Azərbaycanla İranın birgə siyasi iradə nümayişi - sürətli dəyişmə nə ilə bağlıdır...
Abutalıb Səmədov: “Biz arzu edirik ki, münasibətlərimiz qonşuluq və dostluq səviyyəsində davam etsin”
İran-Azərbaycan əlaqələri bölgəmizdə sabitliyin önəmli şərtidir. Bunu Prezident İlham Əliyev Azərbaycanla İran İslam Respublikasının dövlət sərhədində iranlı həmkarı Seyid İbrahim Rəisi ilə görüşündə deyib:
"Xalqlarımızın birgə uğuru, təbii ki, dostlarımızı sevindirir, bunu bəyənməyənlər isə, hesab edirəm ki, öz işləri ilə məşğul olsalar daha yaxşı olar. Əsas odur ki, İran və Azərbaycan dövlətləri bu gün çox güclü birgə siyasi iradə göstərirlər, öz xalqlarına və bütün dünyaya açıq bəyan edirlər ki, biz birlikdəyik və bundan sonra da birlikdə olacağıq".
İki ölkə arasındakı münasibətlər çox sərindi, nə baş verdi ki, münasibətlər belə normallaşdı?
Müstəqil siyasətçi Abutalıb Səmədov “Bakı-Xəbər”ə açıqlamasında bildirdi ki, zamanında İran-Azərbaycan münasibətlərinin kəskinləşməsi bizdən asılı olmayan səbəblər üzündən baş vermişdi: “Çox təəssüf ki, İranın Ermənistana yaxın xətt götürməsi və bunun fonunda Azərbaycanı təhdid edən fikirlər səsləndirməsi münasibətlərdə ciddi problemlər yaratdı. Xüsusilə də Zəngilan ərazisində İsrailin tikdiyi fermanı kəşfiyyat mərkəzi kimi qələmə verməsi və digər bəyanatlar, təbiidir ki, münasibətlərimizin pozulmasına ciddi təsir göstərmişdi. Sərhədlərimizdə hərbi təlimlər keçirərək bizi təhdid yolunu seçdi. Bütün bunlara, təbiidir ki, adekvat cavablar verildi. Sonradan münasibıtlərin düzəlməsi istiqamətində də İran daha aktiv fəaliyyətə başladı. Çünki münasibətləri özləri pozmuşdu. Bu da bizim tərəfimizdən müsbət hadisə kimi qiymətləndirildi. İran bizim qonşumuzdur, bizi dini, mədəni köklər bağlayır. Bu səbəbdən biz də İranla münasibətlərin normallaşmasında maraqlıyıq. Görünür, bu yöndə ictimaiyyətə məlum olmayan istiqamətlərdə də addımlar atılıb. Azərbaycan Prezidenti son görüşdə nikbin bəyanatlar verdi. İran-Azərbaycan dostluğunu heç kimin pozmaq iqtidarında olmadığını vurğuladı. Bu, həm də Azərbaycanın arzusunun dilə gətirilməsi idi. Biz dəfələrlə şahidi olmuşuq ki, münasibətlər normallaşıb və sonradan İranın bəzi addımları yenidən münasibətlərin kəskinləşməsinə aparıb. İndiki şəraitdə münasibətlərin yenidən gərginləşməsi gözlənilə bilərmi? Təbiidir ki, belə hal yarana bilər və bu təhlükə qalmaqdadır. Biz arzu edirik ki, münasibətlərimiz qonşuluq və dostluq səviyyəsində davam etsin. Bunun üçün əlimizdən gələni etməyə hazırıq. Bizim münasibətlərin korlanmasında daha çox üçüncü tərəflər maraqlıdır. İlk növbədə Ermənistan bu münasibətlərin gərginliyində çox maraqlıdır. Biz buna imkan verməməliyik. Burada əsas məsuliyyət İranın üzərinə düşür. Ümid edirəm ki, iki ölkə arasındakı münasibətlər sarsılmayacaq”.
Məhəmmədəli QƏRİBLİ
