BMT kiçik ada dövlətlərinə “Bakı prosesi” ilə bağlı tapşırıq verdi...
Məhərrəm Zülfüqarlı: “BMT-nin bu yöndə kiçik ada dövlətlərinə tövsiyələri, tapşırıqları onu deməyə əsas verir ki, artıq dünya ictimaiyyəti Bakı Təşəbbüs qrupunun uğurlu bir platforma olduğunu qəbul edir”
Bakı Təşəbbüs Qrupunun təşkilatçılığı ilə BMT-nin Nyu-Yorkdakı Baş Qərargahında “Müstəqillik və fundamental azadlıqlara doğru: müstəmləkiçiliyə son qoyulmasında C-24 komitəsinin rolu” mövzusunda keçirilən beynəlxalq konfransda kolonial ölkə olan Fransanın Yeni Kaledoniya, Korsika və Martinikdə zorakılıqları pislənilib.
BMT-də müstəmləkə altında olan ölkələr və xalqlara müstəqillik verilməsi haqqında bəyannamənin icrası ilə bağlı yaradılmış xüsusi Komitə - C24-ün illik iclası çərçivəsində baş tutan tədbirdə Fransız Polineziyasının hakim Tavini Partiyasının siyasi məsələlər üzrə direktoru Richard Tuheiava, eləcə də Saint-Martin, Korsika, Martinik, Fransız Qvianası, Qvadelupe və Bonayredən olan müstəqillik hərəkatı üzvləri onları müstəmləkə altında saxlayan Fransa və Niderland hökumətlərinin bu ərazilərdə həyata keçirdiyi kolonial siyasət, habelə ərazinin sahibi olan yerli xalqların fundamental hüquqlarının kobud şəkildə pozulması, təbii sərvətlərinin qanunsuz talan edilməsi və beynəlxalq öhdəlikləri yerinə yetirməməsi haqqında ətraflı məlumat veriblər və yerli xalqların tələblərinə məhəl qoymayaraq, hələ də müstəmləkəçilik siyasətini davam etdirməsini sərt şəkildə qınayıblar.
İştirakçılar təmsil etdikləri xalqların tələblərini və səsini dünya ictimaiyyətinə çatdıran Azərbaycana dərin minnətdarlıq ifadə ediblər və beynəlxalq platforma rolunu oynayan Bakı Təşəbbüs Qrupunun dəstəyi ilə müstəqilliyin uzaqda olmadığına inam ifadə ediblər.
Konfransın sonunda siyasi müraciət qəbul olunub. İştirakçılar BTQ tərəfindən təşkil edilən regional və qlobal tədbirlərdə iştiraklarını daha da fəallaşdırmaq, BMT çərçivəsində öz mübarizələrini gücləndirməyə dair öhdəlik götürüblər.
Xatırladaq ki, tədbirdə hazırda Fransa və Niderlandın işğalı altında olan 8 ərazidən - Korsika, Fransız Qvianası, Qvadelupe, Martinik, Maohi Nui (Fransız Polineziyası), Kanaki (Yeni Kaledoniya), eləcə də Sent-Martin, Bonayre, həmçinin ABŞ, Fransa, Braziliya, Qəmər Adaları İttifaqı, Qayana və Niderlanddan rəsmi şəxslər, müstəqillik hərəkatlarının rəhbər şəxsləri, dekolonizasiya üzrə ekspertlər, deputatlar və tədqiqatçılar iştirak edib. Eyni zamanda El-Salvador, Argentina, Suriya, Əlcəzair, Braziliya və Fələstinin BMT-dəki daimi nümayəndəliklərinin diplomatları konfransın işinə qatılıb.
BMT-də bu tədbirdə qərar verilib ki, bu ölkələr Bakı Təşəbbüs Qrupu ilə əməkdaşlığı gücləndirsinlər.
