3-cü mikrorayonda yaşayış binası illərdir istiliksiz qalıb...
İsgəndər Bağırov:"Müraciətimizin üstündən iki il keçir, qarşıdan da qış mövsümü gəlir, amma hələ də biz öz hesabımıza mənzilimizə istilik xətti çəkə bilməmişik"
Payız mövsümü özü ilə vətəndaşlarımızın bəzi qayğılarını gətirib. Bilirik ki, bir sıra hallarda sakinləri ən çox narahat edən məsələlərdən biri yaşayış binalarının istiliklə təchiz edilməməsi ilə bağlıdır. Payız və qış mövsümlərində biz vətəndaşların tez-tez bu barədə narazılıqlarını eşidirik.
Bildiyimiz kimi, paytaxtın elə əraziləri var ki, orda vaxtilə mənzillərdən mərkəzləşdirilmiş istilik sistemindən gələn xətlər kəsilib. İndi isə belə vətəndaşların əksəriyyəti istəyir ki, mənzillərinə öz hesablarına istilik xətti çəkdirsinlər. Əlbəttə, bu işdə yerli qurumlar onlara dəstək olmalıdır ki, sakinlərin mənzilləri istiliklə təmin olunsun.
"Bizi get-gələ salırlar və problemi həll etmək istəmirlər"
Nəsimi rayonu, 3-cü mikrorayon, Rəşid Məmmədov küçəsi, 27-ci binanın sakinləri illərdir ki, istilik üzünə həsrət qalıblar, qışı elektrik plitəsinin ümidinə qalırlar, o da ki, hər ay külli miqdarda pul yazır. Sözügedən ünvanın sakinləri adından Bağırov İsgəndər Ağa oğlu redaksiyamızla əlaqə saxlayaraq bu məsələni ictimailəşdirməyimizi istədi. “Biz Nəsimi rayonu, 3-cü mikrorayon, Rəşid Məmmədov küçəsi, 27-ci binanın sakinləriyik. İllərdir ki, bizim binada istilik sistemi yoxdur. İki il bundan əvvəl qonşularla yığışıb Nəsimi rayon 1 saylı İstilik Sistemləri İstismar Sahəsinə müraciət etmişik ki, binamızı istiliklə təmin edinlər. Ordan bizə dedilər ki, bununla bağlı “Azəristiliktəchizat” ASC-yə müraciət edin. Biz də üz tutuq həmin quruma.
Bu qurum da müraciətimizə baxıb, təxminən iki həftədən sonra bizə məlumat verdi ki, mümkün deyil, çünki dövlətin vəsaiti yoxdur. Sonra da dedilər ki, hazırda vəsait yoxdur, vəsait olarsa sizin binaya istilik sistemi çəkərik. Mən onlarla əlaqə saxladım, dedim ki, camaat soyuqdan donur, biz nə edək? Bildirdim ki, binaya istilik sistemini öz vəsaitimiz hesabına çəkdirmək istəyirik. Razılaşdılar və dedilər 30-40 nəfər sakin yığışıb öz hesabınıza çəkə bilərsiniz. Qonşuların da əksəriyyəti razılaşmadı ki, pulumuz yoxdur, dövlət çəksin. Sonra Nəsimi rayon 1 saylı İstilik Sistemləri İstismar Sahəsinə getdim və bildirdim ki, mən də daxil olmaqla bir neçə sakin binaya öz vəsaiti hesabına istilik sistemi çəkmək istəyir, istilik xətti də uzaqda deyil, düz binamızın yanından keçir, binamıza bitişikdir. Hətta çertyoj da çəkilmişdi, biz də işə başlamaq istəyirdik ki, sonradan alınmadı. Nəsə baş verdi, bilmirəm, qış çıxdı, bu iş də yaddan çıxdı. İndi də gedirəm Nəsimi rayon 1 saylı İstilik Sistemləri İstismar Sahəsinə, deyirlər ki, ora istilik xətti çəkilə bilməz, ora istilik verilməyəcək. Mən də deyirəm ki, necə yəni verilməyəcək, bəs iki il bundan əvvəl çertyoju mənə niyə vermişdiniz? Deyirlər o çertyoju 40 nəfər sakinə görə vermişdik. Deyirəm ki, 40 nəfərə görə verilməyə ehtiyac yox idi. Onsuz da baş idarə istilik xətti çəkməyə icazə vermişdi. Özlərinə də deyirəm ki, boru xətti düz binanın böyründən keçir. Bizə vermək istəmədiyiniz istilik xətti bizim yanımızdan keçib o biri binalara gedir, onlar istiliklə təchiz olunublar, amma biz olmamışıq. Bu necə olur?”
İ.Bağırov bildirdi ki, binanın sakinlərinin hamısı istiliklə təmin olunmaq istəyir, amma istilik almaq mümkün deyil. “Müraciətimizin üstündən iki il keçir, qarşıdan da qış mövsümü gəlir, amma hələ də biz öz hesabımıza mənzilimizə istilik xətti çəkə bilməmişik. İki sakin hazırda öz hesabına istilik çəkmək istəyir.
Bizi get-gələ salırlar və problemi həll etmək istəmirlər. Ortada “Azəristiliktəchizat” ASC-nin razılığının, əlimizdə çertyojumuzun olmasına baxmayaraq, hələ də bizə istilik xətti çəkməyə icazə vermirlər. Özləri də çəkmirlər ki, hələ dövlətin vəsaiti yoxdur, pul olanda çəkərik. Demirəm ki, dövlət vəsaiti hesabına çəkilsin. Biz öz hesabımıza çəkmək istəyirik, ona da imkan vermirlər”-deyə İ.Bağırov bildirdi.
Nəsimi rayonu, 3-cü mikrorayon, Rəşid Məmmədov küçəsi, 27-ci binanın sakinlərinin üzləşdikləri problemlə bağlı Nəsimi rayon 1 saylı İstilik Sistemləri İstismar Sahəsinə zəng vursaq da, telefona cavab verən olmadı.
Ümid edirik ki, sözügedən qurum vətəndaşların müraciətinə həssas yanaşacaq və problemin həllinə dəstək göstərəcək.
İradə SARIYEVA
