Dinlərin mənəvi potensialı iqlim dəyişmələrinə qarşı təsirli qüvvədir - Prezidentin yeni formulu...
Tural İrfan: “Həqiqətən dinlərin mənəvi potensialı və bəşəriyyətin sabit və sağlam yaşamına xidmətdə rolu böyükdür”
Multikulturalizm və tolerantlıq məkanı Azərbaycan son illər qlobal problemlərə həsr olunan beynəlxalq tədbirlərə uğurla ev sahibliyi edir.
Bakı növbəti dəfə BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində “Dünya dinləri yaşıl planet uğrunda” şüarı altında keçirilən Dini Liderlərin Qlobal Sammitə ev sahibliyi edir və dünyanın dini liderləri bu sammitdə iştirak edir. İqlim dəyişikliyi ilə mübarizəyə, sözsüz ki, ayrı-ayrı dinlər öz töhfəsini verə bilər.
“Müxtəlif etiqad və inancların zəngin mənəvi potensialı iqlim dəyişmələrinin yaratdığı ekzistensial problemlərin həllinə təkan vermək imkanına malikdir. Dünya din xadimləri bu çağırışlarla mübarizədə böyük rol oynaya bilərlər”. Bu sözləri Prezident İlham Əliyev BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) çərçivəsində “Dünya dinləri yaşıl planet uğrunda” şüarı altında keçirilən Dini Liderlərin Qlobal Sammitinin iştirakçılarına ünvanladığı müraciətdə səsləndirib.
Ölkə başçısı vurğulayıb ki, müxtəlif dinlərin, dini inancların mənəvi potensialı iqlim dəyişmələrinə qarşı mübarizəyə töhfə vermək gücündədir.
Əvvəla, dinlərin necə bir potensialı var? İslam dininin mənəvi potensialı nələrdən ibarətdir? Dinlərdə buna ümumi yanaşma və konkret islamın potensialı nədən ibarətdir? Bu məsələyə töhfə verməkdə islam dininin mənəvi potensialı nə qədərdir?
“Hətta savaşlarda İslam Peyğəmbəri əmr edərdi ki, su quyularını doldurmayın, ağacları kəsməyin, təbiəti korlamayın”
Milli Cəbhə Partiyasının (MCP) sədr müavini, ilahiyyatçı Tural İrfan “Bakı-Xəbər”ə “Həqiqətən dinlərin mənəvi potensialı böyükdür və bəşəriyyətin sabit və sağlam yaşamına xidmətdə rolu böyükdür. Ümumbəşəri nizamın sabitliyi Allahın yaratdığı kimi qalmalıdır. Səmavi dinlər dənizlərin qurudulmasını, çayların çirkablanmasını, havanın zəhərlənməsini qadağan edir. Kütləvi qırğın silahları, hidrogen, fosfor bombaları kimi təbiətin korlanmasına səbəb olan silahların istifadəsini dinlər qadağan edir. İqlimin dəyişməsi əsasən müasir istehsalatda dünya ölkələrinin bəzilərinin təbiəti korlaması ilə əlaqəlidir.
Cənab Prezidentin ifadəsi ilə desək, həqiqətən dinlərin potensialı iqlim dəyişikliyi ilə mübarizəyə töhfə vermək iqtidarındadır. Ən mühafizəkar və ən zəif dindar belə təbiətin, iqlimin korlanmasının əleyhinədir. İslam dini isə daha güclü potensiala sahibdir. Peyğəmbərimiz buyurur ki, qiyamətin qopmasına bir gün də qalsa əlinizdəki fidanı əkin. Yəni təbiətin, ağacların, çayların, meşələrin qorunmasına xüsusi həssaslıqla yanaşılır dinimizdə. Hətta savaşlarda İslam Peyğəmbəri əmr edərdi ki, su quyularını doldurmayın, ağacları kəsməyin, təbiəti korlamayın”-deyə bildirdi.
T.İrfanın sözlərinə görə, islam dinində Allahın bəşəri nizam üçün yaratdığı təbii hadisələrin məcrasını dəyişmək qadağandır. “Yəni belə şeylər Allahın işinə qarışmaq kimi qəbul edilir və böyük günah sayılır. İqlim dəyişmələri əsasən ağır silahların istifadəsi, kimyəvi maddələrdən istehsalat zamanı havanın, təbiətin zəhərlənməsi, meşələrin məhvi zamanı baş verir ki, İslam dini də bunlara qarşıdır. İslam dininin əsas prinsiplərindən biri də ümumi, bəşəri mizanı əyilməyə qoymamaqdır. Quranda buyurulur ki, Allah hətta inkarçılara da ruzi verir ki, onlar da onun bəndələridir. Təbiəti Allah-təala insanlıq üçün xəlq edib. Süni vasitələrlə, müharibələrlə, nüvə silahları ilə iqlimin korlanmasına gətirib çıxaran əməllər İslam dinində ən ağır cinayət hesab olunur. Əxlaq normalarını ön planda saxlayan İslam dini nəinki təbiətin, iqlimin süni şəkildə dəyişdirilməsinə qarşı çıxır, hətta fərdi şəxslərin belə atmosferi korlayan mənfi vərdişlərini də haram sayır.
Qəzavü - qədərə iman, təbiət hadisələrinin orijinal məcrasına müdaxilə etməmək İslam dininin əqidə əsasıdır” - deyə T.İrfan vurğuladı.
İradə SARIYEVA
