Bölgə otellərinin bu güzəştdən sonra qiymət endirəcəklərinə şübhələr var…
Azərbaycanda fəaliyyət göstərən hotel və sanatoriyalara bəzi güzəştlər nəzərdə tutulub. Bununla bağlı Vergi Məcəlləsinə dəyişiklik edilib. Dəyişikliyə görə, yanvardan Azərbaycanın regionlarında hotel və sanatoriyaların əmlak vergisi 3 il müddətinə 75 faiz azaldılacaq.
Nəzərdə tutulan güzəşt yalnız regiondakı hotel və sanatoriyalara aid ediləcək. Bakı, Sumqayıt, Xırdalan şəhərləri və Abşeron rayonu isə istisnadır.
Yeni güzəştlər bölgələrdə otellərin qiymətinə necə təsir edəcək, azalma olacaqmı?
Elçin Rüstəm: “Bu qərar bölgələrdə yerləşən hotellərin qiymətinin nisbətən aşağı düşməsinə səbəb ola bilər”
Turizm sahəsi üzrə ekspert Elçin Rüstəm “Bakı-Xəbər”ə açıqlamasında qeyd etdi ki, bu qərar bölgələrdə yerləşən hotellərin qiymətinin nisbətən aşağı düşməsinə səbəb ola bilər. Qərar bu sahəyə müsbət təsir göstərə və dayanıqlığı təmin edə bilər”.
Ekspert hesab edir ki, turizmin inkişafı bir tək bu məsələ ilə həll olunan deyil: “Quru sərhədlərin bağlı olması turizmə ciddi zərbə vurur. Quru sərhədlərin bağlı olması turizmin inkişafını geri salır”.
Vüqar Bayramov: “Bəzi turizm obyektlərinin qiymətlərinin aşağı düşəcəyi istisna deyil, ancaq bu sahədə monitorinqlərin gücləndirilməsi olduqca vacibdir”
Millət vəkili Vüqar Bayramov bildirdi ki, 2024-cü il yanvarın 1-dən qüvvəyə minən yeni dəyişiklərə əsasən, turizm sektoru vergi güzəştlərindən istifadə edə biləcək. Vergi güzəştlərinin istifadə edilməsi, eyni zamanda turizm sektoru üçün yeni imkanlar deməkdir: “Gözlənilir ki, bu, turizm obyektlərinin xərclərinin azalmasına gətirib çıxaracaq. İqtisadi baxımdan əgər hər hansı bir sektorda vergi güzəştləri varsa, xərclər azalırsa, deməli, həmin sektorda maya dəyərinin aşağı düşməsi müşahidə olunur. Ona görə də gözlənti ondan ibarətdir ki, bu, yerli turizmdə xərclərin azalması nəticəsində həm də qiymətlərin aşağı düşməsinə gətirib çıxara bilər. Turizm sahəsində monitorinqlər davam etdirilməlidir. Buna uyğun olaraq da qiymətlərin optimallaşdırılması və azaldılması istiqamətində də mümkün və liberal iqtisadiyyatın imkan verdiyi alətlərdən faydalanmaq lazımdır. Təbii ki, xərclərin azalması fonunda gələn il yerli turizmdə qiymətlərin optimallaşdırılması mümkündür. Hətta bəzi turizm obyektlərinin qiymətlərinin aşağı düşəcəyi də istisna deyil. Çünki bunun üçün iqtisadi əsas var. Amma bütün bunlarla yanaşı, həm də bu sahədə monitorinqlərin gücləndirilməsi olduqca vacibdir”.
Günel CƏLİLOVA
