"Çətinliklərlə üzləşirik və bundan çıxış yolu tapmalıyıq" - Jan Kristof Bas
Hazırda hər birimiz böyük çətinliklərlə üzləşirik və bundan çıxış yolu tapmalıyıq.
Trend xəbər verir ki, bu barədə Sülh Naminə Əlaqələndiricilər və QlobalKompasın təsisçisi, Brazzavildə baş məsləhətçi cənab Jan Kristof Bas VI Ümumdünya Mədəniyyətlərarası Dialoq Forumu çərçivəsində keçirilən “Çoxtərəfli əməkdaşlığın inkişafında yumşaqgücün tətbiqi: həmrəyliyin möhkəmləndirilməsi və parçalanmaya qarşı müqavimət” adlı panel sessiyasında çıxışı zamanı deyib.
“Hazırkı dünya parçalanır. Biz bunun hər sferada şahidiyik. Bütüm bunları daimi diqqət mərkəzində saxlamalıyıq. Bu, sadəcə beynəlxalq yox, cəmiyyətlər daxilində olan böhran və parçalanmadır. Heç kəs özlüyündə insanlığı bu çətinlikdən çıxarmaq qabiliyyətində deyil. Yalnız birlikdə çıxış yolu tapa bilərik.
Etiraf etməliyik ki, heç kəs öz fikrini digərlərinə diktə edə bilməz. Bizə lazım olan yalnızca dialoq deyil, paylaşmaqdır. Qarşımızda duran çətinlik çoxqütblü dünyanın qurulmasıdır ki, bu da bizə intibah gətirsin. Həqiqi mənada qarşımıza məqsədlər qoymalıyıq”, - deyə o bildirib.
