Bu qrupların heç birində deyilsənsə, meyitin ortada qalacaq - Azərbaycan təzahürü...
İlqar Hüseynli: “Faktiki olaraq, bu məsələdə vətəndaşlara münasibətdə sosial ədalətsiz bölgü prinsipi aparılır”
Hazırda Azərbaycanda pensiyaçı şəxslərin yaxınlarına dəfn üçün verilən müavinətin məbləği minimum (280 manat) pensiyanın 3 misli qədər, yəni 840 manatdır. Pensiyaçı olmayanlar üçünsə müavinətin məbləği 500 manat hesablanıb.
Qanunvericiliyə görə, dəfn üçün müavinət sığorta olunan, əmək pensiyası və ya sosial müavinət alan, habelə işsizlikdən sığorta ödənişini alan şəxslər vəfat etdikdə verilir. İşsiz və ya rəsmi iş yeri olmayanlar, pensiya və sosial müavinət, eləcə də işsizlikdən sığorta ödənişi almayan şəxslər vəfat etdikdə dəfn üçün müavinətin verilməsi mövcud qanunvericilikdə nəzərdə tutulmayıb.
Belə baxanda, işsiz şəxslərin ailəsinin dəfn üçün həmin məbləğə daha çox ehtiyacı var. Yəni bu kateqoriyaların heç birinə aid olmayan, işsizlikdən sığorta ödənişi almayan, pensiya, müavinət almayan şəxslər də var axı. O zaman bu şəxslərin dəfn xərcləri necə olmalıdır? Elə adamlar var ki, işləmir, işsizlikdən sığorta olunmayıb. Bu səbəbdən sığorta ödənişi almır. Həmçinin pensiya və müavinət də almır. Belə adamların sayı kəskin dərəcədə çox olmasa da, hər halda var. Bəs belələrinin dəfn məsələsi necə olmalıdır?
“Elə bir mexanizm tətbiq olunmalıdır ki, işsiz, sığortasız vətəndaşlar bundan məhrum olmasınlar”
Məsələ ilə bağlı “Bakı-Xəbər”ə açıqlama verən ekspert İlqar Hüseynlinin sözlərinə görə, ümumiyyətlə, bu məsələdə çox ciddi bir diskriminasiya halı var: “Yəni faktiki olaraq, bu məsələdə vətəndaşlara münasibətdə sosial ədalətsiz bölgü prinsipi aparılır. Əslində belə baxanda daha çox işsiz olan, daha çox maddi ehtiyacları olanlara dəfnpulu verilməlidir. Onlara yardım edilməlidir ki, cənazələri ortada qalmasın. Bununla bağlı konkret mexanizm olmalıdır. Bu elə məsələdir ki, burada ayrı-seçkiliyə yol vermək olmaz. Hesab edirəm ki, bu şərtləndirmə amili bütün ölkə vətəndaşlarına aid olmalıdır. Yəni burada kim sosial sığorta imkanlarına malikdir, kim pensiya alır və yaxud da almır, buna fərq qoyulmamalıdır. Fərq qoyulmadan bütün Azərbaycan vətəndaşlarına bərabər şəkildə şamil olunmalıdır. Elə bir mexanizm tətbiq olunmalıdır ki, işsiz, sığortasız vətəndaşlar bundan məhrum olmasınlar. Ona görə də hesab edirəm ki, sözügedən məsələyə yenidən baxılmalıdır”.
Vidadi ORDAHALLI
