Region məktəblərində şagirdlərin sayı azalır - problemi nazirlik də bilir...
Elçin Əfəndi: “Şagird sayının azalması əhalinin təbii artımı ilə bağlıdır”
“Region məktəblərində şagird sayının azalması hiss olunur. Bu, müəllimlərin müraciətlərində, eləcə də şagird yerdəyişmələrində müşahidə edilir”. Bunu Elm və Təhsil Nazirliyinin Məktəbəqədər və Ümumi təhsil üzrə Dövlət Agentliyinin direktoru Eşqi Bağırov deyib.
E.Bağırov bildirib ki, kənd məktəblərində şagird sayının azalması ölkə üzrə doğum saylarındakı nisbətin aşağı düşməsi ilə müşahidə olunur: “Lakin buna görə kəndlərdə məktəblərin bağlanması və ya onun tam orta məktəbdən ümumi təhsil məktəbinə çevrilməsi müşahidə olunmayıb. Əksinə, 9 illik təhsil müəssisəsindən 11 illik təhsil müəssisəsinə çevrilən məktəblərimiz var”.
Qeyd edək ki, Milli Məclisin plenar iclasında büdcə müzakirələri zamanı millət vəkili Musa Qasımlı da problemin olduğunu təsdiqləyib. Millət vəkili bildirib ki, kəndlərində ən müasir məktəblər tikilsə də, insanların şəhərə gəlməsi nəticəsində şagirdlərin sayı azalır, məktəblərin bağlanması təhlükəsi yarandığından yeni iş yerlərinin açılmasına ehtiyac var.
Maraqlıdır, rayonlarda uşaq sayı azdır, yoxsa valideynlər məktəblərdəki şəraitsizlik səbəbindən övladlarını məktəbə yollamırlar və ya rayon camaatının şəhərə üz tutması bu mənzərəni yaradır?
“Bəzi ərazilərdə şagird sayının azalmasına urbanizasiya da təsir edir, proses belə davam edərsə, bəzi bölgələrdə təhsil müəssisələri bağlana bilər”
Bölgə məktəblərində şagird sayının azalması barədə fikir bildirən təhsil üzrə ekspert Elçin Əfəndi qeyd etdi ki, son illər şagird sayında ciddi azalma əhalinin təbii artımı ilə bağlıdır: “Məlumat üçün bildirim ki, paytaxtda təhsil alan şagirdlərin sayı təxminən 500 minə yaxındır. Ölkə üzrə 1 milyon 600 min şagirdin bir milyondan çoxu regionların payına düşür. Bəzi ərazilərdə şagird sayının azalmasına urbanizasiya da təsir edir. Proses belə davam edərsə, bəzi bölgələrdə təhsil müəssisələri bağlana bilər. Ona görə də, sosial-iqtisadi proqramlar həyata keçirilməli, regionlarda məşğulluğun təmin olunması istiqamətində tədbirlər gücləndirilməlidir".
Günel CƏLİLOVA
