Xam neft ixracımızı 25 faizədək azaldan səbəblər...
Fuad İbrahimli: “Xam neft məhsullarının ixracının azalması tendensiyası hələ davam edəcək”
Azərbaycanın xam neft vә xam neft mәhsullarının ixracında azalma müşahidə edilir. Dövlət Gömrük Komitəsinin məlumatına əsasən, 2024-cü ilin yanvar-aprel aylarında Azərbaycandan xarici ölkələrə 4,3 milyard dollar dəyərində 6,9 milyon ton xam neft vә xam neft mәhsulları ixrac olunub.
Ötən ilin eyni dövrü ilə müqayisədə xam neft vә xam neft mәhsullarının ixracı dəyər ifadəsində 23,6 faiz, miqdar ifadəsində 24,9 faiz azalıb.
Məlumat üçün bildirək ki, 2024-cü ilin yanvar-aprel aylarında Azərbaycandan 19 ölkəyə 4,3 milyard dollar dəyərində 6,9 milyon ton xam neft ixrac olunub. İtaliya Azərbaycanın neft ixracında birinci yerdə qərarlaşıb. Belə ki, hesabat dövründə Azərbaycan İtaliyaya 1,5 milyard dollar dəyərində xam neft ixrac edib. Azərbaycanın neft ixracında ikinci yerdə İsrail gəlir, ixracda üçüncü yeri isə Hindistan tutur. Bu ölkəyə 512 milyon dollar dəyərində xam neft ixrac edilib.Neft ixracında dördüncü və beşinci yerləri Almaniya və Çexiya tutur.
Maraqlıdır, xam neft vә xam neft mәhsullarının ixracında azalmaya səbəb nədir?
“Karbohidrogen ehtiyatları ilə bağlı hasilat tədricən azalır, hasilat azaldıqca neftin ixracında da həcm olaraq azalma müşahidə edilir”
Iqtisadçı Fuad İbrahimli “Bakı-Xəbər”ə açıqlamasında bildirdi ki, xam neft məhsullarının ixracı ötən il də müşahidə olunub. Bu tendensiya hələ davam edəcək: “Azalmaya səbəb odur ki, karbohidrogen ehtiyatları ilə bağlı hasilat tədricən azalır. Hasilat azaldıqca neftin ixracında da həcm olaraq azalma müşahidə edirik. Ancaq qiymət stabildir. Onu da deyim ki, hasilat azalsa da qiymət bahalaşa bilər. Qiymətin bahalaşması gəlirin artmasına səbəb ola bilər. Bu da o vaxt baş verə bilər ki, neftin qiyməti kəskin şəkildə bahalaşır. Ancaq hazırki vəziyyətdə qiymət stabildir. Hətta 2022-ci illə müqayisədə neftin qiyməti ucuzlaşır. Hasilat azaldıqca valyuta gəlirləri də azalır".
Günel CƏLİLOVA
