinin qəhrəman oğlu şəhid Raqib Vidadi oğlu Əzizovun torpağa tapşırıldığı gündən 3 il ötdü. İgidliyi, mərdliyi dillərdə dastana dönən, yeri ürəklər olan Vətən sevdalısının uyduğu müqəddəs yer ziyarət olundu, məzarına təzə güllərdən çələng hörüldü. Mərasim iştirakçıları bununla bir daha göstərdilər ki, doğma Azərbaycanın müqəddəsliyinə tapınmaqla nəsibi möhtəşəm şəhidlik zirvəsindən boylanan səadət olan Raqib ölməyib, bundan sonra da qərinələr keçəcək həyatı örnək olaraq həmişə böyük ehtiramla xatırlanacaq.
Azərbaycan Sılahlı Qüvvələrinin giziri olan Raqib Əzizov 29 avqust 1991-ci ildə Masallının Yolağac kəndində dünyaya göz açıb. Vətənə sevgi, düşmənə nifrət ruhunda böyüyən, həmişə Qarabağın işğalına qarşı barışmaq mövqe göstərən Raqib 2009-2011-illərdə Azərbaycan Hərbi Dəniz Qüvvələrinin “N” saylı hərbi hissəsində müddətli həqiqi hərbi xidmətdə olub. Düşməndən qisas almaq məqsədilə həyatını hərbiyə bağlayıb. 2012-2013-cü illərdə Azərbaycan Silahlı Qüvvələrinin TTM-də təhsil alır və hərbidə bağlama rabitə bölüyünün mobil retranslyasiya stansiyasının rəisi vəzifəsində çalışıb. Ürəyi Vətənə, torpağa sevdalanan Raqib nümunəvi xidmət göstərməklə bərabər, həm də düşməndən alacağı öcə mükəmməl qaydada hazırlaşır.
Nəhayət, 27 sentyabr 2020-ci il başlanan Vətən müharibəsində Raqib istəyinə çatıb. Odlu-alovlu səngərdə yerini tutan qəhrəman döyüşçü zəfər günümüzə qədər erməni dığalarına qan qusdurub. 44 günlük haqq savaşımız başa çatandan sonra hərbi xidmətini davam edib. Dekabrın 8-də Xocavənd rayonunun Hadrut qəsəbəsi istiqamətində qanunsuz erməni silahlı qrupu və ya ərazidə qalmış erməni quldurlardan ibarət bir dəstə Azərbaycan Ordusunun bölmələrini atəşə tutub. Gizir Raqib Əzizov yağıya qarşı son nəfəsə qədər döyüşüb Vətən yolunda canından keçib. Görülən tədbirlər nəticəsində qanunsuz erməni hərbi dəstəsi də məhv edilib.
R.Əzizov göstərdiyi qəhrəmanlığa görə Azərbaycan Respublikasının Prezidenti İlham Əliyevin Sərəncamına əsasən ölümündən sonra “Vətən uğrunda”, Xocalının, Zəngilanın azadlığına görə medalları ilə təltif edilib.
Bəli, öz polad sinəsi ilə Vətəni alınmaz qalaya çevirən Raqib kimi qəhrəmanlarla fəxr etməyə dəyər.
Zəfər ORUCOĞLU
Azərbaycan Jurnalistlər Birliyinin üzvü
