Əsgəran qalasını düşmən əsarətindən elə bunun üçün azad etdik?!
Flora Hacıyeva: “Azad edilən ərazilərin zibillənməsi, natəmiz olması təəssüf doğurur”
Azərbaycan ərazisi müdafiə məqsədilə tikilən istehkam və qalalarla zəngindir. Bunlardan biri də Əsgəran qalasıdır. XVIII əsrdə Qarabağ xanı Pənahəli xanın göstərişi ilə inşa olunan Əsgəran qalası Azərbaycan memarlığının parlaq nümunələrindəndir.
Qalanın tikilməsi Qarabağ xanlığının yüksəliş dövrü ilə əlaqəli olub. Əsgəran qalası Şuşanın təxminən 24, Xocalının 5 kilometrliyində və Ağdam şəhərinin 12 km cənubunda, Qarqarçayın sağ və sol sahillərindəki dağ döşündə yerləşir. 1992-ci ildə Xocalı şəhəri Ermənistan silahlı qüvvələri tərəfindən işğal olunduqdan sonra qala dağıntılara məruz qalıb.
İkinci Vətən müharibəsindən sonra işğal altında olan torpaqlar azad olundu. Uzun illər torpaqlarımızın işğaldan azad ediləcəyi günü həsrətlə gözləmişik. Ordumuzun şücaəti, qazilərimizin canı, şəhidlərimizin qanı hesabına düşmən tapdağından azad etdiyimiz ərazilərin təmizliyinə riayət edirikmi? Təəssüf ki, edə bilmirik. Sosial şəbəkədə yayılan görüntülərə əsasən, Əsgəran qalasının ətrafı zibilliyə çevrilib. Məlumdur ki, Qarabağda, azad olunmuş ərazilərdə tikinti-quruculuq işləri gedir, bu gün Prezident İlham Əliyev o torpaqları cənnətə çevirir, bütün gücümüz, potensialımız o ərazilərin nümunəvi bərpasına yönəlib. Hər bir vətəndaş da azad ərazilərin inkişafına töhfə verməli olduğu halda, təbiət düşmənləri öz neqativ əməllərindən qalmırlar, şəhidlərin qanı ilə azad edilən torpaqları zibilləyirlər.
“Təəssüf ki, işğaldan azad edilən torpaqların bəzi hissəsi, elə Əsgəran qalası özünübilməz vətəndaşlar tərəfindən natəmizliyə məruz qalır”
Ekoloq Flora Hacıyeva “Bakı-Xəbər”ə şərhində bildirdi ki, azad edilən ərazilərin zibillənməsi, natəmiz olması təəssüf doğurur: “Təbiəti qorumaq hər bir vətəndaşın əsas borcu olsa da, çox təəssüflər olsun ki, biz bir sıra hallarda təbiətə etinasız münasibət göstərilir. Təəssüf ki, işğaldan azad edilən torpaqların bəzi hissəsi, elə Əsgəran qalası özünübilməz vətəndaşlar tərəfindən natəmizliyə məruz qalır. Sosial şəbəkədə yayılan görüntülər üzücüdür. Bəzi vətəndaşlarımız bu ərazilərə səfər edərkən mənəvi dəyərlərimizə zidd olaraq tullantıları o ərazilərə atırlar. Məndə olan məlumata görə, Dövlət Ekoloji Təhlükəsizlik Xidməti və “Təmiz şəhər” ASC ilə birgə Xocalıda yerləşən Əsgəran qalasının ətrafını tullantılardan təmizləyir. O ərazilərə çirkləndirmək günahdır. Çünki o torpaqların hər bir qarışında şəhidlərimizin, qazilərimizin, ordumuzun, dövlətimizin gücü, əməyi var. O torpaqları qorumaq, təmiz saxlamaq lazımdır”.
Günel CƏLİLOVA
