Qarabağ məsələsinin arxasında 30 illik əsas sirr bu idi...
Elşən Manafov: “Bütün bunlarda məqsəd o idi ki, Azərbaycan işğalla barışsın”
Prezident İlham Əliyev Laçın rayonunun Sus kəndinin sakinləri ilə görüşdə bildirib ki, 30 illik işğalda məqsəd o idi ki, Azərbaycan öz ərazi bütövlüyünü bərpa etməsin:
“Xalqımızın tarixi həm şərəflidir, həm kədərlidir. Ancaq bizim tariximizdə keçmiş köçkünlər qədər əziyyət çəkən insanlar olmayıb. Həm mənəvi əzab, həm fiziki əziyyət, həm torpaqların itirilməsi, öz yaxınlarının məzarlarını ziyarət edə bilməməyiniz - bu dərdin misli-bərabəri yoxdur. Otuz il ərzində bizə deyirdilər ki, gözləyin, tələsməyin, müharibə aparmayın, bu münaqişənin hərbi həlli yoxdur. Ona görə belə deyirdilər ki, ermənilər burada əbədi yaşasın və biz bu torpaqları görməyək. Bizi razı salmaq istəyirdilər, inandırmağa çalışırdılar ki, məsələ müharibə yolu ilə həll olunmaz. Əsas məqsəd o idi ki, heç vaxt Azərbaycana imkan verməsinlər öz ərazi bütövlüyünü bərpa etsin. Ancaq biz nə etdik? Bax, bunun kimi minlərlə aslanın hesabına gəldik buraya və bu gün burada durmuşuq”.
“Prezident Əliyev uğurlu siyasəti ilə qarşı tərəfin işğal planını darmadağın etdi”
Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafov hesab edir ki, bütün bunlarda məqsəd Azərbaycanı işğalla barışmağa məcbur etmək idi: “Prezidentin bununla bağlı açıqlaması bir daha sübut edir ki, beynəlxalq münasibətlərdə güc amili böyuk önəm və əhəmiyyət kəsb edir. Dövlət müstəqilliyimizin ilk dövrlərində Azərbaycanın təcavüzə məruz qalması dövlətçiliyimizin təşəkkül tapmadığı, ordu və ğüc strukturlarının formalaşmadığı, xarici siyasətimizin prioritet istiqamətlərinin tam mənada müəyyən edilmədiyi dönəmə təsaduf etdi. Ölkə daxilində hakimiyyət uğrunda gedən mübarizə isə yuxarıda sadalanan problemlərin həllinə münasibətdə əyləc mexanizmləri rolunda çıxış etdi. Təcavz edən tərəf isə xaricdəki erməni diasporasının güclü maliyyə dəstəyinə, Qərbin Kreml hakimiyyətindəki təsir agentlərinin siyasi himayəsinə və hüquqi yardımına, Qərbdəki qlobal güclərin geosiyasi dəstəyinə arxalanaraq üstünluk əldə etdi. Münaqişənin tənzimlənməsi məqsədilə təşkil edilmiş ATƏT-in Minsk Qrupu uzun illər münaqişənin statu-kvo çərçivəsində saxlanılması üçün siyasət sərgilədi. Vasitəçi olaraq obyektiv və qərəzsiz mövqe sərgiləyə bilmədi. Xristian təəssübkeşliyi nümayiş etdirdi. İkili standartlardan kənara çıxmadı. Bizlərə münaqişənin hərbi həlli yolu variantı olmadığını bildirməklə suveren dövlət olaraq hüquqlarımızı təhdid etdi. Məsələnin kökündə dayanan əsas amil də məhz bizim mövcud problemin həlli üçün kifayət qədər gücə - maliyyə resurslarına, güclü və modern orduya, habelə müvafiq səviyyədə fəaliyyət göstərə biləcək dövlət institutlarına malik olmamağımız idi. Bütün bunlarda məqsəd o idi ki, Azərbaycan işğalla barışsın”.
Politoloqun fikrincə, beynəlxalq münasibətlərdə birqütblü dünya nizamı da münaqişənin ərazi bütövlüyümüz çərçivəsində həllinə mane olurdu: “Azərbaycanda Heydər Əliyevin iqtidara gəlməsi ilə adıçəkilən problemlərin həlli istiqamətində aparılan məqsədəyönumlü siyasət, neft strategiyası, habelə balanslaşdırılmış xarici siyasət vəziyyətin əhəmiyyətli şəkildə dəyişməsinə təsir göstərdi. Daha sonra Prezident Əliyevin həyata keçirdiyi islahatlar problemin həlli üçün əlverişli bazanın təşəkkülünə rəvac verdi. Prezident Əliyev uğurlu siyasəti ilə qarşı tərəfin işğal planını darmadağın etdi. Ölkənin neft və qaz strategiyası, ordunun gücləndirilməsi, habelə beynəlxalq arenada aparılan uğurlu siyasət bizlərə problemin güc müstəvisi üzərində həllinə imkan verdi. Beynəlxalq güclər Cənubi Qafqazın lokomotivi rolunda çıxış edən güclü Azərbaycanla hesablaşmalı oldular. Beynəlxalq münasibətlərdə birqütblü dünya nizamının dəyişdirilməsi uğrunda Qlobal Cənub – Rusiya, Çin, İran,Türkiyə və s. problemin ərazi bütövlüyü çərçivəsində mübarizəmizə dəstək oldu”.
Vidadi ORDAHALLI
