Baqramyanın doğulduğu Çardaqlı hansı dövlətin torpağıdır, ay saxtakar dığalar?..
Qasım Hacıyev: “Satqın Baqramyanın Azərbaycanda doğulduğunu yazmamaqla guya nəsə əldə etmək istəyirlər…”
Ermənilər Sovet marşalı İvan (Ovannes) Baqramyanı elə şişirdirlər ki, sanki o olmasaydı İkinci Dünya müharibəsində Sovet qoşunları qalib gələ bilməzdi. Tarixə iki dəfə Sovet İttifaqı Qəhrəmanı, general Həzi Aslanovun ölümünün baiskarı kimi düşən İ.Baqramayanın Azərbaycan Respublikasının Şəmkir rayonun Çardaqlı (Çənlibel) kəndində doğulduğu məlumdur.
Bu onun bioqrafik məlumatlarında da əks olunub. Amma son zamanlar Ermənistan mediası və erməni tədqiqatçıları Baqramayanın Azərbaycanda doğulduğunu yazmırlar. Bu günlərdə onun 126 illiyi ilə bağlı erməni mediasında yazı dərc edilib, yazıda göstərilir ki, Ovannes Xaçaturoviç Baqramyan 1897-ci ildə Çardaqlı kəndində yoxsul erməni ailəsində doğulub.
Amma qeyd edilmir ki, Baqramyan Azərbaycanın Şəmkir rayonunun Çardaqlı kəndində doğulub. Çardaqlının adını yazmaqla kifayətləniblər. Bununla da Azərbaycanın ərazi bütövlüyünə xələl gətirmək istəyirlər. Çardaqlının hansı ölkənin ərazisi oldugunu göstərməməklə yenə də tarixi təhrif edirlər.
“Çardaqlının hansı ölkənin ərazisi olduğunu qəsdən yazmırlar, tarixi təhrif edirlər”
AMEA-nın Qafqazşünaslıq İnstitutunun Qafqaz tarixi şöbəsinin müdiri, professor Qasım Hacıyev “Bakı-Xəbər”ə şərhində bildirdi ki, erməni saxtakarlığı bitib-tükənmək bilmir. “Görürsüz ki, saxtakarlıq bunların artıq milli xarakterinə çevrilib. Bu toplum heç zaman yanaşı yaşadıqları xalqlarla münasibətlərini normal şəkildə qoruyub saxlaya bilmir. Ovannes Baqramyanın Azərbaycanda doğulduğu faktdır. Bu adam Sovet İttifaqı qəhrəmanı olub və onu da hansı yolla aldığı məlumdur. Ermənilər sonradan Baqramyanın adına batalyonlar yaratdılar. Ermənilər onun mənfurluğu ilə fəxr edirlər. Onun iki dəfə Sovet İttifaqı Qəhrəmanı Həzi Aslanova qarşı gizlin tələlər qurduğu məlumdur.
Ermənilər Baqramyanın Çardaqlıda doğulduğunu yazsalar da, Çardaqlının hansı ölkənin ərazisi olduğunu qəsdən yazmırlar, tarixi təhrif edirlər. Çardaqlının Azərbaycan kəndi olduğunu ona görə qeyd etmirlər ki, müəyyən mənada çaşbaşlıq yaratsınlar. Bu da onların ərazi iddiaları ilə bağlıdır”-deyə Q.Hacıyev bildirdi.
Q.Hacıyevin sözlərinə görə, ermənilər nədən danışırlar-danışsınlar, nədən yazırlar-yazsınlar, mütləq orada yalan və saxtakarlıq olacaq. “Onların revanşist istəkləri hələ sönməyib. Hər zaman Azərbaycana qarşı nifrət, kin tökürlər. Bu da onların özlərinə daha çox ziyan edəcək.
Satqın Baqramyanın Azərbaycanda doğulduğunu yazmamaqla guya nəsə əldə etmək istəyirlər, amma belə şeylərlə heç nə qazanmaq olmaz. Baqramyan elə parlaq sima deyil ki, onunla fəxr edilsin, xəyanətkar olub. Stalin ona kəskin nifrət edirdi. O, öz silahdaşlarına xain olan adam idi və marşal rütbəsinə də satqınçılıqla gəlib çıxmışdı. Bunları demək lazımdır. Baqramyan Sovet marşalı olsa da, daxilən daşnak idi. Onu daşnak Mikoyanın himayə etdiyi də məlumdur”-deyə Q.Hacıyev qeyd etdi.
İradə SARIYEVA
