Paşinyan KTMT-dən çıxışa əsas yaradan növbəti ideyanı verdi...
Elxan Şıxəliyev: “Yaxın 5 ildə Ermənistan öz silahlı qüvvələrini 2020-ci il 27 sentyabr vəziyyətinə gətirə bilməz”
Ermənistan 2018-2019-cu illərdə müxtəlif ölkələrdən silah almağa çalışıb, lakin buna KTMT-dəki üzvlük amili mane olub.
Bunu noyabrın 24-də Ermənistanın Baş naziri Nikol Paşinyan canlı yayımda vətəndaşların suallarını cavablandırarkən deyib:
“Sizcə, 2018-2019-cu illərdə biz eyni silahların tədarükünü diversifikasiya etməyə çalışmadıq? Müzakirə çox qısa, bir neçə dəqiqə davam etdi. Bizə dedilər ki, siz KTMT-nin üzvüsünüz, biz sizinlə hərbi-texniki əlaqələrə girə bilmərik. Mövqelərimizdə şəffaf olmağımız bizə bu söhbəti çox tez yekunlaşdırmaq və bəzi perspektivləri müzakirə etmək imkanı verdi. Əgər biz KTMT-nin üzvü kimi lazımi silahı və siyasi dəstəyi ala bilmiriksə, o zaman digər tərəfdən Təşkilata üzvlük başqa yerlərdən dəstək və əməkdaşlıq əldə etmək üçün keçilməz maneədir. Biz öz maraqlarımıza əsaslanaraq qərarlar verməliyik”.
Bu, həqiqətən belədir, yoxsa Paşinyan KTMT-dən çıxmaq üçün bəhanə edir? Axı Ermənistan Fransadan, Hindistandan və başqa ölkələrdən silah alıb.
Hərbi-siyasi ekspert, ehtiyatda olan polkovnik-leytenant Elxan Şıxəliyev “Bakı-Xəbər”ə açıqlamasında bildirdi ki, Ermənistanın silah almaq məsələsinin səbəb və nəticə konteksində qiymətləndirilməsi zəruridir: “Mütləq silahlanmalıdır və nə üçün? Hərbi texniki parkının 60 faizini Azərbaycan silahlı qüvvələri 44 günlük müharibədə sıradan çıxarıb. İndi əgər bölmələr varsa, bölmələrin şəxsi heyəti komandirlər tələb edir ki, hərbi texniki park təmin edilsin. İndiki mərhələdə səbəb Ermənistanın silahlı qüvvələrini 2020 - ci ilin 27 sentyabr səviyyəsinə çatdırmaq cəhdləridir. Biz tərəfdən baxanda, təbii ki, silahlanma kimi görsənir. Amma Ermənistan bunu etməyə bilməz. Digər bir məsələ isə, silahların alınmasının kim tərəfindən təmin ediləcəyi və satılacağıdır. Ermənistanın, xüsusən də Fransa və Hindistandan silah alması onun məcburi seçimi idi. Məcburi seçim nə deməkdir? Ermənistanda öncə, xüsusən 2018 - ci ilə qədərki mərhələdə Rusiyaya qarşı ab-hava başladı. 2018 - ci ilə qədər hərbi texniki arsenal parkının 90 faizi sovet, sonra da Rusiya istehsalı olan hərbi texniki avadanlıqlar, atıcı silahlardan ibarət idi. Xüsusən də artileriya vasitələri, hava hücumundan müdafiə vasitələri, aviasiya vasitələri mövcuddur. İndi sıradan çıxarılmış hərbi texniki park mövcud olmalıdır. Ancaq Rusiya onlarla hərbi texniki təminat üzrə əməkdaşlıq etmir. Çünki onlar Rusiyaya xəyanət etdilər. Rusiya gördü ki, Ermənistan onun tabeliyindən çıxmaq niyyətindədir. Ermənistanın Rusiyaya əvvəlcədən ödəmiş olduğu, hətta qarşılığında almadığı silahlar, hərbi texniki park da var idi. İndi onun da mübarizəsi gedir ki, o pulları Rusiya qaytaracaq, ya qaytarmayacaq. Təbii ki, indi Rusiya bunu satmirsa, silahlanmalarında yerdə qalan 20, 30 faizin arxası gəlməyəcək. Silahlı qüvvələrdə yenilənmə olmalıdır. Döyüş komplektləri köhnəlirsə, bunun yeri yenilərlə doldurulmalıdır. Rusiya bunu təmin etməyəcəksə, yeni bazarlar tapmalıdırlar. Fransa və Hindistan da bu fürsətdən istifadə etdilər. Transmilli hərbi sənaye korporasiyaları silah, texnika istehsal edib satmalıdır. Bu səbəbdən Ermənistan məcburi olaraq Fransa satır, Fransaya yönəlir, Rusiya satırsa ona yönəlir. Amma bu avantajsız olacaq Ermənistan üçün. Çünki dediyim hərbi texniki park öncəki Rusiya sovet texnikasını yaxın zamanda Fransadan, Hindistandan təmin etdiyi parkla tezliklə dəyişə bilməyəcək. Döyüş komplektləri, artilleriya vasitələri mərmilərinin dəyişilməsi asan məsələ deyil. Ermənistan hər vəchlə əlində olan hərbi texnikanın davamını idarə edə bilməsi üçün Rusiya ilə əməkdaşlıq etməyə cəhd göstərəcək, ancaq Rusiya Paşinyan hakimiyyətdə olduğu müddətcə bunu etməyəcək. Bu da olmasa, Ermənistan başqa bazarlara yönəlmiş olacaq. İndi Ermənistan nə edirsə, xoşluqla yox, məcburiyyətlə edir. Bizim əsas ehtiyatlanacağımız məqam Ermənistan silahlarının bizlə müharibə edəcəyi məsələsi deyil. Yaxın 5 ildə Ermənistan öz silahlı qüvvələrini 2020 - ci il 27 sentyabr vəziyyətinə gətirə bilməz. Görüntü olaraq sadəcə prosesin içindədirlər. Belə deyək. KTMT ilə bağlı deyilənlər isə sadə manipulyasiyadan başqa nəsə deyil”.
Məhəmmədəli QƏRİBLİ
