Sülh müzakirəsində uzun fasilə yaranacaq - Ermənistan Moskvada görüşü qəbul etmədi...
Elşad Musayev: “Moskva istəyir ki, məsələlər onun meydançasında həll olunsun”
Rusiya hər zaman Azərbaycan-Ermənistan nizamlanması üzrə danışıqları qəbul etməyə hazırdır. Bunu Rusiya Federasiyası xarici işlər nazirinin müavini Mixail Qaluzin deyib.
“Moskva gözləyir ki, İrəvan və Bakı bu təklifin aktuallığını nəzərə alacaq” - Qaluzin TASS-a müsahibəsində bildirib.
Rusiya rəsmisi xəbərdar edib ki, Ermənistanda Avropa müşahidəçi missiyasının genişləndirilməsi Ermənistan-Azərbaycan nizamlanmasına töhfə verməyəcək, əksinə, Transqafqazda gərginliyi artıracaq. Onun sözlərinə görə, Aİ-nin Cənubi Qafqaz siyasəti yalnız Rusiya Federasiyasını regiondan sıxışdırıb çıxarmağa yönəlib. Bildirilir ki, Rusiya artıq Sankt-Peterburqda keçiriləcək qeyri-rəsmi sammitlə bağlı bütün MDB liderlərinə, o cümlədən Paşinyana dəvət göndərib və cavab gözləyir.
Moskva açıq deyir ki, biz danışıqlar üçün onları qəbul etməyə hazırıq. Ancaq Ermənistan da Moskvaya getmir. Rəsmi İrəvan bu danışıqların Moskvada aparılmasını açıq şəkildə istəmir və onlar Qərbə meyllənirlər. Moskva açıq şəkildə və hətta yalvaracaq dərəcədə deyir ki, gəlin bizdə danışıq aparın. Azərbaycanın mövqeyi açıq olduğu üçün danışıqların harada keçirilməsinin bizim üçün fərqi yoxdur. Bakı öz mövqeyini Moskvada da, Vaşinqtonda da ifadə edə bilər. Ancaq erməni tərəfinin danışıqların Moskvada davam etdirilməsi ilə bağlı inkarçı mövqeyi sülh sazişinin imzalanması ilə bağlı gedən prosesdə hansısa fasilə yarada bilərmi? Ermənistanın Moskvanın vasitəçilik təklifindən imtinası nə dərəcədə buna mane olacaq?
“Paşinyan indiki halda, sülh müqaviləsindən daha çox, öz hakimiyyətini qoruyub saxlamaq istəyir”
Məsələ ilə bağlı “Bakı-Xəbər”ə açıqlama verən Böyük Azərbaycan Partiyasının sədri Elşad Musayevin fikrincə, Rusiya Azərbaycan-Ermənistan danışıqlarında qarantor ölkə kimi prosesdə iştirak edir: “Eyni zamanda onu da nəzərə alaq ki, Rusiya uzun müddət bölgəni nəzarətdə saxlayıb. İndinin özündə də bölgə ilə bağlı maraqlarından bir addım da olsun geri çəkilməyib. Ermənistan-Azərbaycan münaqişəsinin nizamlanmasında da Moskva istəyir ki, onun meydançasında məsələlər həll olunsun. Kremlin nəzarəti altında bu proseslər həll edilsin. Ancaq Ermənistan tərəfi xeyli vaxtdır ki, Rusiyaya qarşı özünü ərköyün aparır. KTMT, MDB çərçivəsində keçirilən görüşlərdən imtina edir. Açıq-aşkar görünür ki, Paşinyan hökuməti Qərbə tərəf istiqamət götürüb. Baxmayaraq ki, iqtisadi baxımdan Ermənistan Rusiyadan asılıdır, sərhədlərini rus sərhədçiləri qoruyur və s. Bütün bunlara baxmayaraq, Paşinyan Qərbə doğru istiqamət götürüb. Əslində bu kimi siyasi oyunlarla Paşinyan həm Rusiyadan, həm də Qərbdən nəsə qoparmaq istəyir. Çünki bu, tipik erməni hiləgərliyidir. Zatən bəlli məsələdir ki, Paşinyanın Ermənistanı Rusiyanın təsirindən birdəfəlik çıxarmağa gücü çatmayacaq. Təbii ki, Qaluzin Rusiyanın mövqeyini ortaya qoyur. Eyni zamanda Aİ-nin müşahidəçi missiyası barədə narahatlığını bildirir. Burada bizim mövqelərimiz üst-üstə düşür. Çünki Azərbaycan da hesab etmir ki, həmin müşahidəçilər bura xoş niyyətlə gəlir. Əslində onlar xüsusi xidmət orqanlarının əməkdaşlarıdır. Onların Ermənistan-Azərbaycan sərhədində fəaliyyəti gərginliyin yaradılmasına xidmət edir. İndi əsas məsələ odur ki, sülh danışıqlarının nəticəsi necə olacaq. Azərbaycanın mövqeyi odur ki, harda olmasından asılı olmayaraq tərəflər arasında sülh sazişi imzalansın. Ermənilər isə prosesi uzadır. Çünki Paşinyana indiki halda, sülh müqaviləsindən daha çox, öz hakimiyyətini qoruyub saxlamaq istəyir. Məqsədi siyasi rəqiblərini sıradan çıxarmaq və ölkəyə vəsait cəlb etməkdir. Çünki sülh sazişi olsa, Ermənistan bir sıra kəndlərimizi azad etməlidir, Zəngəzur dəhlizinə razılıq verməlidir. Ancaq o da var ki, belə vəziyyət sonsuza qədər davam edə bilməz. Əvvəl-axır Ermənistan Azərbaycanın şərtlərini qəbul etməli olacaq”.
Vidadi ORDAHALLI