“...Bu qərardan sonra bu əlaqələr, əməkdaşlıqlar daha da dərinləşəcək”
Mövzuya şərh verən AVCİYA-nın vitse-prezidenti, siyasi şərhçi, professor Məhərrəm Zülfüqarlı “Bakı-Xəbər”ə şərhində bildirdi ki, BMT-nin ofisində keçirilən bu tədbirdə verilən qərar çox mühüm əhəmiyyətə malikdir. M.Zülfüqarlı hesab edir ki, Bakı Təşəbbüs Qrupunun müstəmləkəçiliyə məruz qalan xalqların haqlarının tanıdılması istiqamətində gördüyü işlərə BMT tərəfindən yüksək qiymət verilməsi təqdirəlayiqdir. “Fransa və başqa Qərb ölkələrinin müstəmləkəçilik, istismarçı siyasətindən əziyyət çəkən, əzilən, haqları tapdanan kiçik ada dövlətlərinin hüquqlarının müdafiəsinə BMT-nin diqqət ayırması müsbət haldır. Əlbəttə, bu istiqamətdə beynəlxalq platforma rolunu Bakı Təşəbbüs Qrupu oynayır və o xalqlara ciddi dəstək verir. BMT-də qəbul olunan qərar bir daha sübut etdi ki, Bakı Təşəbbüs Qrupu düzgün yol seçib və bu platforma kiçik ada dövlətlərinin müstəqilliyə gedən yolunda bir mayak rolunu oynayır. Kiçik ada dövlətlərinin təmsilçiləri mütəmadi olaraq Bakı Təşəbbüs Qrupu ilə yaxından əməkdaşlıq edir, bu qərardan sonra bu əlaqələr, əməkdaşlıqlar daha da dərinləşəcək. Əlbəttə, Bakı Təşəbbüs Qrupu ilə kiçik ada dövlətlərinin əlaqələrinin gücləndirilməsi nəticəsində biz çox uğurlu hadisələrin şahidi olacağıq. Bilirsiz ki, kiçik ada dövlətlərinin müstəmləkəçiliyə qarşı mübarizəsində Azərbaycan ictimaiyyəti onlara böyük dəstək verib. Bakı Təşəbbüs Qrupunun yaradılması o dəstəyi daha da canlandırdı. BMT-nin bu yöndə kiçik ada dövlətlərinə tövsiyələri, tapşırıqları onu deməyə əsas verir ki, artıq dünya ictimaiyyəti Bakı Təşəbbüs Qrupunun uğurlu bir platforma olduğunu qəbul edir”.
M.Zülfüqarlı hesab edir ki, kiçik ada dövlətlərinin hüquqlarının, müstəqillik arzularının dəstəklənməsi istiqamətində, onların haraylarının beynəlxalq aləmə çatdırılması yönündə Bakı Təşəbbüs Qrupunun həyata keçirdiyi tədbirlər bütün dünyada müstəmləkəçiliyə qarşı mübarizənin ən unikal formasıdır.
M.Zülfüqarlı qeyd etdi ki, bütün dünya müstəmləkıçiliyə qarşı mübarizdə kiçik ada dövlətlərinin yanında olmalıdır.
“XXI əsrdə kolonizm siyasətinin yürüdülməsi, Fransa başda olmaqla bəzi Avropa dövlətlərinin bu yöndə siyasət həyata keçirməsi qəbuledilməzdir. Hazırda Fransanın müstəmləkələrində baş verən hadisələr bir daha sübut edir ki, insan haqlarından, millətlərin öz müqəddəratını təyin edilməsindən ağızdolusu danışan Qərb ölkələri söhbət özlərindən gedəndə bundan imtina edirlər.
Azərbaycanı 1988-ci ildə “Dağlıq Qarabağ problemi” kimi böyük bir alovun içinə atan böyük dövlətlər, o cümlədən Qərb ölkələri millətlərin öz müqəddaratını təyin etmək məsələsi gələndə bunu öz ərazilərində tətbiq etmək istəmirlər. Amma başqa yerlərdə öz maraqlarına uyğun olaraq münaqişələri qızışdırmaq üçün bundan sui-istifadə edirlər”-deyə M.Zülfüqarlı bildirdi.
O hesab edir ki, Fransanın və başqa Qərb ölkələrinin kolonializm siyasətindən əziyyət çəkən və buna qarşı mübarizə aparan kiçik ada dövlətlərinin bu addımlarının uğurla nəticələnməsi istiqamətində beynəlxalq platforma olan Bakı Təşəbbüs Qrupu böyük cəhdlər göstərir, əmək sərf edir. M.Zülfüqarlı bildirdi ki, bu məsələni BMT-yə daşımaqla Təşəbbüs Qrupu bütün dünyanın diqqətini bu problemə yönəltdi və bunun bütün bəşəriyyətin problemi olduğunu sübut etdi.
İradə SARIYEVA
