Avropa komissarı ilə Pərviz Şahbazovun “xəritə söhbəti” erməni lobbisinə zərbədir...
![Image](/uploads/posts/2023-12/sahbazov.webp)
Firdovsi Şahbazov: “Məlum qərar erməni lobbisinin pozucu planlarının üzərindən xətt çəkdi”
Energetika naziri Pərviz Şahbazov bəyan edib ki, Azərbaycan-Avropa İttifaqı Strateji Enerji Tərəfdaşlığı sənədinin icrası ilə bağlı yol xəritəsinin yenilənməsi barədə razılıq əldə olunub:
“BƏƏ-də Aİ-nin enerji məsələləri üzrə komissarı Kadri Simson ilə görüşdə Cənub Qaz Dəhlizi və Yaşıl Enerji Dəhlizi, enerji dialoqumuzun digər prioritetlərinə dair səmərəli müzakirələr apardıq. Azərbaycan-Aİ Strateji Enerji Tərəfdaşlığı sənədinin icrası ilə bağlı yol xəritəsini yeniləməyi razılaşdırdıq”.
Qeyd edək ki, Azərbaycan və Avropa İttifaqı 2022-ci ilin iyulun 18-də yaxın beş il üçün Energetika sahəsində strateji tərəfdaşlıq haqqında qarşılıqlı anlaşma Memorandumu imzalayıb. Sənədi Azərbaycan prezidenti İlham Əliyev və Avropa Komissiyasının rəhbəri Ursula fon der Lyayen imzalayıb.
Bu günlərdə bilavasitə erməni lobbisinin təşəbbüsü ilə Avropa Parlamenti Azərbaycanla bağlı hesabat müzakirəyə çıxarmışdı. Hesabatda Aİ-ni Azərbaycana qarşı sanksiya tətbiq etməyə çağırırdılar. Ən əsası isə, Aİ-ni Azərbaycanla imzaladığı Strateji Enerji Tərəfdaşlığı sənədindən imtina etməyə çağırırdılar. Guya Azərbaycan neft-qazla Avropaya təzyiq göstərir. O baxımdan Azərbaycan-Aİ Strateji Enerji Tərəfdaşlığı sənədinin icrası ilə bağlı yol xəritəsinin yenilənməsi qurumun erməni lobbisinə bir cavabıdır.
“Bu və digər məsələlərdən çıxış edərək Avropa İttifaqı Azərbaycana xüsusi önəm verir”
Məsələ ilə bağlı “Bakı-Xəbər”ə açıqlama verən iqtisad üzrə fəlsəfə doktoru Firdovsi Şahbazov hesab edir ki, Avroittifaqın son qərarı həqiqətən də erməni lobbisinə güclü zərbə oldu: “Çünki sentyabrda Qarabağda həyata keçirilən lokal xarakterli antiterror əməliyyatlarından sonra bununla bağlı Azərbaycana qarşı güclü kampaniyaya başlanıldı. Erməni tərəfi məhz bu yöndə Azərbaycana zərbə vurmaq istəyirdi. Özü də bu məsələdə təkcə erməni lobbisi yox, Fransa da xüsusi canfəşanlıq göstərirdi. Məqsəd o idi ki, Azərbaycan və Avropa İttifaqı arasında imzalanan Energetika sahəsində strateji tərəfdaşlıq haqqında qarşılıqlı anlaşma Memorandumu işləməsin. Hətta bir ara Avropa mediasında belə məlumatlar gedirdi ki, Avropa İttifaqı bununla bağlı layihələri maliyyələşdirməyəcək. Artıq Azərbaycan bu baxımdan qurum üçün cazibədarlığını itirib və s. Lakin enerji sahəsində yol xəritəsinin yenilənməsi qərarı erməni lobbisinin pozucu planlarının üzərindən xətt çəkdi. Ən azından ona görə ki, Azərbaycan olmadan Avroittifaqın Mərkəzi Asiya ölkələri ilə səmərəli nəqliyyat-tranzit əlaqələri mümkünsüzdür. Azərbaycansız həmin regionun enerji və digər resurslarının Avropa bazarına çıxarılması real görünmür. Bu və digər məsələlərdən çıxış edərək Avropa İttifaqı Azərbaycana xüsusi önəm verir. Enerji sahəsində yol xəritəsinin yenilənməsi indiyə qədər mövcud olan bəzi şübhələrə də son qoydu”.
Vidadi ORDAHALLI