30 il işğal bölgəsinə bircə YUNESKO məmurunu buraxmadı, indi Azərbaycanı ittiham edir...
Yadigar Məmmədli: “Ermənistanın belə tələblə çıxış etməyə haqqı yoxdur”
Ermənistan Xarici İşlər Nazirliyi növbəti dəfə Azərbaycana yönəlik bəyanatla çıxış edib.
Bəyanatda qeyd edib ki, Azərbaycan Qarabağa YUNESKO missiyasının göndərilməsi təşəbbüsünü əngəlləməkdə davam edir: “Bakı hələ də Dağlıq Qarabağa YUNESKO missiyasının göndərilməsi təşəbbüsünün qarşısını alır. Azərbaycanın bu məsələdə destruktiv mövqeyi mədəni irsin qorunması sahəsində bütün beynəlxalq konvensiyalara ziddir. Bundan başqa, Beynəlxalq Qafqaz İrsini Mühafizə Təşkilatı – “Caucasus Heritage Watch” Şuşada iki erməni qəbiristanlığının dağıdılması barədə məlumat yayıb. YUNESKO-nun ekspert missiyası məsələsində Azərbaycanın destruktiv mövqeyi mədəni irsin mühafizəsi sahəsində bütün beynəlxalq konvensiyalara, o cümlədən “Silahlı münaqişələr zamanı mədəni sərvətlərin mühafizəsi haqqında” 1954-cü il Konvensiyasına ziddir”.
Nə qədər həyasız olmalısan ki, belə bəyanatla çıxış edəsən? Erməni tərəfi nə üzlə YUNESKO missiyasından danışır ki, 30 il bu qurumu və digər təşkilatları işğal altında olan ərazilərimizə buraxmadılar?
“İşğal dövründə bir dəfə də olsun YUNESKO həmin ərazilərə səfər təşəbbüsü ilə çıxış etməyib”
Məsələ ilə bağlı “Bakı-Xəbər”ə açıqlama verən media eksperti Yadigar Məmmədli hesab edir ki, Ermənistanın belə tələblə çıxış etməyə haqqı yoxdur: “O baxımdan Ermənistan XİN-in məlum bəyanatı gülüncdür. Ən azından ona görə ki, bunun məntiqi əsası yoxdur. Daha dəqiq desək, reallıqdan uzaq bir bəyanatdır. Ermənilərin azacıq vicdanları olsaydı, bu barədə danışmazdılar. Çünki 30 illik işğal dövründə Azərbaycana, dünyaya, İslam irsinə məxsus olan mədəni irsi məhv ediblər. Özü də vandalcasına dağıdıblar. İndi utanmadan Azərbaycanı belə şeylərdə ittiham edirlər. İşğal dövrandə bir dəfə də olsun YUNESKO həmin ərazilərə səfər təşəbbüsü ilə çıxış etməyib. Müxtəlif bəhanələrlə çıxış ediblər. Ərazilərimiz işğaldan azad edildikdən sonra dəfələrlə Azərbaycan YUNESKO-nu dəvət edib ki, Qarabağda törədilən vandalizmi öz gözləri ilə görsünlər. Təəssüflər olsun ki, YUNESKO bundan imtina edir. Adını da belə qoyurlar ki, onlar siyasi məsələlərə qarışmırlar. Mədəni, tarixi abidələrimiz məhv edilib, bunlar deyir siyasi məsələlərə qarışmırıq. Bununla bağlı YUNESKO xüsusi missiya göndərmir. Tam əksinə olaraq, Azərbaycan barədə mənfi rəy formalaşdırılır. Yalançı erməni təbliğatı əsas götürülərək iddia olunur ki, guya Azərbaycan erməni mədəni abidələrini, məzarlıqları dağıdıb. Bunu əllərində əsas kimi göstərən beynəlxalq təşkilatlar bizə təzyiq edir. Bax, belə ədalətsiz bir dünyada yaşayırıq. Haqlı ikən, bizi haqsız duruma salmağa çalışırlar. Halbuki, Azərbaycan hər zaman YUNESKO-nun işğaldan azad olunmuş ərazilərə səfər etməsində maraqlı olub”.
Vidadi ORDAHALLI
