Lənkəranın Şirinsu kənd məktəbi düz 60 il əvvəl tikilib - indi bu gündədir…
Azərbaycan bütün istiqamətlərdə sürətli inkişaf yolunda inamla irəliləyir. Təbii ki, hər bir inkişafın təməlində insan kapitalı, onun əsasında isə təhsil dayanır. Çünki hər bir dövlətin gələcəyi həmin ölkədə təhsilin səviyyəsi ilə ölçülür. Azərbaycanda təhsilin inkişafı dövlət siyasətinin prioritet istiqamətlərindən biridir.
Təhsil sahəsində önəmli islahatlar həyata keçirilir. Bu gün ölkəmizdə təhsilin daha da inkişafı üçün xeyli sayda dövlət proqramı icra olunur. Həyata keçirilən dövlət proqramları çərçivəsində təhsil təyinatlı yeni binalar inşa edilir, ümumi təhsil müəssisələrinin binaları əsaslı təmir olunur. Təhsildə informasiya-kommunikasiya texnologiyalarının tətbiqi genişlənib, bütövlükdə təhsilin infrastrukturu müasirləşir. Qeyd etdiyimiz kimi, təhsil təyinatlı yeni binalar inşa edilir, bəziləri isə təmir edilir. Ancaq elə məktəblər də var ki, hələ də təmirsiz, istifadəyə yararsız vəziyyətdədir. Belə məktəblərdən biri Lənkəran rayonu Şirinsu kənd tam orta məktəbidir. 60 ilə yaxındır tikilib istifadəyə verilən sözügedən məktəbin binası bugünədək əsaslı təmir olunmayıb. Bu səbəbdən də adıçəkilən təhsil müəssisəsi qəzalı vəziyyətdədir. Valideynlər bildirir ki, onlar övladlarının təhlükəsizliyi üçün məktəbdə müəyyən təmir işləri aparıb: “Otaqların pəncərəsi qırıq idi. Çarəsizlikdən pəncərələrə şüşə yerinə polietilen taxmışıq, döşəmə isə qırıq və aralı olduğu üçün linoleum döşəmişik. Qış aylarında uşaqlar üst geyimi ilə sinifdə oturur. Məktəbdə laboratoriya, idman zalı, fizika və kimya kabinetlərinin olmaması təhsilin keyfiyyətinə də mənfi təsir göstərir”.
Lənkəran rayonu üzrə təhsil sektoru: “Aidiyyəti qurumlar məktəbə baxış keçirib və təhsil ocağının yeni tikilən təhsil ocaqlarının siyahısına salınması nəzərdə tutulub”
Məsələ ilə bağlı Lənkəran rayonu üzrə təhsil sektorundan “Bakı-Xəbər”ə bildirildi ki, aidiyyəti qurumlar məktəbə baxış keçirib və təhsil ocağının yeni tikilən təhsil ocaqlarının siyahısına salınması nəzərdə tutulub.
Nizami Hüseynov: “Tədrisin keyfiyyətinə birbaşa məktəbin infrastrukturu təsir göstərir”
Təhsil ekspert Nizami Hüseynov “Bakı-Xəbər”ə şərhində qeyd etdi ki, təhsildə əsas məqsəd təhsilalanların bilik, savadının artırılması və onlara vərdişlərin öyrədilməsidir. Siniflərdəki sıxlıq şagirdlərin bilik səviyyəsinin aşağı düşməsinə səbəb olur. Halbuki, təhsil müəssisələrində dərslər elə təşkil edilməlidir ki, biliyin şagirdə ötürülməsi maksimum həddə çatsın: “Ölkəmizdə modul tipli məktəblərin sürətlə inşası həyata keçirilərsə, uşaqlar yaxşı şəraiti olan təhsil müəssisələrində təhsilini davam etdirər. Tədrisin keyfiyyətinə birbaşa məktəbin infrastrukturu təsir göstərir. Bu gün qəzalı vəziyyətdə olan məktəblərin yetirmələrinin nəticəsi elə də yüksək deyil. Bu istiqamətdə dövlət proqramını daha da genişləndirmək lazımdır”.
Günel CƏLİLOVA
